ខេត្តកំពង់ស្ពឺ ៖ ដីបឹងធារាសាស្ត្រដែលស្តុកទឹករាប់រយហិកតាសម្រាប់បងប្អូនប្រជាពលរដ្ឋប្រើប្រាស់ស្រោចស្រពធ្វើស្រែស្រូវចំការ ប៉ុន្តែពេលនេះត្រូវបានក្រុមឈ្មួញសង្ស័យឃុបឃិតគ្នាជាប្រព័ន្ធចាក់ដីលុបជាបណ្តើរៗហើយ ខណៈដែលប្រជាពលរដ្ឋមានការងឿងឆ្ងល់ពីមុនជាដីបឹងធារាសាស្ត្របច្ចុប្បន្នមានបង្គោលបោះជិតក្លាយទៅជាដីពុះឡូត៍លក់ទៅហើយនោះ ។ ដីបឹងដែលគេកំពុងតែចាក់ដីលុបនោះមានទីតាំងតាមបណ្តោយផ្លូវជាតិលេខ៤ ស្ថិតនៅក្នុងភូមិវល្លិប្រេង ឃុំកាហែង ស្រុកសំរោងទង ខេត្តកំពង់ស្ពឺ ។
បើតាមសម្តីរបស់ប្រជាពលរដ្ឋម្នាក់ឈ្មោះ ម៉ី សុខនី អាយុ៥៧ឆ្នាំ ជាប្រជាពលរដ្ឋរស់នៅក្នុងភូមិវល្លិប្រេង ឃុំកាហែង ស្រុកសំរោងទង ខេត្តកំពង់ស្ពឺ បាននិយាយថា ដីបឹងនេះមានតាំងពីយូរលុងណាស់មកហើយជាដីបឹងធារាសាស្ត្រសម្រាប់ស្តុកទឹកអោយប្រជាពលរដ្ឋប្រើប្រាស់ក៏ដូចជាស្រោចស្រពដំណាំ ស្រែស្រូវ ចំការនានា ប៉ុន្តែស្រាប់តែជិតមួយខែមកនេះប្រជាពលរដ្ឋបានឃើញមានគេយកបង្គោលទៅបោះដង្ហែរគ្នាហាក់បីដូចជាបែងចែកជាកម្មសិទ្ធិទៅហើយ មិនដឹងជាខាងណាជាអ្នកអនុញ្ញាតិនោះទេ ហើយមិនយូរប៉ុន្មានក៏ឃើញមានក្រុមរថយន្តដឹកដីយកមកចាក់លុបដីបឹងនេះមិនត្រឹមតែប៉ុណ្ណោះចាក់លុបទាំងលូ(ផ្លូវទឹក)របស់ប្រជាពរដ្ឋដែលតែងតែប្រើប្រាស់ទឹកនេះថែមទៀតផង ។
ម្ចាស់គ្រឿងចក្រត្រូវបានស្គាល់មានឈ្មោះ រីម ហើយមេការអ្នកម្ចាស់ដីនោះមានឈ្មោះ ផេង ដែលការចាក់ដីនេះទៀតសោតគេអះអាងថា បានសុំច្បាប់ចាប់តាំងពីភូមិ ឃុំ ស្រុក ទៀតផង ហើយការដឹកដីតាមរថយន្តមកចាក់លុបដីបឹងនេះធ្វើកិច្ចសន្យាថា មិនអោយមានដីប្រឡាក់ផ្លូវជាតិឡើយរថយន្តឹកដីត្រូវមានគ្របតង់អោយបានត្រឹមត្រូវ មិនត្រូវចាក់ដីលុបប្រព័ន្ធប្រឡាយបង្ហូរទឹក និងប្រឡាយសាធារណៈត្រូវដាក់លូរបង្ហូរទឹកតាមប្រឡាយទឹកខាងមុខដីឡូត៍ ប៉ុន្តែការសន្យារបស់ក្រុមឈ្មួញចាក់ដីលុបដីបឹងធារាសាស្ត្រនោះបានត្រឹមតែធ្វើកិច្ចសន្យាប៉ុណ្ណោះ ។ ប្រជាពលរដ្ឋសំណូមពរដល់អាជ្ញាធរ ស្រុក ខេត្ត និងជំនាញពាក់ពន្ធ័មេត្តាជួយចុះពិនិត្យមើលទង្វើរចាក់ដីលុបបឹងមួយនេះផង ។
ពាក់ពន្ធ័នឹងការចាក់ដីលុបដីបឹងនេះដែលលោកស្រី ព្រំ នី មេឃុំកាហែងបាននិយាយថា ការចាក់ដីនេះមានការសុំច្បាប់ត្រឹមត្រូវ ឃុំ ស្រុក ខេត្ត ថែមទៀតផង ។ ចំណែកលោក ញ៉ាញ់ ជាបហ៊ង់ ប្រធានមន្ទីរធនធានទឹកបាននិយាយថា ការចាក់ដីនេះមិនប៉ះពាល់ដល់ដីបឹងធារាសាស្ត្រនោះទេ កន្លែងនោះជាដីដែលម្ចាស់ធ្លាប់អាស្រ័យផល ។ ហើយម្យ៉ាងទៀតការចាក់ដីនេះខាងជំនាញ និងអាជ្ញាធរបានអោយធ្វើកិចសន្យាក្នុងការចាក់ដីអោយបានត្រឹមត្រូវដោយអោយម្ចាស់គោរពតាមកិច្ចសន្យានោះសំខាន់កុំចាក់លុបលូរបង្ហូរ និងប្រឡាយទឹករបស់ប្រជាពលរដ្ឋប្រើប្រាស់អោយសោះ ៕
ចែករំលែកព័តមាននេះ