ប្រទេសថៃ ៖ រហូតមកពេលនេះទឹកក្នុងរូងភ្នំចាប់ផ្តើមស្រកចុះបានច្រើនហើយ ដោយសារការខិតខំប្រឹងប្រែងបូម ហើយភ្លៀងផ្អាកធ្លាក់ និងពួកអ្នកជួយសង្គ្រោះដែលប្រមូលផ្ដុំគ្នាចាប់តាំងពី៨ថ្ងៃមកហើយ នាថ្ងៃទី៣០ មិថុនា បានចូលដល់គៀកតំបន់ដែលសន្មត់ថា កុមារ១២នាក់…
ប្រទេសថៃ ៖ រហូតមកពេលនេះទឹកក្នុងរូងភ្នំចាប់ផ្តើមស្រកចុះបានច្រើនហើយ ដោយសារការខិតខំប្រឹងប្រែងបូម ហើយភ្លៀងផ្អាកធ្លាក់ និងពួកអ្នកជួយសង្គ្រោះដែលប្រមូលផ្ដុំគ្នាចាប់តាំងពី៨ថ្ងៃមកហើយ នាថ្ងៃទី៣០ មិថុនា បានចូលដល់គៀកតំបន់ដែលសន្មត់ថា កុមារ១២នាក់ និងគ្រូបង្ហាត់បាល់ទាត់ពួកគេជាប់ក្នុងរូងភ្នំទឹកជន់លិច រត់ទៅជ្រក។
អភិបាលខេត្តឈៀងរ៉ៃ លោក NARONGSAK OSOTTANAKORN និយាយថា ពួកអ្នកមុជទឹកពេលនេះស្ថិតនៅចម្ងាយប្រមាណ២គីឡូម៉ែត្រពីកន្លែងសន្មត់ថា ពួកគេរត់ទៅជ្រក ហើយយើងអាចចូលដល់ទីនោះនាថ្ងៃទី៣ កក្កដា ។ សភាពការណ៍ពេលនេះ ប្រសើរជាងពេលមុន ទឹកចាប់ស្រកចុះច្រើន ដោយសារការបូម និងភ្លៀងបានផ្អាកធ្លាក់។
ទោះបីយ៉ាងណាគេនៅពុំទាន់មានការទាក់ទងណាមួយ ជាមួយក្មេងទាំងនោះ និងគ្រូបង្ហាត់បាល់ទាត់ពួកគេដែលជាប់ក្នុងរូងភ្នំថាមលួង ស្ថិតនៅក្បែរព្រំដែនមីយ៉ាន់ម៉ា និងឡាវ ចាប់ពីថ្ងៃទី២៣ មិថុនា មកនៅឡើយទេ។ រីឯប្រអប់ស្បៀងទាំងឡាយ ព្រមទាំងទូរស័ព្ទដៃ ត្រូវបានទម្លាក់មុននេះ ចូលក្នុងរូងភ្នំពីប្រហោងត្រង់មួយនៃរូងភ្នំ ស្ថិតនៅមិនឆ្ងាយប៉ុន្មានពីកន្លែងដែលពួកអ្នកសង្គ្រោះសង្ឃឹមថា ពួកគេជ្រកនៅទីនោះ។
ម្យ៉ាងទៀតពួកអ្នកជួយសង្គ្រោះបានធ្វើសមយុទ្ធ ត្រាប់ ដូចការជម្លៀសពួកក្មេងៗចេញពីរូងភ្នំ។ ដោយសារតែបែបនេះហើយ បាននាំឲ្យអ្នកលេងតាមបណ្ដាញសង្គមមួយចំនួនច្រឡំថា រកពួកគេឃើញហើយ ប៉ុន្តែនោះជាការត្រៀមទុកសម្រាប់ពេលមានការទាក់ទងជាមួយពួកអ្នកបាត់ខ្លួនតែប៉ុណ្ណោះ។ ចំណែកព្រះសង្ឃនៅបន្តសូត្រធម៌បន់ស្រន់ សូមឲ្យរកពួកគេឃើញនៅរស់រានមានជីវិត។
លោកអភិបាលខេត្តឈៀងរ៉ៃ បាននិយាយថា ក្រោយរយៈពេលជាងមួយសប្ដាហ៍ស្ថិតក្នុងទីងងឹតនៃរូងភ្នំ មនុស្សជាប់ក្នុងនេះអាចមានបញ្ហាភ្នែក និងសួត ដូច្នេះការនាំពួកគេចេញពេលតាមរកឃើញ ត្រូវធ្វើដោយប្រុងប្រយ័ត្ន។ លោកបន្តថា នេះជាសមយុទ្ធ សូមកុំមានការភ្ញាក់ផ្អើល។ យើងសមទុកបើរកឃើញពួកគេត្រូវនាំចេញ ហើយបញ្ជូនតាមឧទ្ធម្ភាគចក្រទៅមន្ទីរពេទ្យបែបណា។ មន្ទីរពេទ្យជាច្រើនក្នុងតំបន់ចូលរួមក្នុងសមយុទ្ធនេះ ឆ្លៀតពេលភ្លៀងផ្អាកធ្លាក់។
លោក ANMAR MIRZA អ្នកជំនាញការអាមេរិកម្នាក់នៃប្រតិបត្តិការជួយសង្គ្រោះក្រោមដី បាននិយាយថា ក្មេងទាំងនេះផឹកទឹកក្នុងរូងភ្នំ ពួកគេអាចធន់បានច្រើនសប្ដាហ៍ ដោយគ្មានស្បៀងបាន។ ពួកគេសុទ្ធតែជាកីឡាករមានសុខភាពរឹងមាំ ដូច្នេះពួកគេអាចស៊ូទ្រាំរស់បានដល់មួយខែ ប៉ុន្តែបញ្ហាដែលសំខាន់នោះ គឺស្ថិតត្រង់ថា ពេលណាទើបពួកអ្នកជួយសង្គ្រោះរកឃើញពួកគេ៕
ចែករំលែកព័តមាននេះ