ខេត្តកំពង់ធំ ៖ រថយន្តពន្លះម៉ូតូមួយគ្រឿងបានស្លាប់ម្នាក់ និងរបួសធ្ងន់ម្នាក់ រួចបើកគេចបាត់ដោយសុវត្ថិ ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២២និង១៥នាទីយប់ ថ្ងៃទី២៨ ខែមិថុនា ឆ្នាំ២០១៨ ស្ថិតនៅលើកំណត់ផ្លូវជាតិលេខ៦ ក្នុងភូមិត្រាច ឃុំកំពង់ចិនជើង ស្រុកស្ទោង ខេត្តកំពង់ធំ ។
លោកវរសេនីយ៍ត្រី តាន់ ឆេងនឿង អធិការរងនគរបាលស្រុងស្ទោងទទួលខាងសណ្តាប់ធ្នាប់ និងចរាចរណ៍ប្រាប់ថា ករណីគ្រោះចរាចរណ៍ខាងលើនេះបង្កឡើងរវាងម៉ូតូ និងរថយន្តបណ្តាលឲ្យជនរងគ្រោះរបួសធ្ងន់ម្នាក់ និងស្លាប់ម្នាក់ ។
នៅមុនពេលកើតហេតុបើយោងតាមការត្រួតពិនិត្យរបស់នគរបាលជំនាញដែលដឹកនាំដោយរូបលោកផ្ទាល់ឃើញថា ម៉ូតូម៉ាកវេវ ពណ៌ខ្មៅ ពាក់ស្លាកលេខ កំពង់ចាម1H-9761 បើកបរដោយឈ្មោះ អៀង ណារ៉ូ ភេទប្រុស អាយុ២៨ឆ្នាំ របួសធ្ងន់(គ្មានមួកសុវត្ថិភាព) និងអ្នករួមដំណើរជាមួយម្នាក់ទៀតឈ្មោះ ហម ហាក់ ភេទប្រុស អាយុ៤២ឆ្នាំ (ស្លាប់នៅនឹងកន្លែងកើតហេតុ) ជនរងគ្រោះទាំងពីរនាក់រស់នៅភូមិត្រាច ឃុំកំពង់ចិនជើងបានជិះម៉ូតូឌុបគ្នា ក្នុងទិសដៅពីសៀមរាបមកកំពង់ធំ ចំណែករថយន្តមិនស្គាល់ម៉ាកបានចេញដំណើរពីកំពង់ធំទៅសៀមរាប លុះមកដល់ចំណុចកើតហេតុខាងលើរថយន្តក៏បានបើកកៀរម៉ូតូដួលធ្វើឲ្យជនរងគ្រោះម្នាក់ធ្លាក់ពីលើម៉ូតូបោកក្បាលទៅនឹងថ្នល់ ស្លាប់ម្នាក់នៅនឹងកន្លែងកើតហេតុ និងម្នាក់ទៀរងរបួសធ្ងន់ បន្ទាប់ពីបង្កហេតុរួច រថយន្តបង្កក៏បានបន្ថែមល្បឿនបើករត់គេចខ្លួនបាត់ ។
លោកបានបញ្ជាឲ្យសមត្ថកិច្ចនៅតាមដងផ្លូវរងចាំឃាត់រថយន្តបង្កតែឃាត់មិនបានដោយមិនដឹងថា បើកគេចខ្លួនចូលជ្រកកន្លែងណាបាតរកមិនឃើញ ករណីនេះសមត្ថកិច្ចកំពុងតែធ្វើការស្រាវជ្រាវបន្ត ដើម្បីចាប់រថយន្តបង្កយកមកផ្តន្ទាទោសចំពោះមុខច្បាប់ ។ ក្រោយពីវាស់វែងរួចជនរងគ្រោះបញ្ជូនទៅសង្គ្រោះ ចំណែកសពត្រូវបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី រីឯម៉ូតូយកមករក្សាទុកនៅអធិការដ្ឋាននគរបាលស្រុក ៕
ចែករំលែកព័តមាននេះ