រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានបញ្ជាក់ថា សហគមន៍អឺរ៉ុបជាប្រទេសទី១ ដែលទទួលទិញទំនិញពីកម្ពុជាច្រើនជាងគេ ជាពិសេសផ្នែកសម្លៀកបំពាក់, កង់ និងស្បែកជើង ជាដើម ដែលនេះជាការពង្រឹងទំនាក់ទំនងរវាងកម្ពុជា-អឺរ៉ុប…
រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានបញ្ជាក់ថា សហគមន៍អឺរ៉ុបជាប្រទេសទី១ ដែលទទួលទិញទំនិញពីកម្ពុជាច្រើនជាងគេ ជាពិសេសផ្នែកសម្លៀកបំពាក់, កង់ និងស្បែកជើង ជាដើម ដែលនេះជាការពង្រឹងទំនាក់ទំនងរវាងកម្ពុជា-អឺរ៉ុប ឲ្យកាន់តែរឹងមាំបន្ថែមទៀត ។
ថ្លែងនៅក្នុងកម្មវិធីតាំងពិព័រណ៍អឺរ៉ុបលើកដំបូងនៅកម្ពុជា នាព្រឹកថ្ងៃទី២៩ ខែមិថុនា កន្លងមក លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានឲ្យដឹងថា ក្នុងឆ្នាំ២០១៧ ទំហំពាណិជ្ជកម្មរវាងកម្ពុជា និងសហគមន៍អឺរ៉ុប មានជាង៦ពាន់លានដុល្លារ ដោយក្នុងនោះកម្ពុជានាំចេញស្មើ៤ពាន់លានដុល្លារ ចំណែកសហគមន៍អឺរ៉ុបនាំចូលមកកម្ពុជា ជិត១ពាន់លានដុល្លារប៉ុណ្ណោះ ។
លោកជំទាវបញ្ជាក់ថា ៖« សហគមន៍អឺរ៉ុប ជាប្រទេសទី១ ដែលទទួលផលិតផលនាំចេញរបស់កម្ពុជា ។ សហគមន៍អឺរ៉ុបបានរៀបចំពិព័រណ៍ពាណិជ្ជកម្មដំបូងបង្អស់របស់ខ្លួននៅកម្ពុជា ដោយមានក្រុមហ៊ុនប្រមាណជាង៤០ស្ដង់ចូលរួម ក្នុងនោះមានក្រុមហ៊ុនផលិតផលយានយន្ត គ្រឿងសង្ហារិម ទំនិញប្រើប្រាស់ គ្រឿងម៉ាស៊ីន បរិក្ខារពេទ្យ ឱសថ សេវាកម្មហិរញ្ញវត្ថុ ចំណីអាហារ ភេសជ្ជៈ និងផលិតផលជាច្រើនមុខផ្សេងទៀត » ។ លោកជំទាវ តឹករ៉េត កំរង បានបន្ថែមថា ការតាំងពិព័រណ៍របស់សហគមន៍អឺរ៉ុបនៅថ្ងៃនេះ ជាឱកាសល្អសម្រាប់វិនិយោគិនកម្ពុជា និងវិនិយោគិនអឺរ៉ុប ក្នុងការពង្រឹងប្រតិបត្តិការ សេដ្ឋកិច្ចជាមួយបណ្ដាប្រទេសផ្សេងៗលើពិភពលោក ។ អ្វីដែលសំខាន់ទៀតនោះ ការវិនិយោគនេះមិនត្រឹមតែផ្ដល់អត្ថប្រយោជន៍ចំពោះកម្ពុជាប៉ុណ្ណោះទេ តែនឹងផ្ដល់ដល់បណ្ដាប្រទេសផ្សេងៗលើពិភពលោកផងដែរ ។
លោកជំទាវបានបន្តថា ពិព័រណ៍នេះមានក្រុមហ៊ុន៥១ក្រុមហ៊ុនមកពីបណ្តាប្រទេសផ្សេងៗ ដែលជាសមាជិករបស់សហគមន៍អឺរ៉ុប ហើយនៅក្នុងនោះមានផលិតផលដូចជា គ្រឿងបច្ចេកទេស, គ្រឿងអេឡិចត្រូនិក, រថយន្ដ, គ្រឿងសង្ហារិម និងសម្ភារផ្ទះបាយ ជាដើម ។ល។ លោកជំទាវសង្កត់ធ្ងន់ថា ៖« ចំណុចសំខាន់គឺដើម្បីចង់បង្ហាញពីផលិតផលសហគមន៍អឺរ៉ុប ដែលមានគុណភាព ហើយសំខាន់មួយទៀត គឺដើម្បីពង្រឹងទំនាក់ទំនង ជាពិសេស កិច្ចសហប្រតិបត្តិការ ក៏ដូចជាការភ្ជាប់ទំនាក់ទំនងផ្នែកពាណិជ្ជកម្មរវាងកម្ពុជា និងសហគមន៍អឺរ៉ុបផងដែរ » ។
លោកជំទាវបានបញ្ជាក់ថា ៖« នេះជាឱកាសមួយដែលប្រទេសកម្ពុជាត្រៀមខ្លួនជាស្រេច ដើម្បីពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្មជាមួយបណ្តាប្រទេសផ្សេងនៅលើពិភពលោក ហើយសំខាន់យើងគិតថាទំនាក់ទំនងពាណិជ្ជកម្មសេដ្ឋកិច្ចនេះ មិនមែនមានផលប្រយោជន៍សម្រាប់តែកម្ពុជាទេ គឺមានផលប្រយោជន៍ដល់ប្រទេសដែលជាដៃគូយើងដែរ ។ ប្រទេសកម្ពុជាមានការអភិវឌ្ឍដូចសព្វថ្ងៃ ធានាកំណើនសេដ្ឋកិច្ចជាង៧%ក្នុង១ឆ្នាំ ហើយកាត់បន្ថយភាពក្រីក្រជាង១%រៀងរាល់ឆ្នាំនេះ យើងឃើញថា ការរីកចម្រើននេះ គឺបានមកដោយសារតែប្រទេសកម្ពុជាយើងមានសុខសន្តិភាព ក្រោមការដឹកនាំដ៏ឈ្លាសវៃនិងគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា » ។
លោកជំទាវបន្ថែមថា ឱកាសនៃការវិនិយោគនៅក្នុងប្រទេសកម្ពុជា គឺជាឱកាសដ៏ល្អបំផុតនាពេលនេះ ពីព្រោះការវិនិយោគនៅកម្ពុជា មិនមែនត្រឹមតែបម្រើអតិថិជន១៦លាននាក់ទេ គឺបម្រើអតិថិជនជាង៦០០លាននាក់ នៅក្នុងតំបន់អាស៊ាន ហើយនិងប្រទេសដៃគូរបស់អាស៊ាន ដែលមានជាង៣ពាន់លាន
នាក់ ។ លោក Arnaud Darc ប្រធានសភាពាណិជ្ជកម្មអឺរ៉ុប បានមានប្រសាសន៍ថា នេះជាកិត្តិយសដ៏ធំធេងមួយសម្រាប់អឺរ៉ុប ដែលបានមកចូលរួមរៀបចំពិព័រណ៍អឺរ៉ុប (EuroFair) ដំបូងគេបង្អស់មួយនេះនៅកម្ពុជា ។ ពិព័រណ៍ពាណិជ្ជកម្មលើកទី១នេះ នឹងដាក់តាំងផលិតផលល្បីៗ និងសេវាកម្មល្អៗមកពីអឺរ៉ុប ជូនអ្នកប្រើប្រាស់ និងសហគ្រិនខ្មែរឱ្យបានស្គាល់ ហើយនេះជាការជួយជំរុញផ្លាស់ប្តូរពាណិជ្ជកម្មរវាងកម្ពុជា និងអឺរ៉ុបផងដែរ ៕
ចែករំលែកព័តមាននេះ