ខេត្តបាត់ដំបង ៖ យុវសិស្សប្រុសស្រីវង្វេងសាលាដែលភាគច្រើនស្ថិតក្នុងវ័យជាអនីតិជនបានណាត់ទៅជួបសំងំអោបថើបគ្នាយ៉ាងត្រេកត្រអាលនៅក្នុងអាហារដ្ឋានមួយដែលសំបូរដោយក្យូសបិទបាំងជិតនៅក្នុងភូមិព្រែកតាតន់ សង្កាត់ព្រែកព្រះស្តេច ក្រុងបាត់ដំបង ហើយត្រូវសមត្ថកិច្ចជំនាញឆ្មក់ចូលទៅបំបែកកាលពីព្រឹកថ្ងៃទី១១ មីនា ២០១៣ ដែលយុវសិស្សប្រុសស្រីចំនួន៧នាក់ត្រូវបានឃាត់ខ្លួនមកសួរនាំ និងជាង១០នាក់ទៀតបានរត់ចេញប្រសាច ។
មន្ត្រីនគរបាលការិយាល័យប្រឆាំងការជួញដូរមនុស្ស និងការពារអនីតិជនបានឱ្យដឹងថា ក្រុមសិស្សប្រុស ស្រីវ័យក្រោម១៨ឆ្នាំទាំងនោះមិនចូលសាលាទេ តែបែរជាណាត់គ្នាចូលតាមក្យូសដែលបិទបាំងជិតក្នុងអាហារដ្ឋានមួយយីហោ «ស្ពានជួបជុំ» ស្ថិតក្នុងភូមិ-សង្កាត់ខាងលើ ដែលម្ចាស់ហាងជាមន្ត្រីយោធាម្នាក់ឈ្មោះម៉ាន់ សូនី អាយុ៣៧ឆ្នាំ ។ ស្ថិតក្នុងឯកសណ្ឋានសិស្សពួកគេបានអោបថើបគ្នាយ៉ាងរមូលសួតនៅតាមក្យូសទាំងនោះ ដោយគ្មានការអើពើពីម្ចាស់ហាងឡើយ ។ ប៉ុន្តែសមត្ថកិច្ចបានចុះបង្ក្រាបភ្លាមៗក្រោយពីមានការផ្តល់ព័ត៌មានអំពីការប្រព្រឹត្តអំពើអាសរបស់ក្រុមយុវជនសិស្សអាវាសែទាំងនេះ ហើយឃាត់ខ្លួនចំនួន៧នាក់ ក្នុងនោះមានប្រុស៤នាក់ រីឯជាង១០នាក់ទៀតរត់បាតជើងសព្រាតចេញពីក្យូស និងម្ចាស់ហាងក៏ត្រូវឃាត់ខ្លួនយកមកកាន់ស្នងការដ្ឋានដើម្បីសាកសួរផងដែរ ៕
ចែករំលែកព័តមាននេះ