ខេត្តបាត់ដំបង ៖ ជនសង្ស័យចំនួន២នាក់ ត្រូវសមត្ថកិច្ចឃាត់ខ្លួនជាបន្តបន្ទាប់ កាលពីវេលាម៉ោង៦ព្រឹកថ្ងៃទី២៨ មិថុនា នៅចំណុចភូមិរ៉ា ឃុំធិបតី ស្រុកគាស់ក្រឡ ក្រោយពីសង្ស័យថា ជនទាំង២នាក់មានជាប់ពាក់ព័ន្ធនឹងករណីលួចប៊ូឡុងខ្ចៅចាប់ផ្លូវរថភ្លើងពីក្នុងឃ្លាំងក្នុងស្ថានីយរថភ្លើង។ មន្ត្រីនគរបាលស្រុកគាស់ក្រឡបានឲ្យដឹងថា ជនសង្ស័យទាំង២នាក់ដែលត្រូវឃាត់ខ្លួននោះ ម្នាក់ឈ្មោះសូ
ផុន ភេទប្រុស អាយុ២៣ឆ្នាំ ជាអ្នកលួច និងម្នាក់ទៀតឈ្មោះតក់ សារួន ភេទប្រុស អាយុ៤៨ឆ្នាំ ជាអ្នក
ទទូលទិញ ។ ជនសង្ស័យទាំង២នាក់រស់នៅភូមិរ៉ា ឃុំធិបតី ស្រុកគាស់ក្រឡ។ សមត្ថកិច្ចបាននិយាយថា ជនសង្ស័យឈ្មោះសូ ផុន បានចូលលួចដែកប៊ូឡុងខ្ចៅសម្រាប់ចាប់ផ្លូវរថភ្លើងពីក្នុងឃ្លាំង ស្ថិតក្នុងស្ថានីយរថភ្លើងស្រុកគាស់ក្រឡទាំងព្រលឹម រួចលីយកទៅលក់ឲ្យឈ្មោះសារួន តែត្រូវអ្នកយាមដឹងទើបប្ដឹងសមត្ថកិច្ចឲ្យចាត់វិធានការភ្លាមៗ ហើយថែមទាំងដកហូតបាននូវវត្ថុតាងទៀតផង។បើតាមការបំភ្លឺពីអ្នកមើលឃ្លាំងបានប្រាប់សមត្ថកិច្ចថា នៅព្រឹកនោះគេបានឃើញមានស្នាមគាស់ជញ្ជាំងឃ្លាំងចូលលួចសម្ភារនៅក្នុងឃ្លាំង ស្របពេលមានសាក្សីបានប្រទះឃើញជនសង្ស័យដឹកសម្ភារនោះ ទើបមានការសង្ស័យក៏ប្ដឹងទៅសមត្ថកិច្ចតែម្ដង។ ប្រភពដដែលបានបញ្ជាក់ថា ក្រោយពីមកសមត្ថកិច្ចបានឃាត់ខ្លួនជនសង្ស័យបានម្នាក់ ហើយក្រោយពីសាកសួរជាហ៊ានដំបូងទើបឈានដល់ការឃាត់ខ្លួនជនសង្ស័យពាក់ព័ន្ធបានម្នាក់ទៀតដែលជាអ្នកទទូលទិញផលចោរកម្ម។លោកជេត វណ្ណនី ស្នងការរងខេត្តបានថ្លែងថា ជាមួយនឹងការឃាត់ខ្លួនជនសង្ស័យទាំង២នាក់ខាងលើនេះ សមត្ថកិច្ចបានដកហូតវត្ថុតាងមានប៊ូឡុងខ្ចៅសំរាប់ធ្វើផ្លូវរថភ្លើងសរុប១១០គីឡូក្រាម។ ក្រោយពីដកហូតសមត្ថកិច្ចបានប្រគល់សម្ភារជួនអង្គភាពរដ្ឋវិញ ចំណែកជនសង្ស័យទាំង២នាក់ត្រូវបានឃាត់ខ្លួន ហើយមន្ត្រីជំនាញកំពុងសួរនាំ ដើម្បីរៀបចំសំណុំរឿងបញ្ជូនទៅសាលាដំបូងខេត្តហើយ៕
ចែករំលែកព័តមាននេះ