រាជធានីភ្នំពេញ ៖ ក្នុងគោលបំណងជួយដល់សិស្ស-និសិត្ស យល់ដឹងកាន់តែច្បាស់ និងអនុវត្តផ្ទាល់ជាមួយនឹងឧបករណ៍នៃផ្នែកវិទ្យាសាស្ត្រសុខាភិបាល និងបច្ចេកវិទ្យាសាកលវិទ្យាល័យពុទ្ធិសាស្ត្រ រៀបចំកម្មវិធីបង្កើនការយល់ដឹងលើផ្នែកវិទ្យាសាស្ត្រសុខាភិបាល និងបច្ចេកវិទ្យា ឬហៅថា Discovery Festival ទៅដល់និស្សិតមាន
រយៈពេលពីរថ្ងៃ ចាប់ពីថ្ងៃទី២៨ ដល់ថ្ងៃទី ២៩ មិថុនា ឆ្នាំ២០១៨ ។
សម្រាប់រយៈពេល២ថ្ងៃនៃកម្មវិធី Discovery Festival នេះ បានទាក់ទាញសិស្សានុសិស្សជាច្រើននាក់មកចូលរួមស្វែងយល់អំពីសារសំខាន់នៃវិស័យ វិទ្យាសាស្ត្រសុខាភិបាលនិងបច្ចេកវិទ្យា។
តាមមន្ត្រីផ្នែកទីផ្សារនៃសាកលវិទ្យាល័យពុទ្ធិសាស្ត្របានឱ្យដឹងថា កម្មវិធី Discovery Festival ឬហៅថាស្វែងយល់អំពីវិទ្យាសាស្ត្រសុខាភិបាល និងបច្ចេកវិទ្យា គឺដើម្បីបង្កើនការយល់ដឹងបន្ថែមទៅដល់និស្សិត ពិសេសគឺបង្ហាញពីសក្តានុពលរបស់សាកលវិទ្យាល័យ ដែលមានជំនាញផ្តល់ចំណេះដឹង និងជំនាញពាក់ព័ន្ធនឹងវិស័យខាងលើទៅដល់សិស្សកំពុងរៀននៅតាមវិទ្យាល័យឲ្យចូលរួមស្វែងយល់ទៅលើការសម្រេចចិត្តជ្រើសរើសមុខជំនាញឱ្យបានត្រឹមត្រូវមុននឹងចូលរៀននៅសាកលវិទ្យាល័យនៅពេលខាងមុខ។
លោក ហែម ចិត្ត្រា មន្ត្រីផ្នែកទីផ្សារនៃសាកលវិទ្យាល័យពុទ្ធិសាស្ត្រ មានប្រសាសន៍ថា៖ «កម្មវិធីDiscovery Festival នេះគឺជាការបើកបង្ហាញពីសាកលវិទ្យាល័យពុទ្ធិសាស្ត្រដែលមានជំនាញផ្នែក វិទ្យាសាស្ត្រសុខាភិបាល និងវិទ្យាសាស្ត្របច្ចេកវិទ្យា ទាំងពីរប្រភេទនេះ ឱ្យសិស្សវិទ្យាល័យពេលចូលរួម គាត់បានដឹងកាន់តែច្បាស់ថា មុខជំនាញពេទ្យ (វិទ្យាសាស្ត្រសុខាភិបាល) នេះ វាមានភាពលំបាក ឬងាយស្រួល និងមានឧបករណ៍ជាក់ស្តែងអ្វីឭខ្លះ។
លើសពីគឺយើងបើកជូនឱ្យសិស្សចូលទៅទស្សនកិច្ចបានស្គាល់ពីឧបករណ៍នៅក្នុងបន្ទាប់ពិសោធន៍របស់សាលាថែមទៀតផង»។ បើតាមមន្ត្រីផ្នែកទីផ្សារ សាកលវិទ្យាល័យពុទ្ធិសាស្ត្ររៀបចំកម្មវិធីរយៈពេលពីរថ្ងៃនេះឡើង គឺផ្តោតទៅផ្នែកបច្ចេកវិទ្យា និងវិទ្យាសាស្ត្រសុខាភិបាល។
លោក ហែម ចិត្ត្រា មានប្រសាសន៍បន្តថា កម្មវិធី Discovery Festival ដែលសាកលវិទ្យាល័យរៀបចំឡើងពេលនេះ គឺជាឆ្នាំទីពីរ ហើយ «គោលបំណងចង់បង្ហាញមុខជំនាញបច្ចេកវិទ្យា និងវិទ្យាសាស្ត្រសុខាភិបាលក៏ដូចជាជំនាញផ្សេងទៀតទៅដល់សិស្សនៅតាមវិទ្យាល័យផ្សេងបានយល់ដឹង និងងាយស្រួលក្នុងការសម្រេចចិត្តមុនចូលរៀននៅសាកលវិទ្យាល័យនាពេលខាងមុខ។ នៅរយៈពេលពីរថ្ងៃនេះ(២៨-២៩មិថុនា) ខ្ញុំរំពឹងថានឹងមានសិស្សរៀននៅតាមវិទ្យាល័យចូលរួមច្រើន ព្រោះវាធ្វើឱ្យគាត់ (សិស្ស) បានយល់កាន់តែច្បាស់ទៅលើមុខជំនាញដែលគាត់ ត្រូវជ្រើសចូលរៀនបន្តនៅសាកលវិទ្យាល័យ»។
កញ្ញា ចក់ សុភ័ស្ត និស្សិតឆ្នាំទី១ ផ្នែកវិទ្យាសាស្ត្រសុខាភិបាលនៃសាកលវិទ្យាល័យពុទ្ធិសាស្ត្រ បាននិយាយថាកម្មវិធីនេះ ពិតជាចូលរួមផ្តល់ចំណេះដឹងបន្ថែមទៅលើមុខជំនាញដែលរូបនាងកំពុងសិក្សាសព្វថ្ងៃ ។ ជាក់ស្តែងបានយល់ដឹងទៅលើការវះកាត់ ដេរលើមុខរបួស និងការប្រើប្រាស់ថ្នាំពេទ្យជាដើម។
កញ្ញាលើកឡើងដូច្នេះថា ៖ «កម្មវិធីនេះពិតជាបានផ្តល់នូវអត្ថប្រយោជន៍ច្រើនទៅដល់អ្នកចូលរួម មិនថានិស្សិតរៀននៅសាកលវិទ្យាល័យនោះទេ។ ដោយឡែកសិស្សរៀនកំពុងនៅវិទ្យាល័យផ្សេងទៀត ក៏បានយល់ដឹងកាន់ច្បាស់ជាងមុន នឹងបានឃើញឧបករណ៍ដោយផ្ទាល់។ ដើម្បីឱ្យសិស្ស និស្សិតផ្សេងទៀតដែលខកខានពុំបានចូលរួមនៅឆ្នាំនេះ ខ្ញុំចង់ឱ្យសាលាបន្តបង្កើតកម្មវិធីបែបនេះឡើងឱបានរាល់ឆ្នាំដើម្បីឱ្យសិស្សនិស្សិតបានយល់ដឹងដូចៗគ្នា»។
លោក ហែម ចិត្ត្រា មន្ត្រីផ្នែកទីផ្សារនៃសាកលវិទ្យាល័យពុទ្ធិសាស្ត្រ មានប្រសាសន៍ថា៖ «កម្មវិធីនេះយើងមានផែនការធ្វើឡើងជារៀងរាល់ឆ្នាំហើយឆ្នាំក្រោយយើងរំពឹងថា នឹងធ្វើឱ្យកាន់តែល្អជាងពេលនេះទៅទៀត។ ពិសេសឱ្យសិស្សនៅតាមវិទ្យាល័យមានការសម្រេចចិត្តកាន់តែច្បាស់ ពេលជ្រើសរើសមុខជំនាញអ្វីមួយដែលគាត់ស្រលាញ់។ បើសិស្សស្រលាញ់មុខវិជ្ជាខាងឧសថ យើងនឹងមានការធ្វើបទបង្ហាញ ក៏ដូចជាអនុញ្ញាតឱ្យសិស្សសាកសួរពីចម្ងល់បាន ដើម្បីឱ្យការរៀនសូត្រកាន់តែមានភាពងាយស្រួលនាពេលខាងមុខ»៕
ចែករំលែកព័តមាននេះ