រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក សេង រិទ្ធី កាលពីថ្ងៃទី២៨ មិថុនា បានសម្រចធ្វើការដោះលែងអនុប្រធាននាយកដ្ឋានម្នាក់ដែលបើកបរបង្កគ្រោះថ្នាក់ចរាចរណ៍ និង…
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក សេង រិទ្ធី កាលពីថ្ងៃទី២៨ មិថុនា បានសម្រចធ្វើការដោះលែងអនុប្រធាននាយកដ្ឋានម្នាក់ដែលបើកបរបង្កគ្រោះថ្នាក់ចរាចរណ៍ និង ដកអាវុធខ្លី ភ្ជង់គំរាមលើសមត្ថកិច្ចសមត្ថកិច្ចនគរបាលចរាចរណ៍ខណ្ឌចម្ការមន ឲ្យមានសេរីភាពវិញ។ អនុប្រធាននាយកដ្ឋានរូបនោះឈ្មោះ ម៉ៅ ច័ន្ទរស្មី ភេទប្រុស អាយុ៤១ឆ្នាំ មានទីលំនៅផ្ទះលេខ១៤E ផ្លូវ ២១៧ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ បម្រើការងារនៅនាយកដ្ឋានបច្ចេកទេស និង អភិវឌ្ឍលំនៅដ្ឋាន នៃក្រសួងរៀបចំដែនដីនគរូបនីយកម្ម និងសំណង់។
លោក ម៉ៅ ច័ន្ទរស្មី បានត្រូវលោក កុល បុន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញចោទប្រកាន់ពីបទ គំរាមកំហែង ហើយបានចាត់បញ្ជូនទៅខាងចៅក្រមស៊ើបសួរដើម្បីសម្រេចឃុំខ្លួន ឬមិនឃុំខ្លួន អាស្រ័យលើឆន្ទានុសិទ្ធ របស់លោកចៅក្រមកាន់សំណុំរឿងនោះ។ គួរបញ្ជាក់ថា កាលពីវេលាម៉ោង៥ និង១០នាទីល្ងាច ថ្ងៃទី២៥ មិថុនា លោក ម៉ៅ ច័ន្ទរស្មី បានបើករថយន្ដម៉ាក toyota higlander ពណ៌ស ពាក់ស្លាកលេខ ភ្នំពេញ ២AF-៩៧៦៦ បុកគូទរថយន្តគេមួយគ្រឿងម៉ាក toyota prius ពណ៌ទឹកប្រាក់ ពាក់ស្លាកលេខ ភ្នំពេញ ២AT-១៩១៤ បើកបរដោយឈ្មោះ ហ៊ុន សំសែនឧត្តម ភេទប្រុស អាយុ៣៥ឆ្នាំ ស្នាក់នៅផ្ទះគ្មានលេខ ផ្លូវបេតុង ភូមិសន្សំកុសល សង្កាត់បឹងទំពុន ខណ្ឌមានជ័យ រាជធានីភ្នំពេញ មុខរបរ បុគ្គលិកក្រុមហ៊ុន បណ្ដាលឱ្យរងការខូចខាតបន្តិចបន្តួច។
តែពេលនោះលោក ម៉ៅ ច័ន្ទរស្មី មិនបានចុះពីលើរថយន្តមកដោះស្រាយគ្នាទេ រួចបានដេកលក់នៅក្នុងរថយន្ដតែម្ដង។ បន្ទាប់ពីទទួលបានព័ត៌មាននេះ សមត្ថកិច្ចនគរបាលចរាចរណ៍ខណ្ឌចម្ការមន បានចុះទៅដល់កន្លែងកើតហេតុ និងបានគោះកញ្ចក់រថយន្តជនបង្ក ដើម្បីសម្រុះសម្រួលជាមួយភាគីម្ខាងទៀត។ ស្រាប់តែពេលនោះលោក ម៉ៅ ច័ន្ធរស្មី បានដកកាំភ្លើងខ្លី១ដើមម៉ាក Beretta ពណ៌ទឹកប្រាក់ ភ្ជង់ទៅលើសមត្ថកិច្ចនគរបាល រួចបើករថយន្តរត់គេចខ្លួន។
លុះដល់ផ្លូវ១៦៣ ក្នុងសង្កាត់ទួលទំពូង១ ខណ្ឌចម្ការមន ត្រូវបានសមត្ថកិច្ចនគរបាលដេញស្ទាក់ឃាត់បាន រួមទាំងដកហូតវត្ថុតាងអាវុធខ្លី១ដើមផង និង បាននាំខ្លួនទៅធ្វើការសាកសួរ ហើយបានកសាងសំណុំរឿងបញ្ជូន ទៅកាន់សាលាដំបូងរាជធានីភ្នំពេញតាមនីតិវិធី។ ប៉ុន្តែក្រោយពីតំណាងអយ្យការចោទប្រកាន់ហើយ ដល់ចៅក្រមស៊ើបសួរយល់ឃើញថា សំណងរដ្ឋប្បវេណីត្រូវបានបញ្ចប់ ដូច្នោះការចោទប្រកាន់ពីស្ថាប័នអយ្យការក៏ត្រូវរលត់ដែរ៕
ចែករំលែកព័តមាននេះ