ខេត្តសៀមរាប ៖ លោក បណ្ឌិត ឃឹម ប៊ុនសុង សមាជិកគណៈកម្មាធិការកណ្តាល និងប្រធានគណៈកម្មាធិការនៃគណបក្សប្រជាជនកម្ពុជាខេត្ត និងជាប្រធានក្រុមការងារចុះជួយក្រុងសៀមរាបនាថ្ងៃទី៣០ ខែមិថុនា ឆ្នាំ២០១៨ បានចុះសួរសុខទុក្ខ និងជួបសំណេះសំណាលជាមួយប្រជាពលរដ្ឋប្រមាណ១ពាន់១២០នាក់ ក្នុងសង្កាត់គោកចកក្រុង-ខេត្តសៀមរាប និង អំពាវនាវឱ្យប្រជាពលរដ្ឋដែលគ្រប់អាយុបោះឆ្នោតមានឈ្មោះក្នុងបញ្ជីឈ្មោះបោះឆ្នោត សូមអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះឲ្យបានគ្រប់ៗគ្នា ។
បន្ទាប់ពីកិច្ចស្វាគមន៍របស់លោក ទិត្យ ឌីរ៉ា ប្រធានគណៈកម្មាធិការគណបក្សប្រជាជនសង្កាត់គោកចកធ្វើសេចក្តីរាយការណ៍ អំពីការងារកសាងសមាជិក និងក្រុមបក្សទាំង០៨ភូមិ រួចមានប្រសាសន៍សំណេះសំណាលលោកបណ្ឌិត ឃឹម ប៊ុនសុង បាននាំនូវការផ្តាំផ្ញើនឹករលឹករបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ចំពោះបងប្អូនប្រជាពលរដ្ឋទាំងអស់នៅសង្កាត់គោកចកក៏ដូចជា ទូទាំងខេត្តផងដែរ និងថ្លែងអំណរគុណចំពោះបងប្អូនប្រជាពលរដ្ឋទាំងអស់ដែលបន្ដគាំទ្រគណបក្សប្រជាជន ។
នៅគ្រប់កាលៈទេសៈណាមានសម្តេចតេជោ ហ៊ុន សែន គឺមិនអនុញ្ញាតឱ្យកើតមានសង្គ្រាមនៅកម្ពុជាឡើយ ។ ក្នុងនោះដែរលោកបណ្ឌិតក៏បានសំណូមដល់ប្រជាពលរដ្ឋ ដែលមានភូមិដ្ឋានស្ថិតក្នុងតំបន់រមណីយដ្ឋានអង្គរ (តំបន់អប្សរា ) សូមមានការអធ្យាស្រ័យចំពោះអាជ្ញាធរមូលដ្ឋាន ដោយបច្ចុប្បន្ននេះអាជ្ញាធរខេត្តបានធ្វើការសម្របសម្រួលជាមួយអាជ្ញាធរអប្សរា ដើម្បីជាការបំពេញនូវតម្រូវការចាំបាច់របស់បងប្អូនផងដែរ ។
លោកបណ្ឌិត ឃឹម ប៊ុនសុង ក៏បានលើកពីសភាពការណ៍នយោបាយក្នុង និងក្រៅប្រទេស ព្រមទាំងសូមឱ្យបងប្អូនប្រជាពលរដ្ឋទៅចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ខាងមុខនេះ ។ ក្នុងនោះលោក បណ្ឌិត បានជម្រុញឲ្យបងប្អូនសមាជិករបស់គណបក្សប្រជាជនដែលនៅតាមភូមិឃុំសង្កាត់គ្រប់ទីកន្លែងដែលមានតួនាទីនៅក្នុងជួរមន្ត្រីរាជការដូចជា លោកមេឃុំ ចៅសង្កាត់ លោកមេភូមិ និងក្រុមប្រឹក្សាឃុំ ត្រូវខិតខំបម្រើសេវាសាធារណៈនៅតាមមូលដ្ឋានរបស់ខ្លួនទាំងសេវាតម្រូវការ សេវាចាំបាច់ ជាពិសេសលិខិតស្នាមផ្សេងៗ ដែលបម្រើឱ្យផលប្រយោជន៍ប្រជាពលរដ្ឋក្នុងការរស់នៅប្រចាំថ្ងៃ ឱ្យបានប្រសើរឡើងថែមទៀត ។ កត្តាសំខាន់នោះ គឺផ្សព្វផ្សាយជម្រុញដល់យុវជន និង ប្រជាជននៅតាមមូលដ្ឋានឲ្យបានទៅបោះឆ្នោតគ្រប់ៗគ្នានៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ។
ក្នុងឱកាសនោះដែរលោកបណ្ឌិត ក៏បាននាំយកនូវវត្ថុអនុស្សាវរីយ៍កំដរដៃ ជូនដល់បងប្អូនជាសមាជិក សមាជិកាទាំង ១ពាន់១២០នាក់ ម្នាក់ៗ ២០ពាន់រៀលផងដែរ ៕
ចែករំលែកព័តមាននេះ