ខេត្តស្ទឹងត្រែង ៖ ក្រុមអ្នកប្រកបរបរលក់សត្វព្រៃលើទីផ្សាររត់ជាន់គេជាន់ឯងទាំងព្រលឹងចុងសក់ នៅគ្រាឃើញអ្នកប្រមាញ់បទល្មើសសត្វព្រៃចល័ត កាលពីព្រឹកថ្ងៃទី២៩ មិថុនា ២០១៨ នៅលើទីផ្សារសាមគ្គីស្ទឹងត្រែង ។
ប្រភពព័ត៌មានពីអាជីវករលក់ដូរក្បែរទីតាំងលក់សត្វព្រៃនីមួយៗថា ក្រុមអ្នកប្រកបរបរលក់សត្វព្រៃមានទាំងមនុស្សស្រី និងមនុស្សប្រុសបានរត់ចោលកន្លែងលក់ដូរ ខណៈស្ត្រីជនជាតិខ្មែរឥស្លាមលក់សាច់គោម្នាក់ស្រែកផ្អើលឡើងគ្រាឃើញកងកម្លាំងអន្តរាគមន៍ចល័តបង្ក្រាបបទល្មើសជួញដូរសត្វព្រៃតម្រង់ទៅក្រុមអ្នកលក់សត្វព្រៃ ប៉ុន្តែយ៉ាងណាមិនបានចាប់ខ្លួននណាម្នាក់បានឡើយ ក្រៅពីការរឹបអូសសាច់សត្វព្រៃស្រស់ សត្វព្រៃនៅរស់ សាច់ក្រៀម និងសម្ភារ ។
មន្ត្រីខណ្ឌរដ្ឋបាលព្រៃឈើខេត្តស្ទឹងត្រែងបានឲ្យដឹងថា ការចុះបង្ក្រាបរបស់កម្លាំងអន្តរាគមន៍ចល័តដែលធ្វើឡើងខាងលើ គឺមិនបានជូនដំណឹងដល់ថ្នាក់មូលដ្ឋាននោះឡើយ ដោយសារគិតថា មិនអាចជោគជ័យលើការបង្ក្រាប ។ តែក្រុមអន្តរាគមន៍ចល័តបង្ក្រាបបទល្មើសជួញដូរសត្វព្រៃបានអញ្ជើញមន្ត្រីថ្នាក់មូលដ្ឋាន ដើម្បីចូលរួមធ្វើកំណត់ហេតុចាប់យក និងប្រគល់តួនាទីមកខណ្ឌរដ្ឋបានព្រៃឈើ ដើម្បីធ្វើការកម្ទេចចោល ។
មានមតិមួយចំនួនបានលើកឡើង ក្រោយការបង្ក្រាបរឹបអូសសត្វព្រៃនៅលើទីផ្សារនោះ បន្ទាប់គេសង្កេតឃើញរយៈតែជាង២ម៉ោងប៉ុណ្ណោះសាច់សត្វព្រៃទាំងនោះប្រែជះក្លិនដ៏ស្អុយសាយភាយចេញពីសាច់ និងចោមរោមដោយសត្វរុយ ។ តែសម្រាប់ការដាក់តាំងលក់នៅលើទីផ្សារវិញទោះបីទុករហូតទល់វេលាល្ងាចក៏មិនប្រែក្លិននោះដែរ តើមានអ្វីដែលអាចរក្សាសាច់សត្វព្រៃទាំងនោះរក្សាភាពស្រស់ និងគ្មានក្លិនស្អុយ ? ។
សត្វព្រៃដែលកម្លាំងក្រុមអន្តរាគមន៍ចល័តបង្ក្រាបបទល្មើសជួញដូរសត្វព្រៃលើទីផ្សារឯណេះវិញ គឺបានរឹបអូសសាច់ព្រៃស្រស់៨១គីឡូក្រាម និងសត្វព្រៃរស់មានចំនួន៨,១០គីឡូក្រាមផ្សេងក្នុងរួមមាន សាច់ជ្រូកព្រៃស្រស់៥២,៥០គីឡូក្រាម សាច់ប្រើសស្រស់២៣,៥០គីឡូក្រាម ងៀតសាច់ជ្រូកព្រៃ៥គីឡូក្រាម ។ ចំណែកសត្វរស់មានអណ្តើកស្រែ១ក្បាល អណ្តើកបិទមុខ ២ក្បាល និងអណ្តើកភ្នំ៧ក្បាល ៕
ចែករំលែកព័តមាននេះ