ខេត្តបន្ទាយមានជ័យ ៖ «យុវជនអប់រំផ្តាច់សារធាតុញៀនមណ្ឌលជីវិតថ្មីភ្នំបាក់ត្រូវចេះកែខ្លួនដើម្បីអនាគតខ្លួនឯង គ្រួសារ និងសង្គម» ប្រធានសាខាកាកបាទក្រហមកម្ពុជាខេត្តបានផ្តាំផ្ញើនៅពេលនាំយកអំណោយចែកជូនកាលថ្ងៃទី២៩ ខែមិថុនា ឆ្នាំ២០១៨ នៅ មណ្ឌលជីវិតថ្មីភ្នំបាក់…
ខេត្តបន្ទាយមានជ័យ ៖ «យុវជនអប់រំផ្តាច់សារធាតុញៀនមណ្ឌលជីវិតថ្មីភ្នំបាក់ត្រូវចេះកែខ្លួនដើម្បីអនាគតខ្លួនឯង គ្រួសារ និងសង្គម» ប្រធានសាខាកាកបាទក្រហមកម្ពុជាខេត្តបានផ្តាំផ្ញើនៅពេលនាំយកអំណោយចែកជូនកាលថ្ងៃទី២៩ ខែមិថុនា ឆ្នាំ២០១៨ នៅ មណ្ឌលជីវិតថ្មីភ្នំបាក់ ក្រុងសិរីសោភ័ណ ខេត្តបន្ទាយមានជ័យ។
លោក លី សារី ប្រធានសាខាកាកបាទក្រហម ខេត្តបន្ទាយមានជ័យបានមានប្រសាសន៍ថា ដោយមានការយកចិត្តទុកដាក់ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ហើយសាខាកាកបាទក្រហមខេត្តបន្ទាយមានជ័យបានដឹកនាំសមាជិកនាំយកអំណោយប្រគល់ជូនមណ្ឌលជីវិតថ្មីភ្នំបាក់ក្រុងសិរីសោភ័ណរួមមាន អង្ករ១តោន ធុងស្តុបទឹក១,០០០លីត្រ ចំនួន១ធុង សាច់ជ្រូក១ក្បាលទំងន់១០០គីឡូក្រាម ទឹកក្រូច៦០ដប មីថៃ១០កេស ទឹកត្រី និងទឹកស៊ីអ៊ីវ១០យួរ ប្រេងឆារ៥ដប ត្រីខ៥យួរ។
លោកបានផ្តាំផ្ញើដល់យុវជនដែលជាប់សារធាតុញៀនមានចំនួន៥៣១នាក់ ស្រី៣៣នាក់ដែលកំពុងអប់រំបន្សាបសារធាតុញៀននៅមណ្ឌលជីវិតថ្មីភ្នំបាក់ត្រូវខិតខំទទួលការបន្សាប និងអប់រំកែខ្លួនក្រោយពេលអប់រំបាន ហើយត្រឡប់ទៅមូលដ្ឋានវិញកែខ្លួនអោយក្លាយជាមនុស្សល្អ ដើម្បីអនាគតខ្លួនឯង និងគ្រួសារនាពេលអនាគត។
ក្នុងនាមយុវជនដែលកំពុងទទួលការបន្សាបនិងអប់រំក្នុងមណ្ឌលជីវិតថ្មីភ្នំបាក់ក្រុងសិរីសោភ័ណ សូមថ្លែងអំណរគុណចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាដែលបានការយកចិត្តទុកដាក់ចំពោះកូនចៅ ហើយក្រុមយុវជនទាំងអស់ប្តេជ្ញាចិត្តថា ខិតខំកែខ្លួនឱ្យក្លាយជាមនុស្សល្អ ដើម្បីអនាគតខ្លួនឯង និងគ្រួសារ ហើយពេលចេញទៅវិញនឹងចូលរួមអប់រំណែនាំមិត្តភក្តិដែលដើរផ្លូវខុសត្រូវចៀសអោយឆ្ងាយពីគ្រឿងញៀន ហើយយើងទាំងអស់គ្នាត្រូវឆ្លើយថាទេចំពោះគ្រឿងញៀន៕
ចែករំលែកព័តមាននេះ