ខេត្តប៉ៃលិន ៖ បន្ទាប់ពីកោះសនិ្តភាពបានចុះផ្សាយព័ត៌មានកាលពីថ្ងៃទី២៥ ខែមិថុនា ឆ្នាំ២០១៨ថា បុរសម្នាក់ត្រូវជនដៃដល់ម្នាក់វាយ បណ្តាលឱ្យជាំភ្នែកខាងឆ្វេង ខណៈអង្គុយផឹកស៊ីជួបជុំមិត្តភក្តិមានគ្នា៣នាក់ ក្នុងផ្សារត្រីថ្មីមួយកន្លែង ដោយជជែកគ្នារឿងស្រី ។
រហូតមកដល់វេលាម៉ោង៨និង៥០នាទីព្រឹកថ្ងៃទី០២ ខែកក្កដា ឆ្នាំ២០១៨នេះ ជនរងគ្រោះបានចេញមុខធ្វើការបកស្រាយបំភ្លឺថា រូបគេមិនបានផឹកស៊ីឈ្លោះទាស់ទែងគ្នា ដោយសារតែរឿងស្រីញីនោះឡើយ គឺរូបគេធ្វើការអប់រំណែនាំដល់កូនជាងរបស់ខ្លួនម្នាក់ដែលទើបនឹងចូលធ្វើការ ស្រាប់តែរូបគេមិនព្រមស្តាប់តាម ហើយថែមទាំងស្ទុះមកដាល់ចំភ្នែកខាងឆ្វេងបណ្តាលឱ្យរងរបួសតែម្តង ។
សូមបញ្ជាក់ផងដែរថា ហេតុការណ៍បង្កអំពើហិង្សានេះបានកើតឡើងកាលពីវេលាម៉ោង៦ និង៥០នាទីថ្ងៃទី២៤ ខែមិថុនា ឆ្នាំ២០១៨ ស្ថិតនៅចំណុចផ្សារត្រីជាងអូន ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ ជនរងគ្រោះ មាន ឈ្មោះ ពៅ ហ៊ួរ ភេទប្រុស អាយុ២៩ឆ្នាំ ម្ចាស់ស្ថានីយ៍ជួសជុលរថយន្ត រស់នៅភូមិអូរពឺត សង្កាត់ទួលល្វា ក្រុងប៉ៃលិន រងរបួសហើមក្រោមភ្នែកខាងឆ្វេង ។ រីឯជនបង្កមាន ឈ្មោះ សុង សុហេង ភេទប្រុស អាយុ២៧ឆ្នាំ ជាកូនជាងជួសជុលរថយន្ត រស់នៅកន្លែងកើតហេតុខាងលើ ។
បើតាមប្រភពព័ត៌មានពីជនរងគ្រោះ ឈ្មោះ ពៅ ហួរ បានរៀបរាប់នៅក្នុងការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តប៉ៃលិនឱ្យដឹងថា កាលពីជាង១ខែមុន ម្តាយរបស់ជន ដៃដល់ បានយកកូនរបស់ខ្លួនទៅរៀនជួសជុលរថយន្តនៅក្នុងស្ថានីយ៍របស់ខ្លួន ដោយផ្តាំផ្ញើឱ្យធ្វើ ការអប់រំរូបគេផងដែរ ព្រោះបុរសដៃដល់ជាកូនជាងនោះ មិនស្តាប់បង្គាប់ឪពុកម្តាយឡើយ ។ បន្ទាប់ពីផឹកស៊ីម្តងៗ ពេលត្រឡប់ទៅផ្ទះវិញតែងតែស្រែកឡូឡាបង្ករឿងដល់ក្រុមគ្រួសារ ហើយម្តាយរបស់គេតែងតែខ្សឹបប្រាប់ឱ្យជួយអប់រំណែនាំផងដែរ ។
លុះបន្ទាប់ពីចប់ការងារនៅល្ងាចថ្ងៃកើតហេតុមានមិត្តភក្តិម្នាក់បានទូរស័ព្ទហៅរូបគេឱ្យទៅចូលរួមផឹកស៊ីជាមួយគ្នា នៅក្នុងផ្សារត្រីខាងលើ លុះជិះម៉ូតូទៅដល់ស្រាប់តែឃើញកូនជាងរូបនោះ អង្គុយផឹកស្រាបៀរនៅទីនោះដែរ ដោយរូបគេក៏ចូលទៅអង្គុយផឹកមានគ្នា៣នាក់ លុះអស់រយៈពេលប្រហែលកន្លះម៉ោង ដោយមិនទាន់អស់ស្រាបៀរមួយកំប៉ុងផង រូបគេក៏ធ្វើការអប់រំណែនាំដល់កូនជាង ។
ជនរងគ្រោះបន្តទៀតថា ពេលនោះក៏ក្លាយទៅជាប្រកែកដាក់គ្នាមួយពីរៗ ធ្វើឱ្យជនដៃដល់ច្រឡោតក៏ស្ទុះមកដាល់រូបគេចំនួន២ទៅ៣ដៃ បណ្តាលឱ្យចំភ្នែកខាងឆ្វេងរងរបួសតែម្តង ។ ជនរងគ្រោះបញ្ជាក់ទៀតថា ពាក់ព័ន្ធនឹងករណីប្រកែកឈ្លោះទាស់ទែងគ្នារឿងស្រីញីនោះ គឺរូបគេសុំបដិសេធជាដាច់ខាតថា អត់មានជាប់ពាក់ព័ន្ធនោះទេ ហើយរូបគេបានធ្វើការដោះស្រាយគ្នានៅអធិការនគរបាលក្រុងប៉ៃលិនរួចរាល់អស់ហើយដែរ ។ តែកូនជាងកំហូចម្នាក់នេះ ក៏លែងមកចូលទៅធ្វើការបន្តទៀតហើយ ។
ចំណែកប្រជាពលរដ្ឋបានលើកឡើងថា ការផឹកស៊ីរហូតដល់ទាស់ទែងវាយតប់គ្នា គឺបង្កឱ្យបាត់បង់សណ្តាប់ធ្នាប់ភូមិឃុំមានសុវត្ថិភាព និងនាំឱ្យមានអសន្តិសុខក្នុងសង្គម អាចនឹងក្លាយទៅជាកាប់ចាក់សម្លាប់គ្នា ដោយសារតែការឈ្លោះប្រកែកគ្នានេះផងដែរ ៕
ចែករំលែកព័តមាននេះ