ខេត្តកំពង់ធំ ៖ លោកញ៉ែម ថាវី អ្នកតំណាងរាស្ត្រមណ្ឌលកំពង់ធំបានដឹកនាំអតីតសិស្ស អនុវិទ្យាបារាយមួយចំនួនយកសម្ភារទៅប្រគល់ជូនលោកគ្រូ -អ្នកគ្រូនៅសាលាខ្មែរអង់គ្លេសសហគមន៍ជីនិត ។ ការប្រគល់សម្ភារនេះធ្វើឡើងនៅព្រឹកថ្ងៃទី៣០ ខែមិថុនា…
ខេត្តកំពង់ធំ ៖ លោកញ៉ែម ថាវី អ្នកតំណាងរាស្ត្រមណ្ឌលកំពង់ធំបានដឹកនាំអតីតសិស្ស អនុវិទ្យាបារាយមួយចំនួនយកសម្ភារទៅប្រគល់ជូនលោកគ្រូ -អ្នកគ្រូនៅសាលាខ្មែរអង់គ្លេសសហគមន៍ជីនិត ។ ការប្រគល់សម្ភារនេះធ្វើឡើងនៅព្រឹកថ្ងៃទី៣០ ខែមិថុនា ឆ្នាំ២០១៨ នៅសាលាខ្មែរអង់គ្លេសហគមន៍ជីនិត ដែលមានទីតាំងនៅភូមិបឹង សំរិត ឃុំបាល័ង្គ ស្រុកបារាយ ខេត្តកំពង់ធំ ដោយមានការចូលរួមប្រគល់ដោយ លោក ញែម ថាវី អ្នកតំណាងរាស្ត្រខេត្តកំពង់ធំ និងអតីតសិស្ស អនុវិទ្យាល័យបារាយព្រមទាំងលោកគ្រូ-អ្នកគ្រូសិស្សានុសិស្សអាណាព្យាបាលសិស្សមួយចំនួន ។
លោកប៉េង ឃាង ជាអតីតសិស្សអនុវិទ្យាល័យបារាយបានឱ្យដឹងថា ជាច្រើនលើកមកហើយ ដែលអតីតសិស្សអនុវិទ្យាល័យបារាយបានយកចិត្តទុកដាក់គិតគូពីសុខទុក្ខសិស្សជំនាន់ក្រោយ និងបានរួមគ្នាជួយឧបត្ថម្ភដល់សាលាសហគមន៍ជីនិតក៏ដូចជា សាលារៀនផ្សេងៗទៀតក្នុងស្រុកបារាយជាការលើកទឹកចិត្តឲ្យក្មួយៗខិតខំរៀនសូត្រ ដើម្បីជាទំពាំងស្នងឫស្សីទៅថ្ងៃក្រោយ ។
លោក ប៉េងឃាងបានបន្តថា សាលាខ្មែរអង់គ្លេសសហគមន៍ជីនិតនេះបានកសាងឡើងក្នុងឆ្នាំ២០១៧ ហើយចាប់ដំណើរការឱ្យសិស្សចូលរៀនរហូតមកដល់បច្ចុប្បន្នដែល១ខ្នងមាន ៣២បន្ទប់ សម្រាប់សិស្សចូលរៀន២៤បន្ទប់ រួមនឹងការិយាល័យបណ្ណាគារទីចាត់ការផងដែរ ។ ក្នុងការកសាងលោក ញ៉ែមថាវី អ្នកតំណាងរាស្ត្រកំពង់ធំដែលជាអ្នកផ្តួចផ្តើម និងចំណាយថវិកាផ្ទាល់ខ្លួនកសាងសាលាសហគមន៍នេះឡើងក្នុងគោលបំណងតបស្នងសងគុណដល់អ្នកដ៏មានគុណរបស់លោក គឺលោក ឌិត តាល់ និងលោកស្រី ឥ្យ បុប្ផាអតីតអ្នកតំណាងរាស្ត្រមណ្ឌលឈូកខេត្តកំពតដែលបានថែរក្សាបីបាច់ចិញ្ចឹមលោកតាំងពីតូចរហូតមានថ្ងៃនេះ ម្យ៉ាងទៀត គឺដើម្បីសិស្សានុសិស្សបានរៀនសូត្របណ្តុះបណ្តាលចំណេះដឹងទុកជាទុនសម្រាប់បន្តវេនអភិវឌ្ឍប្រទេសជាតិទៅថ្ងៃអនាគត ។
លោកបន្តថា សាលាខ្មែរ អង់គ្លេសសហគមន៍ជីនិតនេះ គឺចាប់ទទួលសិស្សចាប់ពីថ្នាក់ទី៤ឡើងទៅ ទើបចូលរៀនបាន ហើយចាប់ពីថ្ងៃសម្ពោធឱ្យដំណើរការរហូតមកដល់ពេលនេះ មានសិស្សចូលរៀនបាន៣បន្ទប់មានចំនួនសិស្សសរុប៦៧នាក់ ។
លោកក៏បានអំពាវនាវឱ្យអតីតសិស្សនៅសាលាផ្សេងៗក៏ដូចជា សប្បុរសជននានាដែលមានធនធានសូមជួយឧបត្ថម្ភគាំទ្រជាថវិកាក៏ដូចជា សម្ភារដល់សាលានេះបន្តទៀតផង ។ អំណោយរបស់អតីតសិស្សអនុវិទ្យាល័យដែលប្រគល់ជូនសាលានាឱកាសនោះមាន ទូរទស្សន៍ចំនួន៣គ្រឿង អំពូល សឡាចំនួន៤ ចំណែកលោកប៉េងឃាង បានប្រគល់បង់ សម្រាប់អង្គុយលេងចំនួន៤កប្លែ ដែលជាថវិកាផ្ទាល់ខ្លួនរបស់លោកផងដែរ ។ បន្ទាប់ពីប្រគល់អំណោយក៏មានពិសាអាហារសាមគ្គីជាមួយលោកគ្រូ-អ្នកគ្រូ និងសិស្សានុសិស្សអាណាព្យាបាលសិស្សក្នុងបរិយាកាសស្និទ្ធស្នាលសប្បាយរីករាយក្រៃលែងផងដែរ ៕
ចែករំលែកព័តមាននេះ