ខេត្តព្រះសីហនុ ៖ យន្តហោះធុនធំខ្នាតយក្សនឹងអាចចុះចតជាបណ្តើរៗនាពេលខាងមុខនេះ បន្ទាប់ពីបញ្ចប់គម្រោងសាងសង់បន្ថែមផ្លូវរត់ចំនួន៣.៣០០ម៉ែត្រ រួមជាមួយស្ថានីយយន្តហោះអន្តរជាតិកងកេង ដែលបានសាងសង់រួចរាល់ជាស្ថាពរ និងអាចទទួលបានអ្នកដំណើរក្នុង១ឆ្នាំៗចំនួន១លាននាក់ ខណៈអគារចាស់ទទួលភ្ញៀវបានត្រឹម២០ម៉ឺននាក់ ។
នេះបើតាមប្រសាសន៍របស់លោកបណ្ឌិត ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរសុីវិល ថ្លែងក្នុងពិធីសម្ពោធដាក់ឲ្យដំណើរការព្រលានយន្តហោះអន្តរជាតិកងកេង ដែលមានទីតាំងស្ថិតនៅឃុំរាម ស្រុកព្រៃនប់ នារសៀលថ្ងៃទី២៧ មិថុនា កន្លងមកនេះ ។
ពិធីនេះក៏មានការចូលរួមពីលោក យន្ត មីន អភិបាលនៃគណៈអភិបាលខេត្ត និងលោក-លោកស្រីអគ្គនាយក អគ្គនាយករងនៃអាកាសចរសុីវិល ព្រមទាំងភ្ញៀវទេសចរជាតិ និងអន្តរជាតិផងដែរ ។
លោកបណ្ឌិត ម៉ៅ ហាវណ្ណាល់ មានប្រសាសន៍ថា ៖« យើងសាងសង់អគារចេញ-ចូលអ្នកដំណើរនៅស្ថានីយយន្តហោះកងកេងបានរួចរាល់ជាស្ថាពរហើយ ។ អគារថ្មីនេះអាចទទួលបានអ្នកដំណើរក្នុង១ឆ្នាំ ចំនួន១លាននាក់ ខណៈអគារចាស់ទទួលបានភ្ញៀវបត្រឹមតែ២០ម៉ឺននាក់ប៉ុណ្ណោះក្នុង១ឆ្នាំ ។ ដោយមើលឃើញសក្តានុពលភ្ញៀវទេសចរកើនឡើងជាបន្តបន្ទាប់ ទើបអាកាសចរស៊ីវិលបានពិភាក្សាជាមួយក្រុមហ៊ុនវិនិយោគ សាងសង់អគារថ្មីឲ្យមានផាសុកភាព សោភ័ណភាព និងបរិស្ថានកាន់តែល្អប្រសើរជាងមុន » ។
លោកបន្តថា សព្វថ្ងៃនេះ ព្រលានយន្តហោះអន្តរជាតិកងកេង មានប្រវែង២.៥០០ម៉ែត្រ គឺមិនទាន់ឆ្លើយតបនឹងតម្រូវការសម្រាប់យន្តហោះធុនធំខ្នាតយក្សបានទេ ។ ដូច្នេះ សព្វថ្ងៃ យើងទទួលបានត្រឹមតែយន្តហោះប្រភេទ Air bus321 និងបូ៊អុីង៧៥៧ ប៉ុណ្ណោះ ។
នៅក្នុងអាកាសយានដ្ឋានខេត្តព្រះសីហនុ មានភ្ញៀវតាមរដូវកាល គឺ Low season និង High season ។ នៅរដូវ Low season មានភ្ញៀវពី៧ ទៅ១០ជើងក្នុង១ថ្ងៃ ។ ដោយឡែក នៅរដូវ High season មានរហូតដល់១៥ជើងក្នុង១ថ្ងៃ ។ ដូច្នេះ ព្រលានយន្តហោះអន្តរជាតិកងកេងបានវិវឌ្ឍន៍លឿនហួសពីការស្មាន ដែលមានសេវាហោះហើរត្រង់មកពីប្រទេសចិន វៀតណាម ម៉ាឡេស៊ី និងនៅក្នុងស្រុក ។
លោកបញ្ជាក់ថា ដើម្បីបំពេញតម្រូវការនៃលំហូរភ្ញៀវដែលបានកើនឡើងយ៉ាងគំហុកនេះ ក្រុមហ៊ុនវិនិយោគសាងសង់បានសម្រេចកសាងផ្លូវចុះចតបន្ថែមចំនួន៨០០ម៉ែត្រ ដោយចែកជា២ដំណាក់កាល ក្នុងនោះដំណាក់កាលទី១ ចំនួន៣០០ម៉ែត្រ និងដំណាក់កាលទី២ ចំនួន៥០០ម៉ែត្រ ដើម្បីឲ្យស្របនឹងអ្វីដែលបានគ្រោងទុកចំនួន៣.៣០០ម៉ែត្រ ហើយចម្ងាយនេះ យន្តហោះខ្នាតយក្សអាចចុះចតបានដោយគ្មានឧបសគ្គ ។
លោក យន្ត មីន អភិបាលនៃគណៈអភិបាលខេត្ត បានថ្លែងកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំគ្រប់លំដាប់ថ្នាក់នៃអាកាសចរសុីវិល ដែលបានពុះពារគ្រប់ការលំបាកនាំយកមកនូវសមិទ្ធផលថ្មីមួយបន្ថែមទៀតសម្រាប់ខេត្តព្រះសីហនុ ដើម្បីបំពេញតាមតម្រូវការចាំបាច់នៃកំណើនភ្ញៀវទេសចរជាតិ-អន្តរជាតិ ។ លោកអភិបាលខេត្តថ្លែងថា ៖« វាក៏ជាការយកចិត្តទុកដាក់ខ្ពស់របស់ប្រមុខរាជរដ្ឋាភិបាលផងដែរ ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ បាននាំមកនូវសុខសន្តិភាព និងការអភិវឌ្ឍ » ៕
ចែករំលែកព័តមាននេះ