រាជធានីភ្នំពេញ ៖ ព្រឹត្តិការណ៍បាល់ទាត់ដណ្ដើមពានរង្វាន់ពិភពលោក(World Cup)ប្រចាំឆ្នាំ២០១៨ នៅប្រទេសរុស្សុី ទទួលការចាប់អារម្មណ៍យ៉ាងខ្លាំងពីសំណាក់មនុស្សទូទាំងពិភពលោកក្នុងនោះក៏មានកម្ពុជាផងដែរ ខណៈមកដល់ពេលនេះ ការប្រកួតវគ្គជម្រុះក្នុងពូលបានបញ្ចប់ជាស្ថាពរហើយដោយរកឃើញ១៦ក្រុមដែលមានពិន្ទុខ្ពស់ជាងគេឡើងទៅវគ្គបន្ត ។ ជាមួយគ្នានេះ…
រាជធានីភ្នំពេញ ៖ ព្រឹត្តិការណ៍បាល់ទាត់ដណ្ដើមពានរង្វាន់ពិភពលោក(World Cup)ប្រចាំឆ្នាំ២០១៨ នៅប្រទេសរុស្សុី ទទួលការចាប់អារម្មណ៍យ៉ាងខ្លាំងពីសំណាក់មនុស្សទូទាំងពិភពលោកក្នុងនោះក៏មានកម្ពុជាផងដែរ ខណៈមកដល់ពេលនេះ ការប្រកួតវគ្គជម្រុះក្នុងពូលបានបញ្ចប់ជាស្ថាពរហើយដោយរកឃើញ១៦ក្រុមដែលមានពិន្ទុខ្ពស់ជាងគេឡើងទៅវគ្គបន្ត ។ ជាមួយគ្នានេះ ការទស្សន៍ទាយថាតើក្រុមណាមានសំណាងបានលើកពានក៏មានជាហូរហែផងដែរក្នុងចំណោមអ្នកគាំទ្របាល់ទាត់ទូទាំងពិភពលោកតាំងពីព្រឹត្តិការណ៍នេះមិនទាន់ចាប់ផ្ដើមម្ល៉េះ។
ដោយឡែក ចាន់ វឌ្ឍនាកា ដែលជាតារាបាល់ទាត់ដ៏មានប្រជាប្រិយបំផុតនៅក្នុងប្រទេស
កម្ពុជាដែលបច្ចុប្បន្នបានវិលមកជ្រកក្រោមទ្រនំចាស់នៃក្លិបបឹងកេតអែហ្វសុី បន្ទាប់ពីចែកផ្លូវជាមួយក្លិប Pahang FC នៅក្នុងលីគកំពូលម៉ាឡេសុី ក៏បានបង្ហាញពីចំណាប់អារម្មណ៍របស់ខ្លួនចំពោះព្រឹត្តិការណ៍នេះផងដែរ ។
ជួបអ្នកយកព័ត៌មានឱ្យ កោះសន្តិភាព ចាន់ វឌ្ឍនាកា ប្រាប់ថា លោកបានតាមដានការប្រកួតតាមកញ្ចក់ទូរទស្សន៍មិនសូវដែលខានឡើយតាំងពីព្រឹត្តិការណ៍កីឡាលំដាប់ពិភពលោកមួយនេះចាប់ផ្ដើមភ្លាមម្ល៉េះដោយសារតែលោកចង់ដកស្រង់បទពិសោធន៍ក៏ដូចជាបច្ចេកទេសប្រកួតរបស់កីឡាករល្បីៗមកពីក្រុមជម្រើសជាតិទាំង៣២ប្រទេសមកអភិវឌ្ឍខ្លួនឱ្យមានទម្រង់លេងកាន់តែល្អឡើង ។ បន្ទាប់ពីតាមដានការប្រកួតស្ទើរតែគ្រប់ក្រុមរួចមក ខ្សែប្រយុទ្ធរបស់ក្រុមជម្រើសជាតិកម្ពុជាលេងឱ្យក្លិបបឹងកេតអែហ្វសុី វ័យ២៤ឆ្នាំរូបនេះ ប្រាប់ថា ក្រុមដែលលោកពេញចិត្តជាងគេគឺអង់គ្លេស បន្ទាប់មកព័រទុយហ្គាល់ដែលមានកីឡាករ គ្រីស្ទីណូ រូណាល់ដូ ជាអាយដល(Idol)របស់លោក ។
ចាន់ វឌ្ឍនាកា បានឱ្យដឹងទៀតថា សម្រាប់ការប្រកួតបាល់ទាត់ពានរង្វាន់ពិភពលោកនៅប្រទេសរុស្សុី ឆ្នាំ២០១៨នេះ បើតាមការប្រមើលមើលរបស់លោក ក្រុមជម្រើសជាតិអង់គ្លេសមានឱកាសលើកពានច្រើនជាងក្រុមផ្សេងដោយសារក្រុមដែលមានរហស្សនាមថា «តោកំណាច» មួយនេះ សម្បូរទៅដោយកីឡាករល្អៗច្រើន លេងស៊ីសង្វាក់គ្នា សហការគ្នាបានល្អ ថែមទាំងរត់លឿនទៀតផង ។
លោកថា ទស្សនាការប្រកួតបាល់ទាត់ពិភពលោកជារៀងរាល់យប់បែបនេះ ក្នុងនាមរូបលោកជាកីឡាករបាល់ទាត់អាជីពមួយរូបពិតជាទទួលផលចំណេញច្រើនតាមរយៈការទទួលបាននូវបទពិសោធន៍ និងបច្ចេកទេសល្អៗពីកីឡាករលំដាប់ពិភពលោក យកមកបំពេញបន្ថែមទៅលើចំណុចខ្វះខាតរបស់ខ្លួន។
គួររំលឹកផងដែរថា កីឡាករ ចាន់ វឌ្ឍនាកាចាប់តាំងពីចែកផ្លូវគ្នាជាមួយក្លិប Pahang FC នៅក្នុងលីគកំពូលម៉ាឡេសុីកាលពីពេលថ្មីៗកន្លងមកនេះ បានចុះកិច្ចសន្យាលេងឱ្យក្លិបបឹងកេតអែហ្វសុី ដែលលោកធ្លាប់ជ្រកកោនវិញ គ្រាន់តែគេមិនដឹងថា មានរយៈពេលប៉ុន្មានឆ្នាំប៉ុណ្ណោះ ។
បើតាមព័ត៌មានមិនទាន់ជាផ្លូវការថា មានក្លិបបរទេសបានមកចែចូវឱ្យកីឡាកររូបនេះទៅលេងនៅក្លិបរបស់គេដែរ តែមិនដឹងថាក្លិបនោះនៅក្នុងប្រទេសណានៅឡើយទេ ដោយសារសាមីខ្លួនមិនទាន់ចង់ឱ្យដឹងជាសាធារណៈ៕
ចែករំលែកព័តមាននេះ