រាជធានីភ្នំពេញ ៖ អគារខុនដូ Mekong view tower6 បានបាក់ធ្លាក់ពិដានជាន់ទី២៣ បណ្តាលឲ្យរងរបួស៥នាក់ និងបាត់ខ្លួន២នាក់។ ហេតុការណ៍នេះបង្កឲ្យមានការភ្ញាក់ផ្អើលកាលពី…
រាជធានីភ្នំពេញ ៖ អគារខុនដូ Mekong view tower6 បានបាក់ធ្លាក់ពិដានជាន់ទី២៣ បណ្តាលឲ្យរងរបួស៥នាក់ និងបាត់ខ្លួន២នាក់។ ហេតុការណ៍នេះបង្កឲ្យមានការភ្ញាក់ផ្អើលកាលពី វេលាម៉ោង១ និង៤០នាទីរសៀល ដល់សមត្ថកិច្ចនៅវេលាម៉ោងប្រមាណ២ និង៣០នាទីរសៀល ថ្ងៃទី១ ខែកក្កដា ឆ្នាំ២០១៨ នៅទីតាំងខុនដូខាងលើ មានស្ថិតនៅក្នុងភូមិទី២ សង្កាត់ជ្រោយចង្វារ ខណ្ឌជ្រោយចង្វារ។
ជនរងគ្រោះដែលបាត់ខ្លួន ទី១-ឈ្មោះ បាន លាស់ ភេទប្រុស អាយុ៤៨ឆ្នាំ រស់នៅភូមិតាពុំ ឃុំល្វេ ស្រុកកោះសូទិន ខេត្តកំពង់ចាម, ២.ឈ្មោះ នាម ហ៊ីង អាយុ៣៨ឆ្នាំ រស់នៅភូមិគោករុន ឃុំប៉ុបប៉ែន ខេត្តសៀមរាប។ ចំណែកអ្នករងរបួស ១.ឈ្មោះ ជាង នឿន របួសជើង ២.ជាង ផាត របួសជើង ៣.ជាង រិទ្ធ របួសស្មា ៤.ស្រី លន ភេទស្រី របួសស្មា ៥.ស្រី របួសកែងដៃ។ តាមព័ត៌មានបានឲ្យដឹងថា ពិដានដែលបាក់ធ្លាក់សង្កត់កម្មករមានទំហំ១២ម៉ែត្រ គុណ២៤ម៉ែត្រ និងមានកម្រាស់០.១៤ម៉ែត្រ ស្ថិតនៅជាន់ទី២៣។
តាមជាងសំណង់បានប្រាប់សមត្ថកិច្ចឲ្យដឹងថា នៅវេលាព្រឹកថ្ងៃកើតហេតុក្រុមជាងប្រមាណជាង១០នាក់ បាននាំគ្នាចាក់ពិដានជាន់ទី២៣។ លុះនៅវេលារសៀលក៏បន្តបាញ់បេតុងចាក់ពិដានទៀត ស្រាប់តែបណ្តាលឲ្យបាក់ចន្ទល់ធ្លាក់ពិដាន សង្កត់កម្មករ និងក្រុមជាងបណ្តាលឲ្យរងរបួស និងបាត់ខ្លួន២នាក់ ជាប់ក្រោមពិដាននោះតែម្តង។
តាមព័ត៌មានឲ្យដឹងថា នៅវេលាល្ងាចនេះអាជ្ញាធរ សមត្ថកិច្ច និងមន្ត្រីតុលាការបានចុះទៅពិនិត្យកន្លែង កើតហេតុ ហើយក្រុមជាងបាននាំគ្នាដាប់គាស់បេតុងរុករកជាងដែលបាត់ខ្លួនអស់ជាច្រើនម៉ោង។ ខណៈលោក ឃួង ស្រេង អភិបាលរាជធានីភ្នំពេញ និងលោក ឃ្លាំង ហួត អភិបាលខណ្ឌជ្រោយចង្វារ បានអញ្ជើញចុះទៅកន្លែងកើតហេតុផងដែរ។ នៅវេលាម៉ោង៩យប់សពអ្នកដែលបាត់ខ្លួនពុំទាន់រកឃើញនៅឡើយទេ៕
https://youtu.be/CG3LkbU9egw
ចែករំលែកព័តមាននេះ