កងទ័ពប្រទេសសម្ព័ន្ធមិត្តកាលពីព្រឹកថ្ងៃទី២៤ មីនា បានបើកការវាយប្រហារតាមអាកាសមួយឈុតទៀត ប្រឆាំងកងកម្លាំងរបស់មេដឹកនាំផ្តាច់ការលីប៊ី លោកមូអាម៉ា កាដាហ្វី ជាថ្ងៃទី៦ នៃការវាយប្រហារតាមអាកាសរបស់ពួកលោកខាងលិច នៅលីប៊ីក្នុងកិច្ចខិតខំប្រឹងប្រែងបញ្ឈប់រដ្ឋាភិបាលប្រទេសនេះកុំឱ្យធ្វើការវាយប្រហារប្រឆាំងជនស៊ីវិលទៀត ។ ការវាយប្រហាររបស់ប្រទេសសម្ព័ន្ធមិត្តលើកចុងក្រោយនេះគឺសំដៅតំបន់ Tajura ជាយក្រុងទ្រីប៉ូលី រដ្ឋធានីលីប៊ី ក្រោយពីកងទ័ពស្ម័គ្រស្លាប់របស់លោកកាដាហ្វី វាយប្រហារប្រឆាំងមន្ទីរពេទ្យសំខាន់មួយ ។
ប៉ុន្តែទោះបីជាបែបណា ការវាយប្រហារលើកចុងក្រោយនេះពុំមានរបាយការណ៍ពីអ្នកស្លាប់ ឬរបួសនោះទេ ។
ដោយឡែកកាលពីថ្ងៃទី២៣ មីនា កន្លងមក កងទ័ពរបស់លោកកាដាហ្វីបានបើកការវាយប្រហារលើទីក្រុងនានា ដែលកាន់កាប់ដោយពួកឧទ្ទាមបង្ខំឱ្យជនស៊ីវិលរត់ភៀសខ្លួន ។ នាវាចម្បាំងរបស់អង្គការអូតង់ត្រូវបានបញ្ជូនឱ្យល្បាតតាមឆ្នេរសមុទ្រលីប៊ី ដើម្បីពង្រឹងការហ៊ុមព័ទ្ធអាវុធប្រឆាំងលោកកាដាហ្វី ។
អ្នកការទូតអង្គការអូតង់មួយរូបនិយាយថា សម្ព័ន្ធមិត្តដែលមាន២៨ប្រទេសជាសមាជិកនៅថ្ងៃទី២៤ មីនា នឹងព្យាយាមម្តងទៀត ដើម្បីឈានដល់ការសម្រេចថា តើការទទួលខុសត្រូវចំពោះការបញ្ជាប្រតិបត្តិការសឹកនៅលីប៊ី ដោយប្រទេសបារាំង អង់គ្លេស និងសហរដ្ឋអាមេរិក គួរតែប្រគល់ទៅឱ្យអង្គការអូតង់ ឬក៏អត់ ។
ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា មានទទូចជាថ្មីម្តងទៀតថា លោកកាដាហ្វីត្រូវតែចុះចេញពីតំណែងជាបន្ទាន់៕
ចែករំលែកព័តមាននេះ