ខេត្តកំពង់ធំ ៖ ករណីបុរសម្នាក់ដេកៗស្លាប់បានបង្កឲ្យមានការភ្ញាក់ផ្អើលកាលពីវេលាម៉ោង០១យប់ឈានចូលថ្ងៃទី២៩ ខែមិថុនា ឆ្នាំ២០១៨ ស្ថិតក្នុងកុដិមួយកន្លែងនៅក្នុងវត្តល្ហុង ស្ថិតនៅភូមិល្ហុង ឃុំចំណាលើ ស្រុកស្ទោង ខេត្តកំពង់ធំ ។
លោកវរសេនីយ៍ឯក យ៉ង សំ អធិការនគរបាលស្រុកស្ទោងបានឲ្យដឹងថា សពជនរងគ្រោះ ឈ្មោះ ងន ឃី ភេទប្រុស អាយុ៤៣ឆ្នាំ នៅភូមិកើតហេតុខាងលើ ។
បើយោងតាមការបំភ្លឺពីឈ្មោះ ងន ខេង ភេទប្រុស អាយុ៤៦ឆ្នាំ ត្រូវជាបងបង្កើតរបស់ជនរងគ្រោះ និងអ្នកភូមិព្រមទាំងព្រះសង្ឃក្នុងវត្តល្ហុងបានបញ្ជាក់ថា ជនរងគ្រោះឈ្មោះ ងន ឃី ជាមនុស្សចូលចិត្តផឹកស្រាសជាប្រចាំ ហើយមិនសូវស៊ីបាយទឹកនោះទេ រហូតប្រពន្ធទ្រាំមិនបានក៏បានលែងលះចោលដល់ផឹកខ្លាំងពេកទៅជនរងគ្រោះធ្លាប់ធ្លាក់ខ្លួនឈឺជាទម្ងន់ ត្រូវបានបងប្អូនយកទៅពេទ្យជាច្រើនដង ហើយគ្រូពេទ្យប្រាប់ថា ឲ្យឈប់ផឹកស្រាទៀតទៅ ឥឡូវក្រិនថ្លើមហើយ នៅពេលត្រលប់ចេញពីមន្ទីរពេទ្យវិញឈ្មោះ ងន ឃី នៅតែផឹកស្រាដដែល ដោយស្នាក់នៅក្នុងវត្ត ល្ហុង លុះដល់ថ្ងៃទី២៨ ខែមិថុនា ឆ្នាំ២០១៨ ជនរងគ្រោះបានផឹកស្រវឹងយ៉ាងខ្លាំងរហូតដើរដួលបោកក្បាល និងជណ្តើរកុដិបន្ទាប់មកបានចូលដេកក្នុងបន្ទប់បាត់ទៅ។
លុះព្រឹកឡើងព្រះគ្រូចៅអធិការវត្តបាននិមន្ដដើរទៅដាស់ ស្រាប់តែឃើញជនរងគ្រោះបានស្លាប់បាត់ទៅហើយ ហើយក៏បានរាយការណ៍ប្រាប់ដល់បងប្អូន និងអាជ្ញាធរសមត្ថកិច្ចយើងបានចុះដល់កន្លែងកើតហេតុធ្វើការពិនិត្យសព ឃើញថាពុំមានស្លាកស្នាមអ្វីពាក់ពន្ធ និងករណីឃាតកម្មឡើយ គឺសពស្លាប់មកពីផឹកស្រាសរច្រើនហួសកំណត់ក៏ប្រគល់ជូនសាច់ញាតិធ្វើបុណ្យតាមប្រពៃណីនៅ វត្តល្ហុង៕
ចែករំលែកព័តមាននេះ