រាជធានីភ្នំពេញ ៖ យោងតាមការបង្ហើបឱ្យដឹងពីកីឡាការិនី២រូប និងការបង្ហោះនៅលើហ្វេសប៊ុក បានអះអាងថា ព្រឹត្តិការណ៍បាល់ទាត់ពិភពលោក (World Cup) នៅប្រទេសរុស្សុីលើកនេះ មិនត្រឹមតែមានអ្នកតាមដានភាគច្រើននៅក្នុងប្រទេសកម្ពុជាជាបុរសប៉ុណ្ណោះទេ សូម្បីតែនារីក៏តាមដានច្រើនដែរ ដោយមានទាំងការអះអាងថា មានការចាក់ភ្នាល់ជាប្រាក់នោះផង ។
ជាក់ស្ដែងសូម្បីតែប្រមុខរាជរដ្ឋាភិបាលកម្ពុជាក៏សម្ដែងនូវការបារម្ភលើករណីនេះដែរ ដោយសារតែការចាក់ភ្នាល់នឹងធ្វើឱ្យមានការខាតបង់លុយកាក់ និងមានការខ្វែងគំនិតជាមួយអ្នកជុំវិញខ្លួនផង ជាពិសេសនៅពេលដែលក្រុមល្បីៗស្រាប់តែប្រកួតមិនបានល្អ ។
អ្នកស្រី កែ ឡេង កីឡាការិនីផ្នែកប៉េតង់បានអះអាងថា អ្នកស្រីមិនមែនជាអ្នកចូលចិត្តលេងភ្នាល់បាល់នោះទេ ប៉ុន្តែអ្នកស្រីដឹងថា មានស្រីៗមួយចំនួនលេងភ្នាល់បាល់ ដោយសារតែមានអ្នកប្រាប់អ្នកស្រីច្រើនថា ពួកគេចាញ់បាល់ និងមានការតាមដានព្រឹត្តិការណ៍មួយនេះខ្លាំងក្លា ។ អ្នកស្រីនិយាយថា មិនដឹងស្រីៗដែលជាកីឡាការិនីរួមក្រុមទាំងនោះចាក់ភ្នាល់បាល់នៅកន្លែងណា ឬភ្នាល់តែគ្នាឯងនោះទេ ដោយសារតែគេមិនបានប្រាប់ តែអ្នកស្រីដឹងថាគឺមានការភ្នាល់បាល់ក្នុងចំណោមនារីៗ ដោយមានទាំងកីឡាការិនីដែលស្រឡាញ់បាល់ទាត់នោះផង ។
អ្នកស្រីនិយាយថា ស្រីៗឥឡូវក៏លេងភ្នាល់បាល់ដូចបុរសដែរ ជាក់ស្ដែងជួបគ្នារាល់ព្រឹកឮតែនិយាយថាចាញ់អស់ប៉ុណ្ណេះឬឈ្នះប៉ុណ្ណោះតែរហូតហ្នឹង និយាយទៅស្រីៗក៏លេងដែរ មិនមែនគ្រាន់តែមើលទេ ។ អ្នកស្រីក៏បានផ្ដល់ជាយោបល់ទៅកាន់នារីៗដែលលេងភ្នាល់បាល់ទាំងនោះថា បើគ្រាន់តែតាមដាន តើចាំបាច់ចាក់ភ្នាល់ធ្វើអី ? តែស្រីៗទាំងនោះបានប្រាប់អ្នកស្រីថា បើមិនបានចាក់ភ្នាល់មើលបាល់មិនសប្បាយនោះទេ ។
អ្នកស្រីថា រូបអ្នកស្រីក៏ជាអ្នកស្រឡាញ់ចូលចិត្តមើលបាល់ទាត់ដែរ ប៉ុន្តែមិនបានចាក់ភ្នាល់ និងតាមដានគ្រប់គូប្រកួតនោះទេ ដោយសារតែអ្នកស្រីមិនចូលចិត្តអត់ងងុយ និងថាអាចបណ្ដាលមកពីអ្នកស្រីមិនបានចាក់ភ្នាល់ទើបមិនសូវមានអារម្មណ៍ជក់ចិត្ត ហើយងប់ងុលនឹងការប្រកួតគ្រប់គូដែលបានធ្វើឡើង។
អ្នកស្រីថា រាល់ថ្ងៃអ្នកស្រីចំណាយពេលមិនច្រើននោះទេក្នុងការតាមដានការប្រកួត គឺទាល់តែគូណាដែលអ្នកស្រីពេញចិត្តទើបអ្នកស្រីតាមដាន ហើយបើទោះជាគូនោះខ្លួនចូលចិត្ត ក៏មិនតាម
ដានដែរប្រសិនបើការប្រកួតដល់យប់ជ្រៅពេក ។
យ៉ាងណាមិញ អ្នកស្រីថា ខ្លួនមិនបានប្រកាន់ក្រុមណាដើម្បីឱ្យបានលើកពាននោះទេ ដោយអ្នកស្រីពន្យល់យ៉ាងខ្លីថា ទោះជាក្រុមណាលើកពានក៏មិនសំខាន់នោះដែរ សំខាន់ឱ្យតែក្រុមនោះខ្លាំងហើយបានលើកពាន ។ អ្នកស្រីនិយាយថា៖«សម្រាប់បងដូចជាអត់ប្រកាន់ក្រុមណាឱ្យលើកពានទេ ក្រុមណាក៏បានដែរ គឺលើកពានបានទាំងអស់ហ្នឹង ព្រោះសុទ្ធតែស្រឡាញ់!»។
អ្នកស្រី ចូវ សុធារ៉ា អតីតកីឡាការិនីផ្នែកបោកចំបាប់បានអះអាងថា សម្រាប់អ្នកនាងចង់ឃើញបារាំងលើកពានច្រើនជាងក្រុមផ្សេង ដោយសារតែក្រុមនេះក៏លេងល្អដែរ ប៉ុន្តែច្រើនតែជួបបរាជ័យហើយមិនបានលើកពាន ។ អ្នកស្រីថា សម្រាប់ខ្លួនអ្នកស្រីមិនចូលចិត្តតាមដានបាល់ និងរឹតតែមិនចាប់អារម្មណ៍ភ្នាល់បាល់ទៅទៀត ប៉ុន្តែអ្នកស្រីទទួលស្គាល់ថា ស្រីៗសម័យនេះក៏ចូលចិត្តភ្នាល់បាល់ដែរ ដោយគ្រាន់តែអ្វីដែលអ្នកស្រីបានដឹងគឺពួកគេភ្នាល់ក្នុងនាមជាការភ្នាល់លេងៗជាមួយគ្នា ដើម្បីឱ្យបានសប្បាយតែប៉ុណ្ណោះ ។
អ្នកស្រីនិយាយថា ៖ «ខ្ញុំរឿងភ្នាល់បាល់មិនសូវដឹងទេ ប៉ុន្តែរឿងគេភ្នាល់មានបង ស្រីៗយើងក៏មានដែរ!»។ អ្នកស្រីថា ព្រឹត្តិការណ៍World Cup ជាព្រឹត្តិការណ៍ធំរបស់ពិភពលោក តែសម្រាប់អ្នកស្រីមិនសូវមានការចាប់អារម្មណ៍ទេ បើទោះជាអ្នកផ្ទះរបស់អ្នកស្រីមួយចំនួនតាមដានមិនសូវខកខានក្ដី។ មិនខុសពីការលើកឡើងរបស់កីឡាការិនី និងអតីតកីឡាការិនីទាំង២ នៅលើបណ្ដាញសង្គមហ្វេសប៊ុកឯណោះវិញក៏មានទិន្នន័យបង្ហាញថា ស្រីៗក៏មានការភ្នាល់បាល់ដោយចំហផងដែរ ដោយលើគណនីរបស់អ្នកលេងហ្វេសប៊ុកជានារីមួយចំនួនបានបង្ហោះថា «ថ្ងៃនេះសៀងលេខ១ឬលេខ២?» និងបានបង្ហោះថា«ថាគេប្រុសទៅងាប់រស់នឹងបាល់ ចុះឯងឯណេះវិញស្អីដែរបើមិនដែលឈ្នះផង»ជាដើម ។
ការលើកឡើងរបស់អ្នកលេងហ្វេសប៊ុក គឺស្របនឹងការទទួលស្គាល់របស់មហាជនដែលសុទ្ធតែដឹងថានារីៗដែលតាមដានបាល់មានការភ្នាល់បាល់។ ទោះបីយ៉ាងណា ស្រីៗភ្នាល់បាល់មិនដូចបុរសនោះទេ គឺភាគច្រើនគេភ្នាល់ត្រឹមតែចាញ់ប៉ាវញាំអី ប៉ាវមើលកុន ឬដាក់លុយបន្តិចបន្តួចភ្នាល់គ្នាប៉ុណ្ណោះ មិនមែនដល់ថ្នាក់បញ្ចាំម៉ូតូបញ្ចាំទូរស័ព្ទ ចាក់ភ្នាល់ដូចអ្នកងប់ងុលបាល់ទាត់មួយចំនួននោះទេ។
សម្ដេចតេជោនាយករដ្ឋមន្ត្រី ហ៊ុន សែន ក៏បានថ្លែងដាស់តឿនក្នុងពិធីសំណេះសំណាលជាមួយកម្មករ-កម្មការិនីនៅខេត្តកំពង់ឆ្នាំង កុំឱ្យមានការចាក់ភ្នាល់លើព្រឹត្តិការណ៍នេះដែរ ដោយសម្ដេចបញ្ជាក់ថា ក្រៅពីធ្វើឱ្យខាតបង់ ក៏អាចទៅជាមានរឿងមានរ៉ាវ ។ សម្ដេចទទូចឱ្យមានត្រឹមតែការតាមដានបានហើយ ជាពិសេសនារីៗគឺរឹតតែមិនគួរចំណាយលុយកាក់ក្នុងល្បែងនេះទៅទៀត ៕
ចែករំលែកព័តមាននេះ