ខេត្តកណ្ដាល ៖ បុរសម្នាក់ត្រូវនគរបាលស្រុកពញាឮ ចាប់ខ្លួន បន្ទាប់ពីបានធ្វើសកម្មភាពចាប់រំលោភនារីក្រមុំម្នាក់មិនសម្រេចក្នុងព្រៃ ហេតុការណ៍កើតឡើងកាលពីម៉ោង៧និង៣០នាទីព្រឹក ថ្ងៃទី៣០ ខែមិថុនា ឆ្នាំ២០១៨ នៅចំណុចក្នុងព្រៃខាងក្រោយភូមិពាមល្វែក…
ខេត្តកណ្ដាល ៖ បុរសម្នាក់ត្រូវនគរបាលស្រុកពញាឮ ចាប់ខ្លួន បន្ទាប់ពីបានធ្វើសកម្មភាពចាប់រំលោភនារីក្រមុំម្នាក់មិនសម្រេចក្នុងព្រៃ ហេតុការណ៍កើតឡើងកាលពីម៉ោង៧និង៣០នាទីព្រឹក ថ្ងៃទី៣០ ខែមិថុនា ឆ្នាំ២០១៨ នៅចំណុចក្នុងព្រៃខាងក្រោយភូមិពាមល្វែក ឃុំកំពង់លួង ស្រុកពញាឮ ។
មន្ត្រីនគរបាលស្រុកពញាឮឱ្យដឹងថា ជនសង្ស័យខាងលើឈ្មោះ សរ ទែល ភេទប្រុស អាយុ៤៨ឆ្នាំ មុខរបរកសិករ រស់នៅភូមិពាមល្វែក ឃុំកំពង់លួង ស្រុកពញាឮ ខេត្តកណ្តាល ចំណែកនារីរងគ្រោះអាយុ២៨ឆ្នាំ មុខរបរកសិករ។
នគរបាលបានឱ្យដឹងបន្ថែមថា មុនកើតហេតុ ជនរងគ្រោះ និងជនសង្ស័យបានដើរទៅរកដកផ្សិតក៏ជួបគ្នានៅក្នុងព្រៃខាងក្រោយភូមិ ពេលនោះជនរងគ្រោះដើររកដកផ្សិត រីឯជនសង្ស័យក៏ដើររកជិតគ្នា លុះមួយសន្ទុះជនសង្ស័យក៏ស្រែកហៅរកជនរងគ្រោះ ជនរងគ្រោះឆ្លើយតបថា ខ្ញុំនៅដកឯណោះ ។ បន្ទាប់មកជនសង្ស័យបានដើរទៅរកជនរងគ្រោះ ភ្លាមនោះជនសង្ស័យក៏សុំមើលថង់ដាក់ផ្សិតរបស់ជនរងគ្រោះ ឆ្លៀតឱកាសជនសង្ស័យបានចាប់ផ្តួលជនរងគ្រោះឱ្យដួលនឹងដី ហើយឡើងទ្រោបពីលើរួចចាប់អោបថើប និងយកដៃចាប់ច្របាច់សុដន់ និងប្រដាប់ភេទរបស់ជនរងគ្រោះ។
នគរបាលបានបន្តទៀតថា ពេលនោះដែរជនរងគ្រោះក៏ខំប្រឹងរើបំរាស់ រួចច្រានជនសង្ស័យចេញបណ្តាលឱ្យដួល រួចក៏រត់ពីក្នុងព្រៃមកផ្ទះរបស់ខ្លួនវិញ។ ពេលមកដល់ផ្ទះភ្លាមជនរងគ្រោះបាននិយាយពីរឿងហេតុខាងលើប្រាប់ម្តាយនាង ហើយម្តាយក៏នាំជនរងគ្រោះទៅប្តឹងលោកមេភូមិ រួចរាយការណ៍មកនគរបាលប៉ុស្តិ៍កំពង់លួង ។ ក្រោយមកកម្លាំងប៉ុស្តិ៍បានចុះដល់កន្លែងកើតហេតុ រួចឃាត់ខ្លួនជនសង្ស័យបញ្ជូនមកកាន់អធិការដ្ឋាននគរបាលស្រុក ដើម្បីសាកសួរ និងកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ