រាជធានីភ្នំពេញ ៖ យុវជនម្នាក់បានរងរបួសយ៉ាងដំណំ ពេលរូបគេ និងមិត្តភក្ដិម្នាក់ទៀតជិះម៉ូតូមួយគ្រឿងម៉ាកហុងដាឌ្រីម សេ១២៥ បើកបរក្នុងល្បឿនលឿន ហើយបានបុកពីក្រោយម៉ូតូមួយគ្រឿងម៉ាកហុងដា គូបជ្រុង ជិះគ្នា២នាក់ម្ដាយ និងកូនកំពុងបត់ឆ្វេងក្នុងបំណងឆ្លងផ្លូវ។ បន្ទាប់មកម៉ូតូហុងដាឌ្រីមនេះបានជ្រុលបន្តចូលទៅចំណែកផ្លូវម្ខាងទៀតហើយបានបុកជាមួយរថយន្តមួយគ្រឿងទៀតម៉ាកឡិចស៊ីស RX-300 បណ្ដាលឲ្យដួលរងរបួស ចំណែករថយន្តបានរងការខូចខាត បែកកង់មុខខាងឆ្វេងផងដែរ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២ និង៣០នាទីថ្ងៃត្រង់ ថ្ងៃទី១ ខែកក្កដា ឆ្នាំ២០១៨ នៅលើកំណាត់មហាវិថីសហព័ន្ធរុស្ស៊ី ស្ថិតនៅក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។ ប្រភពព័ត៌មានបានឱ្យដឹងថា យុវជនដែលរងរបួសនោះមិនត្រូវបានស្គាល់ឈ្មោះឡើយ ជិះម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ កំពត ១G-១៣៤៧ បានជ្រុលទៅបុកពីក្រោយម៉ូតូ១គ្រឿងទៀតម៉ាកហុងដាគូបជ្រុង ពណ៌ស្លែ ពាក់ស្លាកលេខ តាកែវ ១L-៧០៥៦ ជិះដោយស្ត្រី២នាក់ម្ដាយ និងកូនហើយពួកគាត់មិនបានរងរបួសឡើយ។
ចំណែករថយន្តមួយគ្រឿងដែលត្រូវម៉ូតូហុងដាឌ្រីមសេ១២៥នេះបុកដែរនោះ ម៉ាកឡិចស៊ីស ពណ៌ស្ករ ពាក់ស្លាកលេខ ភ្នំពេញ ២Q-៥១៣៩ បើកបរដោយបុរសម្នាក់មិនស្គាល់ឈ្មោះដែរ។តាមប្រភពព័ត៌មានបានឲ្យដឹងថា នៅមុនពេលកើតហេតុ ម៉ូតូមួយគ្រឿងម៉ាកហុងដាឌ្រីមសេ១២៥ ជិះគ្នា២នាក់បើកបរក្នុងល្បឿនលឿន ក្នុងទិសដៅពីលិចទៅកើត លុះពេលមកដល់ចំណុចកើតហេតុបានវាក់ជាមួយម៉ូតូគូបជ្រុងដែលកំពុងជិះស្របទិសគ្នា និងស៊ីញ៉ូបត់ឆ្វេងឆ្លងផ្លូវ ហើយក៏បុកពីក្រោយពេញទំហឹងតែម្ដង។
ខណៈនោះនៅមិនទាន់អស់ល្បឿនទៀត ម៉ូតូហុងដាឌ្រីមនេះបានរេចង្កូតចូលទៅចំណែកផ្លូវម្ខាងទៀតរួចក៏បានជ្រុលទៅបុករថយន្តម៉ាកឡិចស៊ីស RX-300 មួយតង់ទៀត បណ្ដាលឲ្យដួលម៉ូតូម៉ាកហុងដាឌ្រីម សេ១២៥ និងរងរបួសខ្លួនឯង។ ដោយឡែករថយន្តបានរងការខូចខាតបែកកង់មុខខាងឆ្វេង រីឯស្ត្រី២នាក់ម្ដាយ និងកូនដែលជិះម៉ូតូម៉ាកហុងដាគូបជ្រុងនោះមិនបានរងរបួសឡើយ ហើយក្រោយពេលកើតហេតុនគរបាលប៉ុស្ដិ៍កាកាប១បានចុះទៅកាន់ទីនោះ និងបានឲ្យភាគីទាំងនោះនិយាយសម្របសម្រួលគ្នាដើម្បីបញ្ចប់រឿងនៅនឹងកន្លែងនោះតែម្ដង៕
https://youtu.be/MqTaqaT_9B4
ចែករំលែកព័តមាននេះ