ខេត្តកណ្តាល ៖ ករណីឃាតកម្មកាប់សម្លាប់យ៉ាងសាហាវនៅស្រុកស្អាងនគរបាលធ្វើការឃាត់ខ្លួនជនសង្ស័យម្នាក់ក្នុងចំណោមបក្សពួកពីនាក់ ។ ចំណែកជនដៃដល់រត់គេចខ្លួនបន្ទាប់ពីធ្វើសកម្មភាពកាប់សម្លាប់ទៅលើគូទំនាស់ដែលធ្លាប់មានរឿងវាយគ្នាកន្លងមក ។ ហេតុការណ៍កាប់សម្លាប់យ៉ាងសាហាវនេះបានកើតឡើងនៅវេលាម៉ោង១៨និង៤៥នាទី ថ្ងៃទី២៨ ខែមិថុនា ឆ្នាំ២០១៨ នៅចំណុចផ្ទះឈ្មោះ អ៊ូច នី ស្ថិតក្នុងភូមិខ្ពបក្រោម ឃុំខ្ពប ស្រុកស្អាង ខេត្តកណ្តាល ។
ជនរងគ្រោះមានឈ្មោះ ហ៊ ផានិត ហៅ ង៉ូវ ភេទប្រុស អាយុ២៤ឆ្នាំ ជនជាតិខ្មែរ មុខរបរកសិករ មានទីលំនៅភូមិឫស្សីស្រុក ឃុំខ្ពប ស្រុកស្អាង ខេត្តកណ្តាល (ស្លាប់) ។ ចំណែកជនសង្ស័យ និងជនដៃដល់ទី១-ឈ្មោះ អ៊ូច រី ហៅ ចូញ ភេទប្រុស អាយុ២៦ឆ្នាំ ជនជាតិខ្មែរ មុខរបរជាងថតរូប មានទីលំនៅភូមិខ្ពបក្រោម ឃុំខ្ពប ស្រុកស្អាង ខេត្តកណ្តាល និងទី២-ឈ្មោះ ស្រេង លីដា ភេទប្រុស អាយុ២៦ឆ្នាំ ជនជាតិខ្មែរ មានទីលំនៅភូមិឬស្សី ស្រុកឃុំខ្ពប ស្រុកស្អាង ខេត្តកណ្ដាល មុខរបរកសិករ(ឃាត់ខ្លួន) ។
លោកវរសេនីយ៍ សេង សុជាតិ អធិការនគរបាលស្រុកស្អាងបានប្រាប់អោយដឹងថា នៅថ្ងៃទី២៨ ខែមិថុនា ឆ្នាំ២០១៨ វេលាម៉ោង០៤និង០០នាទីរសៀល មានឈ្មោះ ឆាន់ ជ័រ ភេទប្រុស, ឈ្មោះ រុំ តុលា ភេទប្រុស, ឈ្មោះ ហ៊ ផានិត ហៅង៉ូវ (ជនរងគ្រោះ) និងឈ្មោះ ស្រេង លីដា ភេទប្រុស អ្នកទាំង៤បាននាំគ្នាផឹកស្រាថ្នាំក្លែមសាច់ឆ្កែនៅផ្លូវកែងភូមិបឹងខ្ពប ឃុំខ្ពប ផឹកស្រាអស់ចំនួនជាង១លីត្រ រួចឈ្មោះ រុំ តុលា បានខលហៅឈ្មោះ អ៊ូច រី ហៅចូញមកផឹកជាមួយពេលផឹកស្រាអស់ជាង៣លីត្រ ក៏បបួលគ្នាទៅច្រៀងខារ៉ាអូខេ នៅឃុំត្រើយស្លា ។
មុននឹងចេញទៅនាំគ្នាជិះម៉ូតូទៅផ្ទះរបស់ឈ្មោះ អ៊ូច រី ហៅចូញ ហើយរង់ចាំឈ្មោះ អូច រី ហៅ ចូញ ងូតទឹកសិន ។ ពេលនោះឈ្មោះ ឆាន់ ជ័រ និងឈ្មោះ រុំ តុលា បានជិះម៉ូតូចេញទៅមុន ។ នៅតែគ្នា៣នាក់ និងជនរងគ្រោះបានមួយសន្ទុះក្រោយមកឈ្មោះ ស្រេង លីដា បានដើរចេញទៅនោមក្រោយផ្ទះរួចចូលមកវិញក៏ឃើញឈ្មោះ ហ៊ ផានិត ហៅង៉ូវ ដេកលើឥដ្ឋមានឈាម ហើយឃើញឈ្មោះ អ៊ូច រី កាន់កាំបិតបុ័ងតោរួចក៏បានចាប់ឱបចង្កេះឈ្មោះ អ៊ូច រី កុំឲ្យកាប់ថែមទៀត ។
ឈ្មោះ អ៊ូច រី បានស្រែកថា លែងអញ អញកាប់វាថែមទៀត បានបន្តិចឈ្មោះ អ៊ូច រី ទំលាក់កាំបិតបុ័ងតោចោលរួចក៏ឡើងជិះម៉ូតូចេញទៅបាត់តែម្ដង ។ ចំណែកឈ្មោះ ស្រេង លីដា បានទៅតាមហៅបងប្អូនរបស់ជនរងគ្រោះមកមើល ហើយក៏ត្រលប់មកកន្លែងកើតហេតុវិញទើបសមត្ថកិច្ចហៅមកសាកសួរតែម្ដង ។ ករណីនេះកម្លាំង ជំនាញកំពុងកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ