ខេត្តបាត់ដំបង ៖ សមាជិកសហគមន៍ទីផ្សារស្រូវ និងអាជីវករ ពាណិជ្ជករខេត្តបាត់ដំបងមានចំនួន២ម៉ឺននាក់ បានជួបសំណេះសំណាលជាមួយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការរៀបចំពីលោកឧកញ៉ា ភួ ពុយ ប្រធានសភាពាណិជ្ជកម្មខេត្តបាត់ដំបង ប្រធានក្រុមប្រឹក្សាភិបាលធនាគារស្រូវកម្ពុជា ភីអិលស៊ី និងមានការចូលរួមពីលោកងួន រតនះ អភិបាលខេត្តបាត់ដំបង មន្ត្រីក្រុមការងារចុះជួយគ្រប់ស្រុក ដែលបានធ្វើឡើងនៅក្នុងបរិវេណព្រលានយន្តហោះវាលបែកចាន ភូមិរំចេក៤ សង្កាត់រតនះ ក្រុង-ខេត្តបាត់ដំបង នៅវេលាព្រឹកថ្ងៃទី៣០ មិថុនា នេះ ។
លោកឧកញ៉ា ភួ ពុយ ប្រធានសភាពាណិជ្ជកម្ម បានមានមតិស្វាគមន៍ និងអានរបាយការណ៍អំពីដំណើរការបង្កើតបានជាសហគមន៍នេះឡើង គឺមានភាពងាយស្រួលចុះភ្ជាប់ដោយផ្ទាល់ជាមួយកសិករ និងប្រមូលផ្តុំកសិផលមកពីខេត្តបាត់ដំបង, ពោធិ៍សាត់ បន្ទាយមានជ័យ ក្នុងគោលបំណងរៀបចំទីផ្សារស្រូវ ធនាគារស្រូវ ជួយកាត់បន្ថយការចំណាយថ្លៃដើមខ្ពស់ លើការផលិតស្រូវ កត្តាទីផ្សារ និងកត្តាតម្លៃ សំខាន់គឺជាដៃគូយុទ្ធសាស្ត្រយូរអង្វែង រួមរស់សុខទុក្ខជួយដោះស្រាយជាមួយគ្នានៅពេលមានបញ្ហាតម្រូវការ និងជួយបំពេញការខ្វះខាតផ្សេងៗ ដែលជាឧបសគ្គ ដើម្បីឈានជើងឆ្ពោះទៅរកភាពរីកចំរើនទាំងអស់គ្នា ។
បន្ទាប់មក តំណាងទីផ្សារស្រូវចំនួន៤ស្រុក មកពីស្រុកបវេល ស្រុកថ្មគោល ស្រុកបាណន់ និងស្រុកសង្កែ បានចាប់អារម្មណ៍ និងលើកឡើងថា សូមសម្តេចក្រឡាហោម និងប្រធានសហគមន៍ មេត្តាជួយរក្សាសម្រួល ១-តម្លៃស្រូវឱ្យនៅស្ថេរ កុំឲ្យដល់ពេលខែស្រូវ សម្បូរច្រើនតម្លៃធ្លាក់ចុះខ្លាំងពេក ។ ២-ឥណទានផ្តល់ប្រាក់កម្ចី សូមជួយសម្រួលផ្តល់ឲ្យចំពេលតាមតម្រូវការ ដោយមានអត្រាការប្រាក់សមរម្យ ។ ៣-ផ្លូវថ្នល់មានមិនទាន់គ្រប់គ្រាន់សម្រាប់ចុះដឹកកសិផលពីស្រែឡើងមកភូមិ-ឃុំ និងទីប្រជុំជនសម្រាប់ផ្តល់ទៅទីផ្សារ។ ៤-ជី និងថ្នាំសម្លាប់សត្វល្អិតគ្រប់ប្រភេទ ជួយរក្សាតម្លៃឲ្យបានសមរម្យនៅពេលកសិករត្រូវការប្រើប្រាស់។ ៥-ប្រព័ន្ធប្រឡាយទឹក បែងចែកនៅមិនទាន់បានគ្រប់គ្រាន់ដល់បងប្អូន ដែលមានដីស្រែនៅឆ្ងាយៗពីប្រឡាយមេ។ ៦-ជួយជំរុញពូជស្រូវឲ្យមានគ្រប់គ្រាន់ ទាំងក្នុងសហគមន៍ និងទីផ្សារដើម្បីមានភាពងាយស្រួលកសិករយកមកដាំដុះត្រូវតាមកំរិតស្តង់ដារនៃទីផ្សារ ។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ