ខេត្តសៀមរាប ៖ ប៉ូលិសមូលដ្ឋានបានបញ្ជាក់ថា ជួងស្នែងក្របី ដែលជាវត្ថុមានតម្លៃនាំយកពីប្រទេសភូមា ដោយព្រះសង្ឃជនជាតិអូស្ត្រាលីយកមករក្សាទុកសម្រាប់ប្រើក្នុងវត្តព្រះឥន្ទកោសា ហៅវត្តកណ្តាល ដែលមានទីតាំងស្ថិតនៅក្នុងភូមិទ្រាំង សង្កាត់ស្លក្រាម ក្រុងសៀមរាប ត្រូវបានជនមិនស្គាល់មុខចូលលួចយកទៅបាត់នោះ សមត្ថកិច្ចកំពុងស្រាវជ្រាវស្វែងរកមុខសញ្ញា ដើម្បីចាប់ខ្លួនយកមកផ្តន្ទាទោសទៅតាមផ្លូវច្បាប់ ។
តាមប្រភពពីព្រះសង្ឃដែលគង់នៅវត្តឥន្ទកោសា ហៅវត្តកណ្តាលនោះបានមានសង្ឃដីកាថា ត្រូវបានអះអាងថា ជួងស្នែងក្របីដែលជារចនាឡើងដោយសារធាតុស្ពាន់លាយជាមួយប្រាក់សុទ្ធមកពីប្រទេសភូមា ហើយនាំយកមករក្សាទុកក្នុងវត្តព្រះឥន្ទកោសា ដែលមានទីតាំងស្ថិតនៅក្នុងភូមិទ្រាំង សង្កាត់ស្លក្រាម ក្រុងសៀមរាប កាលពីថ្ងៃទី២០ ខែវិច្ឆិកា ឆ្នាំ២០១៧ ។
តាមរយៈបកប្រែជាភាសារខ្មែរព្រះសង្ឃព្រះនាម ឆា លីគីម ព្រះជន្ម៧៥ព្រះវស្សា ជនជាតិអូស្ត្រាលី មានសង្ឃដីកាថា ជួងស្នែងក្របី ដែលជាវត្ថុមានតម្លៃនេះមានទំហ៊ំ០,៥ម៉ែត្រ កំពស់០,៣៥ម៉ែត្រ ទម្ងន់១៥គីឡូក្រាមត្រូវគេចូលមកលួចកាលពីយប់ថ្ងៃទី២៦ ខែមិថុនា ឆ្នាំ២០១៨ ។
ក្រោយពេលបាត់ លោកក្នុងវត្តបានទៅប្តឹងនគរបាលមូលដ្ឋានឱ្យជួយអន្តរាគមន៍ ដើម្បីស្វែងរកយកមកវិញផងដែរ ។ តែមកទប់ពេលនេះនៅមិនទាន់មានសញ្ញាណាមួយដែលរំពឹងថា ឃើញវិញនោះទេ ។ វត្ថុនេះទោះមិនដឹងថា នៅស្រុកខ្មែរមានតម្លៃឬយ៉ាងណា តែនៅប្រទេសភូមាវិញមានតម្លៃណាស់ ។ ព្រះសង្ឃមានសង្ឃដីកាបន្តថា ប្រសិនបើសមត្ថកិច្ចមិនអាចរកឃើញទេ រូបលោកនឹងព្យាយាមទៅកាន់ប្រទេសភូមាវិញ ដើម្បីស្វែងរកទិញមកប្រើប្រាស់ក្នុងវត្តនេះទៀត ។ ទោះថ្លៃបន្តិចក៏ដោយប្រសិនបើនៅភូមាអាចរកទិញបាន ។ តែលោកយល់ថា មិនអាចក្មេងលួចទៅលក់អេតចាយនោះទេ ខ្លាចក្រែងតែមានអ្នកចង់បាន ហើយជួលមនុស្សឱ្យចូលមកលួចទៅវិញ ព្រោះរបស់នេះទុកនៅផ្នែកខាងលើនៃព្រះវិហារវត្ត ដែលជាទីតាំងល្អមួយមិនមាននរណាដឹងឡើយ ក្រៅពីលោកសង្ឃដែលគង់នៅវត្តនេះ ។
ព្រះសង្ឃ ឆា លីគីមបានឱ្យដឹងទៀតថា លោកនិមន្តមកគង់នៅវត្តព្រះឥន្ទកោសា ហៅវត្តកណ្តាល នេះ៨ព្រះវស្សា(៨ឆ្នាំ)មកហើយ បំណងជួយផ្គត់ផ្គង់ព្រះសង្ឃដែលខ្វះខាត និងក្មេងកំព្រាក្នុងការរៀនសូត្រ ពេលនេះបានជួយជាបណ្តើរៗខ្លះហើយ ។ រូបលោកនឹងគង់នៅដើម្បីជួយជនទីទាល់រហូតអស់១ជីវិត នៅវត្តខាងលើនេះដោយមិនទៅប្រទេសខ្លួនវិញឡើយ ។
យ៉ាងណាព្រះសង្ឃជនជាតិអូស្ត្រាលីនៅតែសម្តែងការសោកស្តាយ ជួងស្នែងក្របីដែលបានបាត់ទៅហើយនោះ និងសុំឱ្យសមត្ថកិច្ចជួយរកមកវិញព្រោះថា ជារបស់កម្រ ហើយស្រុកខ្មែរមិនអាចមាន ។ ជុំវិញករណីខាងលើនេះដែរព្រះនាម តាត មហាទីព្រះចៅអធិការវត្តព្រះឥន្ទកោសា ហៅវត្តកណ្តាលពុំអាចសុំការបកស្រាយបានទេ ដោយព្រះអង្គនិមន្តចេញទៅក្រៅប្រទេសតាំងពីមុនពេលបាត់របស់នោះ ។
រីឯមន្ត្រីប៉ុស្តិ៍នគរបាលសង្កាត់ស្លក្រាម បានប្រាប់នៅរសៀលថ្ងៃទី០១ ខែកក្កដា ឆ្នាំ២០១៨នេះថា ចំពោះខាងសមត្ថកិច្ចមូលដ្ឋានរបស់លោកវិញបានទទួលបណ្តឹងពីព្រះសង្ឃរួចរាល់ហើយ ក៏ប៉ុន្តែកម្លាំងរបស់ប៉ុស្តិ៍ កំពុងសហការណ៍ជាមួយសមត្ថកិច្ចជំនាញនៃស្នងការនគរបាលខេត្ត ដើម្បីធ្វើការស្រាវជ្រាវរកមុខសញ្ញា ហើយពេលនេះនៅមិនទាន់មានតម្រុយទេ ប៉ុន្តែជនសង្ស័យនោះក៏មិនអាច និងគេចរួចពីសំណាញ់ច្បាប់ ឬការប្រម៉ាញ់របស់សមត្ថកិច្ចឡើយ ៕
ចែករំលែកព័តមាននេះ