ខេត្តបាត់ដំបង ៖ យុវជនម្នាក់បានស្លាប់ភ្លាមៗ ពេលដែលបើកបរម៉ូតូក្នុងល្បឿនលឿនជែងរថយន្តមួយគ្រឿងមិនផុត ហើយជ្រុលទៅបុករថយន្តដឹកដីដែលធ្វើដំណើរបញ្ច្រាសទិសគ្នា កាលពីវេលាម៉ោង៨និង៣០នាទីព្រឹកថ្ងៃទី២៩ ខែមិថុនា នៅលើកំណាត់ផ្លូវជាតិលេខ៥ ត្រង់ចំណុច ភូមិអូរតាគី ឃុំអូរតាគី ស្រុកថ្មគោល។ អនុប្រធានការិយាល័យចរាចរណ៏ លោកម៉ែន បូរី បានឲ្យដឹងថា ជនរងគ្រោះដែលស្លាប់ឈ្មោះសេង វិបុល ភេទប្រុស អាយុ១៨ឆ្នាំ រស់នៅភូមិចារ ឃុំអន្លង់រុន ស្រុកថ្មគោល ។ ម៉ូតូមួយគ្រឿងរបស់ជនរងគ្រោះម៉ាកហុងដាឌ្រីម ពាក់ស្លាកលេខ បាត់ដំបង ១D-៧៣៩០។ ចំណែករថយន្តបង្កម៉ាកហ៊ីយ៉ាន់ដាយ ពាក់ស្លាកលេខ AT18. 3-0827 ជារថយន្តដឹកដីរបស់ក្រុមហ៊ុនធ្វើផ្លូវជាតិលេខ៥ បើកបរដោយឈ្មោះផាន់ សាវឹង ភេទប្រុស អាយុ៥៥ឆ្នាំ រស់នៅខេត្តបាត់ដំបង ។ លោកអនុប្រធានការិយាល័យចរាចរណ៍បានឲ្យដឹងតាមរយៈរបាយការណ៍ថា ភាគីម៉ូតូបានព្យាយាមជិះជែងរថយន្តតូចមួយគ្រឿង តែជែងមិនផុតក៏ជ្រុលទៅបុករថយន្តដឹកដីខាងលើពេញទំហឹង ខណ:កំពុងធ្វើដំណើរក្នុងទិសដៅផ្ទុយគ្នា បណ្ដាលឲ្យបុរសជាអ្នកបើកបរម៉ូតូស្លាប់តែម្ដង។ ចំណែកអ្នកបើកបររថយន្តដឹកដីបានរត់គេចខ្លួនបាត់ ។សាក្សីនៅកន្លែងកើតហេតុបាននិយាយប្រាប់សមត្ថកិច្ចថា អ្នកជិះម៉ូតូបានធ្វើដំណើរពីទិសខាងជើងឆ្ពោះទៅទិសខាងត្បូង។ លុះមកដល់ចំណុចកើតហេតុ គេឃើញអ្នកបើកម៉ូតូនោះបានបន្ថែមល្បឿនជែងរថយន្តប្រភេទទួរីសមួយគ្រឿងដែលជិះស្របទិសគ្នា តែជែងមិនផុតក៏ជ្រុលទៅបុករថយន្តដឹកដីដែលបើកមកពីមុខតែម្ដង។ សាក្សីដដែលបានបញ្ជាក់ថា ពេលនោះជនរងគ្រោះដែលជាអ្នកបើកបរម៉ូតូបានស្លាប់នៅនឹងកន្លែង រីឯអ្នកបើកបររថយន្តដឹកដីបានឈប់រថយន្តរួចបើកទ្វារចុះរត់គេចខ្លួនចោលរថយន្តភ្លាមៗផងដែរ។លោកម៉ែន បូរី អនុប្រធានការិយាល័យចរាចរណ៏ខេត្តបាននិយាយដែរថា គ្រោះថ្នាក់ចរាចរណ៍នេះបានកើតឡើងដោយសារការបើកបរខ្វះការប្រុងប្រយ័ត្នរបស់ភាគីម៉ូតូដែលជែងមិនមើលមុខមិនមើលក្រោយ ជែងទាំងប្រថុយប្រថាន និងមិនគោរពច្បាប់ចរាចរណ៍។ លោកបន្តថា ក្រោយពីធ្វើការវាស់វែងកន្លែងកើតហេតុ កម្លាំងជំនាញបាននាំយកមធ្យោបាយបង្កគ្រោះថ្នាក់ទាំង២ភាគីទៅរក្សាទុកនៅការិយាល័យជំនាញហើយដើម្បីដោះស្រាយតាមនីតិវិធីច្បាប់ ចំណែកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីផងដែរ៕
ចែករំលែកព័តមាននេះ