ផ្លូវក្រវាត់ក្រុងទី៣ នឹងសាងសង់ឆាប់ៗខាងមុខនេះហើយ
- ភ្នំពេញ
រាជធានីភ្នំពេញ ៖ ប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ផ្លូវក្រវាត់ក្រុងទី៣ នឹងសាងសង់នៅពេលឆាប់ៗខាងមុខនេះហើយ ។…
រាជធានីភ្នំពេញ ៖ ប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ផ្លូវក្រវាត់ក្រុងទី៣ នឹងសាងសង់នៅពេលឆាប់ៗខាងមុខនេះហើយ ។
សម្តេចបានមានប្រសាសន៍ក្នុងពិធីបើកការដ្ឋានសាងសង់ស្ពានអាកាស និងផ្លូវក្រោមដី នៅរង្វង់មូលចោមចៅ នាព្រឹកថ្ងៃទី២៩ មិថុនា ថា សម្តេចនឹងមានការចុះហត្ថលេខាជាមួយចិន ដើម្បីសាងសង់ផ្លូវក្រវាត់ក្រុងទី៣ នៅរាជធានីភ្នំពេញ នាពេលឆាប់ៗខាងមុខនេះ ។ សម្តេចបានថ្លែងអំណរគុណដល់ប្រជាពលរដ្ឋ ដែលគាំទ្រការដាក់ចេញវិធានការនានាដើម្បីអភិវឌ្ឍន៍រាជធានីភ្នំពេញ ។
សម្តេចតេជោបានបង្ហើបទៀតថា នៅថ្ងៃបើកយុទ្ធនាការឃោសនាបោះឆ្នោតខាងមុខនេះ សម្តេចនឹងថ្លែងប្រកាសដាក់ចេញគោលនយោបាយមួយចំនួនសម្រាប់កសាង និងអភិវឌ្ឍន៍ជាតិបន្តទៅមុខទៀត ។
កាលពីពេលថ្មីៗនេះ មន្ត្រីជំនាញសាលាក្រុងភ្នំពេញបានបង្ហើបថា ក្រសួងសាធារណការ និងសាលាក្រុងភ្នំពេញ ព្រមទាំងសាលាខេត្តកណ្តាល បាននិងកំពុងធ្វើការងារនេះ និងបានចេញប្លង់ផ្លូវក្រវាត់ក្រុងមួយផ្នែកដែលស្ថិតនៅភាគខាងលិច និងខាងត្បូងក្រុងភ្នំពេញរួចហើយ ។ គម្រោងផ្លូវក្រវាត់ក្រុងទី៣ ដែលចេញពីតំបន់ព្រែកព្នៅ តភ្ជាប់តាមខណ្ឌដង្កោ ខណ្ឌពោធិ៍សែនជ័យ មុនភ្ជាប់មកស្រុកកៀនស្វាយ ស្ថិតក្នុងតំបន់កំពង់ផែស្វយ័តក្រុងភ្នំពេញ គឺជាផ្នែកនៃខ្សែក្រវាត់ក្រុងភាគខាងជើងឆៀងខាងលិច និងតភ្ជាប់មកភាគខាងត្បូងរាជធានីភ្នំពេញ ។
ផ្លូវក្រវាត់ក្រុងទី៣ ដែលតភ្ជាប់ពីកំពង់ផែស្វយ័តក្រុងភ្នំពេញ នឹងកាត់ទៅតំបន់វិហារសួគ៌ ក្នុងស្រុកខ្សាច់កណ្តាល ខេត្តកណ្តាល និងតភ្ជាប់មកកាន់តំបន់មួយចំនួនក្នុងស្រុកពញាឮ ខេត្តកណ្តាល ហើយតភ្ជាប់មកកាន់ស្រុកអង្គស្នួល ឆ្លងកាត់ផ្លូវជាតិលេខ៤ ផ្លូវជាតិលេខ៣ តាមរយៈការសាងសង់ផ្លូវអាកាសចំនួន២ ឆ្លងកាត់ផ្លូវជាតិដ៏សំខាន់នេះ ដើម្បីតភ្ជាប់មកកាន់ខណ្ឌមួយចំនួននៃរាជធានីភ្នំពេញ ។
អ្នកនាំពាក្យក្រសួងសាធារណការ និងដឹកជញ្ជូន លោក វ៉ាស៊ឹម សុរិយា បានមានប្រសាសន៍ថា ការសិក្សាផ្លូវក្រវាត់
ក្រុងទី៣នេះបានបញ្ចប់ម្តងហើយ ដោយមានជម្រើសចំនួន៣ ប៉ុន្តែលោកមិនដឹងថា ជម្រើសចុងក្រោយត្រូវបានរាជរដ្ឋាភិបាលជ្រើសយកមួយណាទេ ដោយគម្រោងនេះមានស្ពានច្រើនត្រូវសាងសង់ ហេតុនេះ ការចំណាយត្រូវអស់ប្រាក់ច្រើនលានដុល្លារអាមេរិក ។ លោកបន្តថា ៖« រហូតមកទល់ពេលនេះ តាមខ្ញុំដឹង រដ្ឋាភិបាលមានលុយរួចហើយ រង់ចាំតែការចុះហត្ថលេខាប៉ុណ្ណោះ » ៕
ចែករំលែកព័តមាននេះ