រាជធានីភ្នំពេញ ៖ ស្ត្រីម្នាក់បានសុំឱ្យនគរបាលប៉ុស្ដិ៍ចោមចៅ២ជួយអន្តរាគមន៍ បន្ទាប់ពីប្ដីទី១ដែលបានលែងលះគ្នារួចទៅហើយ និងទើបចេញពីមណ្ឌលកែប្រែបន្សាបគ្រឿងញៀន បានរយៈពេល១អាទិត្យប៉ុណ្ណោះ កើតការប្រចណ្ឌពេលដែលដឹងថា នាងមានប្ដីថ្មីទៀត ដោយអតីតប្ដីទី១នេះ បានទាញកាំបិតដេញកាប់ប្ដីទី២របស់នាង…
រាជធានីភ្នំពេញ ៖ ស្ត្រីម្នាក់បានសុំឱ្យនគរបាលប៉ុស្ដិ៍ចោមចៅ២ជួយអន្តរាគមន៍ បន្ទាប់ពីប្ដីទី១ដែលបានលែងលះគ្នារួចទៅហើយ និងទើបចេញពីមណ្ឌលកែប្រែបន្សាបគ្រឿងញៀន បានរយៈពេល១អាទិត្យប៉ុណ្ណោះ កើតការប្រចណ្ឌពេលដែលដឹងថា នាងមានប្ដីថ្មីទៀត ដោយអតីតប្ដីទី១នេះ បានទាញកាំបិតដេញកាប់ប្ដីទី២របស់នាង បណ្ដាលឱ្យរងរបួសបែកក្បាលហូរឈាមសស្រាក់ ។
បន្ទាប់មកជនដៃដល់បានរត់គេចខ្លួនបាត់ស្រមោល ។ ចំណែកជនរងគ្រោះ ត្រូវបានប្រពន្ធនាំទៅសង្គ្រោះនៅមន្ទីរពេទ្យ ដោយមិនទាន់បានដាក់ពាក្យបណ្ដឹង ជាលាយលក្ខណ៍អក្សរភ្លាមៗនៅឡើយទេ ។ ហេតុការណ៍នោះ បានកើតឡើងកាលពីវេលាម៉ោង១០ព្រឹកថ្ងៃទី២៨ ខែមិថុនា នៅភូមិថ្មគោល២ សង្កាត់ចោមចៅ២ ខណ្ឌពោធិ៍សែនជ័យ ។
ជនដៃដល់មិនត្រូវបានស្គាល់ឈ្មោះពិតប្រាកដទេ គ្រាន់តែដឹងថា ឈ្មោះ វែង ចំណែកស្ត្រីជាប្រពន្ធនិងជនរងគ្រោះដែលជាប្ដីទី២ ក៏មិនត្រូវបានស្គាល់ឈ្មោះដែរ ព្រោះកំពុងនាំគ្នាទៅព្យាបាលរបួស ។ ចំណែកនគរបាលបានរង់ចាំទទួលពាក្យបណ្ដឹងរបស់ប្រពន្ធ និងប្ដីទី២នោះ រហូតដល់វេលាម៉ោង២រសៀលថ្ងៃដដែល ក៏នៅមិនទាន់ឃើញទៅដាក់ពាក្យនៅឡើយទេ ហើយបើទោះបីទៅរកនៅតាមមន្ទីរពេទ្យនិងគ្លីនិកជិតៗនោះក៏មិនឃើញដែរ ។
តាមប្រភពព័ត៌មានពីអ្នកជិតខាងឱ្យដឹងថា ស្ត្រីខាងលើមានប្ដីទី១ តែមិនបានរៀបការឡើយ ហើយក៏ជាមនុស្សចោលម្សៀតដែរ មិនគិតការងាររកស៊ីអ្វីទេ មួយថ្ងៃៗគិតតែពីដើរលេងពាលាអាវ៉ាសែ សេពគ្រឿងញៀនរហូតញៀនថ្នាំយ៉ាងងប់ងុល ។ ពេលនោះ នាងបានអង្វរករឱ្យឈប់ក៏មិនស្ដាប់ដែរ ទើបនាងនាំទៅដាក់នៅមណ្ឌលកែប្រែ និងបានលែងលះគ្នាដាច់ស្រេចថែមទៀតផង ។
ក្រោយមក នាងបានសម្រេចចិត្តយកប្ដីថ្មីទៀត តែក៏មិនបានរៀបការដូចគ្នា ។ ដោយសារការយកប្តីទី២នេះ ធ្វើឱ្យប្ដីទី១ខឹងខ្លាំងណាស់ទោះបីព្រមលែងលះហើយក្តី ។ប្រភពដដែលបន្តថា ជនជាប្តីទី១នោះបានជាប់នៅមណ្ឌកែប្រែបន្សាបគ្រឿងញៀនជាងកន្លះឆ្នាំហើយ ទើបតែចេញមកវិញបានរយៈពេល១អាទិត្យប៉ុណ្ណោះ លុះឃើញអតីតប្រពន្ធនិងប្ដីក្រោយរស់នៅជាមួយគ្នាយ៉ាងល្អូកល្អិននិងផ្អែមល្ហែមក៏កើតការប្រចណ្ឌ ។
បន្ទាប់មកជននេះបានតាមរករឿង និងទាញកាំបិតកាប់ប្ដីក្រោយរបស់អតីតប្រពន្ធ បណ្ដាលឱ្យរងរបួសបែករយះក្បាលហូរឈាមសស្រាក់តែម្ដង ។ ខណៈនោះបង្កឱ្យមានការភ្ញាក់ផ្អើលទាំងព្រឹក ហើយស្ត្រីរូបនេះបាននាំប្ដីក្រោយទៅសុំអន្តរាគមន៍ពីនគរបាលប៉ុស្តិ៍ចោមចៅ២ រួចក៏នាំប្ដីទៅកាន់មន្ទីរពេទ្យបាត់រហូតទៅ មិនទាន់ឃើញត្រឡប់ទៅដាក់ពាក្យបណ្ដឹងនៅឡើយ។ ជាមួយនឹងការរង់ចាំការដាក់ពាក្យបណ្តឹងនេះ សមត្ថកិច្ចក៏កំពុងតាមប្រមាញ់ជនដៃដល់ជាប្តីទី១នោះដែរ ៕
ចែករំលែកព័តមាននេះ