ខេត្តស្ទឹងត្រែង ៖ ព័ត៌មានបឋមបានរាយការណ៍ពីខេត្តស្ទឹងត្រែង កាលពីរសៀលថ្ងៃទី២៩ មិថុនា មកថា កម្លាំងសមត្ថកិច្ចនគរបាលការពារព្រំដែនឡាវ-កម្ពុជា ក្នុងទឹកដីខេត្តស្ទឹងត្រែង ដោយមានការសហការណ៍ ជាមួយកម្លាំងជំនាញការិយាល័យទី៩ នៃមន្ទីរប្រឆាំងគ្រឿងញៀនក្រសួងមហាផ្ទៃ បានចុះប្រតិបត្តការបង្ក្រាប លើជនឧក្រិដ្ឋរត់ពន្ធគ្រឿងញៀន និងចាប់បានថ្នាំញៀនចំនួន៣គីឡូក្រាមនៅច្រកព្រំដែនឡាវ ហើយឃាត់ខ្លួនជនជាតិឡាវម្នាក់ នៅលើទឹកដីកម្ពុជាក្នុងខេត្តស្ទឹងត្រែង។ ជនសង្ស័យជាឧក្រិដ្ឋជនគ្រឿងញៀននោះមានឈ្មោះ ថង លួតប៉ាសឺត អាយុ៥០ឆ្នាំ ភេទប្រុស ជនជាតិឡាវ មានទីលំនៅភូមិហួយងិន ស្រុកចំប៉ាសាក់ ខេត្តចំប៉ាសាក់ ប្រទេសឡាវ។
លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀងក្រសួងមហាផ្ទៃ បានថ្លែងឲ្យដឹងថា កិច្ចប្រតិបត្តិការបង្ក្រាបឧក្រិដ្ឋជនជួញដូរគ្រឿងញៀនឆ្លងដែនដោយខុសច្បាប់ខាងលើនេះ ដំបូងសមត្ថកិច្ចជំនាញទទួលបានព័ត៌មាននេះ តាមរយៈកម្លាំងជំនាញ នៃនគរបាលការពារព្រំដែនខេត្តស្ទឹងត្រែង ថាមានជនឧក្រិដ្ឋបាន និង កំពុងដឹកជញ្ជួនគ្រឿងញៀនចេញពីប្រទេសឡាវ មានបំណងចូលមកកម្ពុជា។ ពេលទទួលបានព័ត៌នោះហើយ នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលការងារប្រយុទ្ធប្រឆាំងគ្រឿងញៀន បានដាក់បទបញ្ជាឲ្យការិយាល័យជំនាញ(ក៩) នៃមន្ទីរប្រឆាំងគ្រឿងញៀន ទៅសហការជាមួយនគរបាលការពារព្រំដែន ក្នុងខេត្តស្ទឹងត្រែង។
លោក ឡឹក វណ្ណៈ បន្តថា ក្រោមបទបញ្ជា និងដោយមានការសហការល្អរវាងកម្លាំងជំនាញខាងលើ លទ្ធផលសមត្ថកិច្ចចាប់ខ្លួនជនឧក្រិដ្ឋបានម្នាក់ និងដកហូតថ្នាំញៀនចំនួន៣គីឡូក្រាម នៅចំណុចស្ពានទី២ ភូមិខាំផាន់ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។ ចាប់យកវត្ថុតាងសារធាតុញៀនប្រភេទ ម៉េតំហ្វេតាមីន ចំនួន៣កញ្ចប់ធំ ស្មើប្រមាណ៣គីឡូក្រាម។ ក្រោយពីបានធ្វើការឃាត់ជនសង្ស័យម្នាក់ ខាងលើ កម្លាំងសមត្ថកិច្ចជំនាញ (ក៩) នៃមន្ទីរប្រឆាំងគ្រឿងញៀន បានសហការជាកម្លាំងBLO និង កម្លាំងសមត្ថកិច្ចនគរបាលឡាវ បន្តឈានទៅដល់ការឃាត់ខ្លួនមេខ្លោងជួញដូរគ្រឿងញៀនម្នាក់ទៀត ដែលមានឈ្មោះ ចាវ ពែន ភេទប្រុស អាយុ៣១ឆ្នាំ ជនជាតិឡាវ មានទីលំនៅ ភូមិចាប់សាន់ខាខន ស្រុកប៉ាក់សេ ខេត្តចំប៉ាសាក់ និងដកហូតបានរថយន្ត២គ្រឿងផងដែរ ។
ប៉ុន្តែមេខ្លោងម្នាក់នេះ និង រថយន្ត២គ្រឿងនោះ សមត្ថកិច្ចនគរបាល មិនបានប្រគល់មកឲ្យសមត្ថកិច្ចកម្ពុជាយើងទេ ដោយសមត្ថកិច្ចនៃប្រទេសទាំងពីរយល់ឃើញថា ការចាប់ខ្លួនមេខ្លោងជាការធ្វើឡើងនៅក្នុងទឹកដី នៃប្រទេសឡាវ ដូច្នោះសមភាគីទាំងពីរ បានយលព្រមទុកមេខ្លោងជួញដូរគ្រឿងញៀនរូបនោះ ឲ្យសមត្ថកិច្ចឡាវចាត់ការតាប់ច្បាប់ប្រទេសឡាវ។ ចំណែកជនឧក្រិដ្ឋជនជាតិឡាវម្នាក់ ដែលសមត្ថកិច្ចនគរបាលកម្ពុជាយើងចាប់ខ្លួននៅក្នុងទឹកដីខេត្តស្ទឹងត្រែង បាន និង នាំខ្លួនទៅកាន់ស្នងការដ្ឋាននគរបាលខេត្តស្ទឹងត្រែង រួមជាមួយវត្ថុតាងដើម្បីកសាងសំណុំរឿង បញ្ជូនទៅកាន់សាលាដំបូងខេត្តតាមនីតិវិធី៕
ចែករំលែកព័តមាននេះ