រាជធានីភ្នំពេញ ៖ នៅប៉ុន្មានឆ្នាំចុងក្រោយនេះ វិស័យសំណង់កម្ពុជាទទួលបានកំណើនវិនិយោគកើនឡើងជាប់ៗគ្នា តាមរយៈសាងសង់គម្រោងដ៏មានសក្តានុពលធំៗចំនួន១២ប្រភេទ ដែលធ្វើឱ្យវិស័យនេះបន្ដរីកចម្រើនទៅមុខជាបន្តបន្ទាប់ ។ យោងតាមរបាយការណ៍ស្តីពីវឌ្ឍនភាពវិស័យសំណង់ របស់ក្រសួងដែនដី នគរូបនីយកម្ម…
រាជធានីភ្នំពេញ ៖ នៅប៉ុន្មានឆ្នាំចុងក្រោយនេះ វិស័យសំណង់កម្ពុជាទទួលបានកំណើនវិនិយោគកើនឡើងជាប់ៗគ្នា តាមរយៈសាងសង់គម្រោងដ៏មានសក្តានុពលធំៗចំនួន១២ប្រភេទ ដែលធ្វើឱ្យវិស័យនេះបន្ដរីកចម្រើនទៅមុខជាបន្តបន្ទាប់ ។
យោងតាមរបាយការណ៍ស្តីពីវឌ្ឍនភាពវិស័យសំណង់ របស់ក្រសួងដែនដី នគរូបនីយកម្ម និងសំណង់ បញ្ជាក់ថា ៖« ការវិនិយោគរយៈពេល៣ឆ្នាំចុងក្រោយនេះ ទាំងគម្រោង និងទុនវិនិយោគនៅក្នុងវិស័យសំណង់បានបន្តកើនឡើងជាលំដាប់ ។ ជាក់ស្តែង នៅឆ្នាំ២០១៥ មាន២.៣០៥គម្រោង ក្នុងតម្លៃទុនវិនិយោគប្រមាណ៣.៣៣៨លានដុល្លារ កើនឡើង៣៣,១៤% ធៀបនឹងឆ្នាំ២០១៤ ។ នៅឆ្នាំ២០១៦ មាន២.៦៣៥គម្រោង ក្នុងតម្លៃទុនវិនិយោគ៥.៥៦១លានដុល្លារ កើនឡើង៦៧,១៥% ធៀបនឹងឆ្នាំ២០១៥ ហើយនៅឆ្នាំ២០១៧កន្លងទៅនេះ មាន៣.៤១៨គម្រោង ក្នុងតម្លៃទុនវិនិយោគប្រមាណ៦.៧៩៨លានដុល្លារ កើនឡើង២១,៨៤% ធៀបនឹងឆ្នាំ២០១៦ » ។
របាយការណ៍សង្កត់ធ្ងន់ថា ៖« កំណើនដែលវិស័យសំណង់ទទួលបានកន្លងមកនេះ ភាគច្រើន គឺមកពីគម្រោងសំណង់ធំៗដូចជា អគារពាណិជ្ជកម្ម, សណ្ឋាគារ, រមណីយដ្ឋាន, ផ្សារទំនើប, អគារខ្ពស់ៗ, ទីក្រុងរណប, បុរីលំនៅឋាន, រោងចក្រផលិតគ្រឿងអេឡិចត្រូនិក, រោងចក្រកាត់ដេរសម្លៀកបំពាក់ និងស្បែកជើង, រោងចក្រកិនស្រូវ និងតំបន់សេដ្ឋកិច្ចពិសេស » ។
លោក គុយ វាត អ្នកជំនាញក្នុងវិស័យអចលនទ្រព្យកម្ពុជា បានមានប្រសាសន៍ថា ៖«ខ្ញុំមើលឃើញវិស័យអចលនទ្រព្យមានលំហូរចូលអ្នកវិនិយោគច្រើនណាស់ ហើយអ្នកវិនិយោគចូលមកលើកដំបូង គឺគេចង់ឃើញព័ត៌មានជាទូទៅពីវិស័យអចលនទ្រព្យ ។ អីចឹង ខ្ញុំគិតថា ការវិភាគ និងការស្រាវជ្រាវទៅលើវិស័យមួយនេះ យើងដាក់ចេញជាព័ត៌មាននេះ គឺបានចូលរួមចំណែកយ៉ាងខ្លាំង ហើយទាក់ទាញអ្នកវិនិយោគបរទេសបានច្រើនថែមទៀត » ។
លោកសង្កត់ធ្ងន់ថា ៖« ខ្ញុំសង្ឃឹមថា អ្នកទាំងអស់គ្នាដែលនៅក្នុងវិស័យមួយនេះ នឹងបន្តជួយគាំទ្រទាំងអស់គ្នា ។ នាពេលថ្មីៗនេះ វិស័យអចលនទ្រព្យមានកំដៅមែនទែន ហើយបើយើងរៀបចំអត់បានល្អទេ កំដៅនេះអាចបានត្រឹមតែ១ឬ២ឆ្នាំ តែនៅឆ្នាំទី៣ឬទី៤ កំដៅនេះអាចនឹងធ្លាក់ចុះមកវិញ ។ ដើម្បីជំរុញវិស័យអចលនទ្រព្យបាន ខ្ញុំគិតថា ព័ត៌មាន គឺជាផ្នែកមួយសំខាន់ » ។
លោក ឡៅ ទិព្វសីហា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា ៖« នៅឆ្នាំ២០១៨នេះ ខ្ញុំសង្ឃឹមថា វិស័យសំណង់កម្ពុជានៅតែដំណើរការបានល្អ ។ តាមការស្រង់ទិន្នន័យពីនាយកដ្ឋានសំណង់ ក៏បញ្ជាក់ច្បាស់ដែរថា នៅមានគម្រោងធំៗជាច្រើនដែលក្រសួង និងមន្ទីររាជធានី-ខេត្ត កំពុងតែពិនិត្យនៅតាមសាលាក្រុងស្រុក ខណ្ឌ ដែលទទួលបានប្រតិភូកម្មអំណាច នៅមានគម្រោងប្លង់ កំពុងពិនិត្យគម្រោងស្នើសុំអាជ្ញាប័ណ្ណសាងសង់អគារធំៗ និងសំណង់លំនៅឋានប្រជាពលរដ្ឋផងដែរ ។ ដូចនេះ ខ្ញុំនៅតែមានសង្ឃឹមដដែល » ។
លោកបន្តថា ៖« នៅឆ្នាំ២០១៨នេះ ខ្ញុំមើលឃើញគម្រោងធំៗជាច្រើនទៀតដែលត្រូវសាងសង់នៅទីក្រុងភ្នំពេញ និងខេត្តព្រះសីហនុ ។ ខ្ញុំមានសុទិដ្ឋិនិយមខ្ពស់ទៅលើការវិនិយោគវិស័យសំណង់អគារនៅកម្ពុជា ពីព្រោះការផ្គត់ផ្គង់លំនៅឋាន គឺនៅតែមានតម្រូវការ ហើយតម្រូវការអគារការិយាល័យក៏នៅតែមានដែរ ព្រោះកំណើនប្រជាជនកើនឡើង ហើយភ្ញៀវបរទេសកាន់តែចូលមកច្រើន ។ ដូច្នេះ ការស្នាក់នៅ គឺនៅតែមានតម្រូវការដដែល » ។
យោងតាមក្របខ័ណ្ឌគោលនយោបាយម៉ាក្រូសេដ្ឋកិច្ច បង្ហាញថា វិស័យសំណង់ នឹងអត្រាកំណើនប្រមាណ១៦,៧%ក្នុងឆ្នាំ២០១៨ និង១៦,៩%ក្នុងឆ្នាំ២០១៩ ដែលឆ្លុះបញ្ចាំងតាមរយៈការបន្តងាកទៅរកប្រភេទគម្រោងសំណង់ថ្លៃទាប និងមធ្យម ។ ភាពរឹងមាំនៃវិស័យនេះត្រូវបានបន្តគាំទ្រដោយការអនុវត្តគម្រោងអភិវឌ្ឍន៍លំនៅឋានតម្លៃសមរម្យ, ការប្តេជ្ញាចិត្តរបស់រាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធរូបវន្ត និងភាពជឿជាក់ចំពោះការវិនិយោគ ដោយសារភាពរឹងមាំនៃកំណើនសេដ្ឋកិច្ចកម្ពុជា ទោះជាមានឥរិយាបថប្រុងប្រយ័ត្នពីសំណាក់វិនិយោគិនមួយចំនួនក្នុងឆ្នាំ២០១៨ ដែលជាឆ្នាំបោះឆ្នោតក៏ដោយ ៕
ចែករំលែកព័តមាននេះ