រាជធានីភ្នំពេញ ៖ ក្នុងចំណោមតារាចម្រៀង និងតារាសម្តែងលំដាប់យុវវ័យរមែងទទួលបានការគាំទ្ររៀងៗខ្លួន ។ តារាទាំងនោះតែងតែរិះរកចំណុចទាក់ទាញ ប្លែកៗថ្ពក់ចិត្តអ្នកគាំទ្រ ។ ម្ល៉ោះហើយគ្រប់សកម្មភាពចេញសម្តែងនៅទីណា កន្លែងណា…
រាជធានីភ្នំពេញ ៖ ក្នុងចំណោមតារាចម្រៀង និងតារាសម្តែងលំដាប់យុវវ័យរមែងទទួលបានការគាំទ្ររៀងៗខ្លួន ។ តារាទាំងនោះតែងតែរិះរកចំណុចទាក់ទាញ ប្លែកៗថ្ពក់ចិត្តអ្នកគាំទ្រ ។ ម្ល៉ោះហើយគ្រប់សកម្មភាពចេញសម្តែងនៅទីណា កន្លែងណា តារាចម្រៀង តារាសម្តែងខ្លះ មានអ្នកស្រឡាញ់ពេញចិត្តច្រើនតាមទៅលើកទឹកចិត្ត ។ ការពេញចិត្តទាំងអស់នេះត្រូវក្រុមយុវវ័យផ្តោតលើការស្លៀកពាក់ ខ្លះផ្តោតលើចរិតឫកពា ក៏ដូចជាការលេងស្ទីលផ្សេងៗ ។
តាមការសាកសួរយុវវ័យជាច្រើនកាលពីពេល ថ្មីៗកន្លងមក តារាដែលពួកគេពេញចិត្តគឺតារាចម្រៀងផ្នែកបុរសមានព្រាប សុវត្ថិ ឆន សុវណ្ណារាជ លោកនីកូ លោកឆាយ វីរៈយុទ្ឋ និងលោកណុប បាយ៉ារិទ្ឋិ ។ តារាចម្រៀងផ្នែកនារីមានឱក សុគន្ឋកញ្ញា ,មាស សុខសោភា ,សុគន្ខ និសា ,ពេជ្រ សោភា និងសុខ ពិសី ។
ចំពោះតារាសម្តែងមានសុខ សោម៉ាវត្តី ,សារ៉ាយ សក្ខណា និងឌុច លីដា ។
យុវតីផៃ សនណារីន សិស្សថ្នាក់ទី១១នៃវិទ្យាល័យព្រែកឯងបានបង្ហាញការចូលចិត្តថាពេញចិត្តខ្លាំងជាងគេតារាចម្រៀងលំដាប់កំពូលឱក សុគន្ឋកញ្ញា ដោយសារតែប្រវត្តិសិល្បៈល្អ គឺជាសិស្សសាលាវិចិត្រសិល្បៈ ។ រីឯស្ទីលច្រៀងរាំ គឺមើលទៅរស់រវើក បូកផ្សំការតែងខ្លួនប្លែកៗមិន ដដែលៗ ។
យុវជនឡា ទីន ជានិស្សិតនៅសាកលវិទ្យាល័យមួយឲ្យដឹងថាក្នុងចំណោមតារាទាំងនោះ គឺសុទ្ធតែជាតារាដែលមានឈ្មោះបោះសំឡេងប្រហែលគ្នា ។ ទោះជាយ៉ាងណាក្តីពួកគេពេញចិត្តបំផុត គឺលោកព្រាប សុវត្ថិ យោងលើភាពរួសរាយចរិតសុភាព ច្រៀងពីរោះ ជាមនុស្សចេះអត់ធ្មត់ ស្រឡាញ់ការងារ ។ ចំពោះប្រជាប្រិយភាពវិញ គឺល្បីល្បាញរាប់ឆ្នាំ កម្រមានរលកក្រោយច្រានរលកមុនមួយនេះបានណាស់ ។
មិនខុសគ្នាដែរសិស្សវិទ្យាល័យនៅភាគឦសាន យុវតីវង្ស ស្រីនាថ និយាយថាតារាចម្រៀងក្នុងចិត្តរបស់នាងគឺពេជ្រ សោភាដោយចូលចិត្តតាំងពីដឹងក្តីមក ។ ឲ្យតែចម្រៀងរបស់ពេជ្រ សោភា ថ្មីៗចេញមក គឺនាងចេះចាំ ច្រៀងបានស្ទើរគ្រប់បទ ។ រីឯការផាត់មុខ ស្លៀកពាក់ ធ្វើសក់មើលទៅទាក់ភ្នែកបូកទាំងក្បាច់រាំវិញហក់លោតចេញមកទំនងតែម្តង ។
លោកឡុង រុងរឿង ជាងកាត់សក់នៅភ្នំពេញស្រឡាញ់សំឡេងឱក សុគន្ឋកញ្ញា និងមាស សុខសោភា ដោយចាត់ទុកថាទាំង២ដួងនេះម្យ៉ាងម្នាក់ ។ សុគន្ធកញ្ញា សំឡេងច្រៀងស្រែកបានដល់កម្រិត តារាផ្សេងពិបាកធ្វើបាន ពិសេសក្បាច់រាំប្លែក ទាក់ភ្នែក ។ ចំពោះមាស សុខសោភា វិញ លោកឡុង រុងរឿង ថាមានទឹកដមសំឡេងលួងលោមផ្អែមស្រួយ បើបទមនោសញ្ចេតនាត្រូវតែម្តងចាក់ដោតបេះដូង ។ លើសពីនេះបទរបៀបចង្វាក់ប្រពៃណីខ្មែរគឺរឹតតែពីរោះ ។
ណា រ៉េត នារីអ្នកលក់ដូរនៅផ្សារឈូកមាសថាចូលចិត្តសុគន្ឋ នីសា ច្រៀងបែបសុភាព សំឡេងស្រាលស្រទន់ មុខមាត់ស្អាត ។ នីសាច្រៀងដាក់មនោសញ្ចេតនាបានល្អ ហើយពូកែចូលតួ ។
បើតារាសម្តែងវិញណា រ៉េត និយមចូលចិត្តសារ៉ាយ សក្ខណា និងសុខ សោម៉ាវត្តី ដោយ២ដួងនេះជាតួក្រមិចក្រមើមមើលទៅទំនងសមឥតខ្ចោះ ។ ពួកនាងមានអ្នកគាំទ្រច្រើន ទោះជាម្នាក់ៗមានកូនក្តី ។
ស្រីលីន ជាងអ៊ុតសក់ក្នុងផ្សារទំនើបឡាក់គី ចូលចិត្តលោកឆន សុវណ្ណារាជ និងតារាសម្តែងសុខ សោម៉ាវត្តី ដោយនិយាយថាមើលទៅពេញភ្នែក ស្លៀកពាក់សមរម្យ ឯសំឡេងពីរោះ។ បើនិយាយពីសុម៉ាវត្តី វិញ គឺសម្តែងបែបក្រមិចក្រមើមមិនចាញ់សារ៉ាយ សក្ខណា ទេ ៕
ចែករំលែកព័តមាននេះ