ខេត្តត្បូងឃ្មុំ ៖ ទោះបីជាអាជ្ញាធរខេត្តបានដាក់បទបញ្ជាមិនឲ្យមានការនាំចេញជ័រកៅស៊ូទៅកាន់ប្រទេសជិតខាងយ៉ាងណាក៏ដោយ ក៏នៅតាមច្រកទន្លេចាម ស្ថិតនៅឃុំជាំក្រវៀន ស្រុកមេមត់ នៅរសៀលថ្ងៃទី២៩ មិថុនា គេបានសង្កេតឃើញមានរថយន្តតូចធំបានដឹកចេញយកទៅលក់នៅប្រទេសវៀតណាមដោយមិនមានការទប់ស្តាត់ពីស្ថាប័នណាមួយនោះទេ ។…
ខេត្តត្បូងឃ្មុំ ៖ ទោះបីជាអាជ្ញាធរខេត្តបានដាក់បទបញ្ជាមិនឲ្យមានការនាំចេញជ័រកៅស៊ូទៅកាន់ប្រទេសជិតខាងយ៉ាងណាក៏ដោយ ក៏នៅតាមច្រកទន្លេចាម ស្ថិតនៅឃុំជាំក្រវៀន ស្រុកមេមត់ នៅរសៀលថ្ងៃទី២៩ មិថុនា គេបានសង្កេតឃើញមានរថយន្តតូចធំបានដឹកចេញយកទៅលក់នៅប្រទេសវៀតណាមដោយមិនមានការទប់ស្តាត់ពីស្ថាប័នណាមួយនោះទេ ។
បុរសម្នាក់រស់នៅស្រុកស្នួល ខេត្តក្រចេះ ប្រាប់ឲ្យដឹងថា គាត់បានប្រមូលទិញជ័រកៅស៊ូពីប្រជាពលរដ្ឋនៅស្រុកស្នួលបានជាង៣តោនដឹកតាមរថយន្តទ្រុងមួយគ្រឿងដោយសារតែផ្លូវចូលមកច្រកទន្លេចាមស្រុកមេមត់ ត្រូវបានគេចាក់ដីក្រាលគ្រួសក្រហមរលោងស្រួលបើកបរជាងមុនរហូតមកដល់រសៀលថ្ងៃទី២៩ មិថុនា បានបើកមកដល់ជិតច្រកទន្លេចាម ។
បុរសខាងលើនេះប្រាប់បន្តថា ជ័រកៅស៊ូនោះគាត់ត្រូវបានប្រមូលទិញពីពលរដ្ឋ២ទៅ៣ថ្ងៃទើបបាន១រថយន្តមានទង្ងន់ជាង៣តោនចាប់តាំងពីពេលចេញពីដើមទីមកដល់ត្រង់ច្រកព្រំដែនត្រូវបានចំណាយច្រើនរត់ការជាមួយនឹងកម្លាំងផ្សេងៗ ។ លុះពេលដែលលក់ឲ្យទៅដល់ឈ្មួញនៅវៀតណាមនៅច្រកព្រំដែនដោយបានផាត់លើការចំណាយក្នុង១ជើង គាត់អាចចំណេញថវិការជាង៣០ម៉ឺនរៀលផងដែរ ។
លោក ជុំ កុសល្យ ប្រធានស្នាក់ការគយ និងរដ្ឋាករច្រកទន្លេចាមប្រាប់ថា បើអ្នកយកព័ត៌មានដឹងនៅច្រកទន្លេចាមបែបណានោះ…សូមយកទៅផ្សាយចុះរូបលោកមកនេះមិនមានអ្វីនោះទេជាមួយនោះគាត់មានមងមួយដៃសម្រាប់យកទៅរាយនៅក្នុងទន្លេចាមដើម្បីបានត្រីយកមកធ្វើម្ហូបព្រោះថា ច្រកនេះមិនដូចនៅកន្លែងផ្សេង…ដែលព្រឹកឡើងមានឈ្មួញមកចាំជួបនោះទេ ។
លោក វ៉ា ស៊ីនឿន ប្រធានស្នាក់ការច្រកទន្លេចាមប្រាប់ឲ្យដឹងដែរថា មានក្រុមហ៊ុនឯកជនមួយបានចាំទិញជ័រកៅស៊ូពីប្រជាពលរដ្ឋដែលយកមកលក់ឲ្យដឹកតាមរថយន្តតូចធំ ។ មិនមានរថយន្តដឹកជ័រកៅស៊ូធុនធំណាមួយបើកចេញមកតាមច្រកទន្លេចាមដើម្បីយកទៅលក់នៅប្រទេសវៀតណាម ហើយក៏មិនមានអ្នកហ៊ានឲ្យចេញទៅដែរ ។ រូបលោកបានទទួលស្គាល់ថា មានរថយន្តតូចៗបានដឹកជ័រកៅស៊ូស្អុយមកលក់ឲ្យក្រុមហ៊ុនឯកជន និងសល់មួយផ្នែកបានដឹកមកលក់ចេញតាមច្រករបស់លោកមែន តែរថយន្តតូចជាលក្ខណៈគ្រួសារតែប៉ុណ្ណោះ ។ ហើយចំពោះរថយន្តធុនធំដែលថា ដឹករហូតដល់ទៅជាង៣តោននោះរូបលោកថា មិនមានចេញមកតាមច្រកទន្លេចាមឡើយ ៕
ចែករំលែកព័តមាននេះ