ខេត្តក្រចេះ ៖ ប៉ូលិសបានឃាត់ខ្លួនបុរសម្នាក់ដែលជាឪពុកចុងតាមពាក្យបណ្ដឹងរបស់ម្ដាយក្មេងស្រីរងគ្រោះ ដែលបានចោទប្រកាន់ថា បុរសរូបនេះបានធ្វើសកម្មភាពចាប់រំលោភកូនស្រីគាត់ដែលទើបមានអាយុ១២ឆ្នាំ រហូតបានសំរេចនៅក្នុងព្រៃចំការស្វាយចន្ទី។ បុរសជាប់ចោទរូបនេះឈ្មោះថាន់ នឿន អាយុ៤១ឆ្នាំ ប្រពន្ធឈ្មោះយ៉ន សាម៉ុន អាយុ៤១ឆ្នាំ រីឯក្មេងស្រីរងគ្រោះជាកូនប្តីមុនរបស់ស្ដ្រីជាប្រពន្ធមានអាយុ១២ឆ្នាំ ក្នុងចំណោមបងប្អូនពីរនាក់ ហើយគ្រួសារនេះរស់នៅក្នុងឃុំស្រែចារ ស្រុកស្នួល ។
ទាក់ទិននឹងការចាប់ឃាត់ខ្លួនឪពុកចុងនេះមន្ដ្រីប៉ូលិសការិយាល័យជួញដូរមនុស្សនិងការពារអនីតិជននៃស្នងការដ្ឋាននគរបាលខេត្ដបានឱ្យដឹងថា កាលពីវេលាម៉ោង៧យប់ ថ្ងៃទី១៣ មីនា បុរសជាប់ចោទបានប្រើល្បិចបបួលក្មេងស្រីរងគ្រោះទៅរើសគ្រាប់ស្វាយចន្ទី នៅខាងក្រោយភូមិមានចម្ងាយជាង៤រយម៉ែត្រពីផ្ទះរួចបានធ្វើសកម្មភាពចាប់រំលោភក្មេងស្រីរងគ្រោះរហូតបានសម្រេច។ មន្ដ្រីដដែលបានឱ្យដឹងទៀតថា ក្រោយពីចាប់រំលោភរួច បុរសជាប់ចោទបាននាំនាងទៅនៅផ្ទះជីតាខាងម្ដាយ ហើយក្មេងស្រីរងគ្រោះក៏បានយករឿងឪពុកចុងចាប់រំលោភនេះប្រាប់ជីតាទើបដឹងដល់ម្ដាយនាងដាក់ពាក្យបណ្ដឹងមកសមត្ថកិច្ចធ្វើការឃាត់ខ្លួនតែម្ដង។
នៅមុខសមត្ថកិច្ចឪពុកចុងជាប់ចោទរូបនេះបានសារភាពថា ខ្លួនពិតជាបានចាប់រំលោភកូនស្រីរហូតបានសម្រេចមែន ខណៈពេលដែលខ្លួនស្រវឹងបាត់ស្មារតី និងផ្ទុះតណ្ហាទ្រាំមិនបានក៏ចាប់កូនស្រីចុងរូបនេះរំលោភតែម្តង។
តាមការរៀបរាប់របស់ស្ដ្រីជាម្ដាយបានឱ្យដឹងថា គាត់បានយកបុរសជាប់ចោទរូបនេះធ្វើប្ដីអស់រយៈពេល៥ឆ្នាំមកហើយ និងមានកូនប្រុស១ រីឯកូនប្ដីដើមមានពីរនាក់ស្រីម្នាក់ ប្រុសម្នាក់ ហើយកូនស្រីរងគ្រោះគឺជាកូនច្បង។
លោកវរសេនីយ៍ត្រី កែវ ស្រីសី នាយការិយាល័យប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្ដបានមានប្រសាសន៍ថា យោងតាមពាក្យបណ្តឹងរបស់ម្តាយក្មេងស្រីរងគ្រោះ និងចម្លើយសារភាពរបស់ជនជាប់ចោទ សមត្ថកិច្ចជំនាញបានកសាងសំណុំរឿងបញ្ជូនទៅកាន់សាលាដំបូងខេត្ដ កាលពីព្រឹកថ្ងៃទី១៥ មីនា ដើម្បីចាត់វិធានការទៅតាមផ្លូវច្បាប់បន្ដទៀត ៕
ចែករំលែកព័តមាននេះ