ខេត្តត្បូងឃ្មុំ៖ លំនៅឋានរបស់ខ្មែរអ៊ិស្លាមសាងសង់អំពីឈើប្រក់ក្បឿង មានទំហំ៧ម៉ែត្រគុណនឹង៨ម៉ែត្រស្ថិតនៅភូមិកៀនរមៀត ឃុំស្រឡប់ ស្រុកត្បូងឃ្មុំ ត្រូវបានអគ្គីភ័យឆាបឆេះយ៉ាងសន្ធោរសន្ធៅ កាលពីវេលាម៉ោង១១និង៣០នាទីព្រឹក ថ្ងៃទី៣០ មិថុនា ២០១៨…
ខេត្តត្បូងឃ្មុំ៖ លំនៅឋានរបស់ខ្មែរអ៊ិស្លាមសាងសង់អំពីឈើប្រក់ក្បឿង មានទំហំ៧ម៉ែត្រគុណនឹង៨ម៉ែត្រស្ថិតនៅភូមិកៀនរមៀត ឃុំស្រឡប់ ស្រុកត្បូងឃ្មុំ ត្រូវបានអគ្គីភ័យឆាបឆេះយ៉ាងសន្ធោរសន្ធៅ កាលពីវេលាម៉ោង១១និង៣០នាទីព្រឹក ថ្ងៃទី៣០ មិថុនា ២០១៨ ត្រូវបានរថយន្តពន្លត់អគ្គីភ័យរបស់អធិការដ្ឋាននគរបាលស្រុកត្បូងឃ្មុំ ចេញទៅជួយអន្តរាគមន៍បាញ់ទឹកពន្លត់អស់២រថយន្ត ហើយតាមការស្រាវជ្រាវមូលហេតុនៃការឆេះនេះដោយសារតែបុរសជាម្ចាស់ផ្ទះដែលបែកថ្នាំញៀនគឺអ្នកដុតបំផ្លាញ។
លោកវរៈសេនីយ៍ឯក សួស ស៊ាងលី អធិការនគរបាលស្រុកត្បូងឃ្មុំ បានឱ្យដឹងថា ផ្ទះដែលត្រូវអគ្គីភ័យឆាបឆេះនោះមានម្ចាស់ឈ្មោះលី រ៉ន អាយុ៣៨ឆ្នាំ ជាប្តី និងប្រពន្ធឈ្មោះកៅ ណាស់ អាយុ៣៩ឆ្នាំ ក្នុងពេលដែលមានអគ្គីភ័យកើតឡើង ស្ត្រីជាប្រពន្ធមិនបាននៅផ្ទះទេ ដោយបានដើរទៅលេងនៅផ្ទះអ្នកជិតខាងបាត់ ។ លោកអធិការនគរបាលស្រុកត្បូងឃ្មុំបានបន្តថា បន្ទាប់មកស្រាប់តែផ្ទះខាងលើត្រូវបានភ្លើងឆាបឆេះ ដោយមានអណ្តាតភ្លើងឡើងក្រហមច្រាលតែម្តង ហើយបង្កឲ្យមានការភ្ញាក់ផ្អើលដល់អ្នកជិតខាងនាំគ្នាដងទឹកមកជះពន្លត់ និងបានសុំអន្តរាគមន៏រថយន្តពន្លត់អគ្គីភ័យរបស់អធិការដ្ឋាននគរបាលស្រុកត្បូងឃ្មុំដើម្បីជួយបាញ់ទឹកពន្លត់ ។ ដោយសារតែផ្លូវឆ្ងាយផងនោះទំរាំតែរថយន្តពន្លត់អគ្គិភ័យបានមកដល់ ផ្ទះខាងលើបានឆេះយ៉ាងពេញបន្ទុកទៅហើយ តែទោះបីជាយ៉ាងណាក៏ការជួយរបស់សមត្ថកិច្ចបានប្រឹងបាញ់ទឹកទៅលើផ្ទះដែលកំពុងឆេះនោះមិនឲ្យឆេះរាលដាលឆ្លងទៅផ្ទះរបស់អ្នកជិតខាង ។ ចំពោះសំភារៈដែលបានបាត់បង់ក្នុងនោះមាន ថវិកា១លាន៣០ម៉ឺនរៀល មាសខ្សែក និងក្រវិលទង្ងន់៤ជី ស្រូវ២ស្បោងធំ ព្រមទាំងសំភារៈផ្សេងៗមួយចំនួនទៀតផងដែរ ។ លុះដល់ពេលរសៀល សមត្ថកិច្ចបានស្រាវជ្រាវដឹងថា មូលហេតុដែលបណ្តាលឱ្យមានអគ្គីភ័យឆាបឆេះផ្ទះខាងលើនេះគឺដោយសារតែបុរសម្ចាស់ផ្ទះជាអ្នកដុតបំផ្លាញ ហើយសមត្ថកិច្ចបានឃាត់ខ្លួនបុរសជាម្ចាស់ផ្ទះនោះតែម្តង ។
លោកវរៈសេនីយ៍ឯក សួស ស៊ាងលី អធិការនគរបាលស្រុកត្បូងឃ្មុំបានបញ្ជាក់ថា មុនកើតហេតុ បុសឈ្មោះលី រ៉ន បានសុំលុយប្រពន្ធថាទៅទិញគោ តែបែរជាទៅទិញថ្នាំញៀនមកជក់ទៅវិញ ហើយបុរស
នេះជាមនុស្សសរសៃប្រសាទដោយសារគ្រឿងញៀនផងដែរ ។ បន្ទាប់ពីកើតហេតុ ស្ត្រីជាប្រពន្ធក៏បានប្តឹងឲ្យសមត្ថកិច្ចចាត់វិធានការទៅតាមផ្លូវច្បាប់លើប្តីរបស់គាត់ ព្រោះថាបើលែងមកវិញខ្លាចបង្កហិង្សាញឹកញាប់ក្នុងក្រុមគ្រួសារ ហើយសមត្ថកិច្ចបានបញ្ជូនបុរសជាប្តីខាងលើទៅឲ្យអយ្យការអមសាលាដំបូងខេត្តនារសៀលថ្ងៃទី១ កក្កដានេះហើយ៕
ចែករំលែកព័តមាននេះ