ខេត្តព្រះវិហារ ៖ ប្រជាកសិករដាំដំណាំសណ្តែកបាយនៅខេត្តព្រះវិហារឆ្នាំនេះពួកគាត់សប្បាយចិត្ត ខណៈទទួលទិន្នផលសណ្តែកបាយរបស់ពួកគាត់មានគុណភាពល្អ រីឯតម្លៃវិញក៏ទទួលបានសមរម្យមិនដូចឆ្នាំមុនៗឡើយ ដូច្នេះពួកគាត់អាចទទួលបានផលចំណេញពីការ លក់សណ្តែកបាយនេះសម្រាប់ផ្គត់ផ្គង់ជីវភាពប្រចាំថ្ងៃ ។
លោក ហាក់ ឈុនលី ជាកសិកររស់នៅភូមិស្រម៉ូវ សង្កាត់ប៉ាលហាល ក្រុងព្រះវិហារបានលើកឡើងថា ឆ្នាំនេះរូបគាត់បានដាំដុះសណ្តែកបាយនៅលើផ្ទៃដីចំនួន២ហិតាចាប់តាំងពីពេលដាំដុះរហូតមកដល់ថ្ងៃប្រមូលផលឃើញថា ទទួលបានទិន្នផលល្អជាងឆ្នាំមុនៗព្រោះពុំមានបាតុភាពអ្វីមកយាយីដំណាំរបស់ពួកគាត់ដូចកាលពី២ឆ្នាំមុនដោយសារសត្វដង្កូវហ្វូងនោះទេ ។
កសិករដដែលលើកឡើងថា ក្នុងផ្ទៃដីដាំដុះ២ហិតារបស់គាត់ទទួលបានទិន្នផលប្រមាណជិត៣តោនគុណភាពក៏ល្អ រីឯតម្លៃវិញក៏បានសមរម្យនៅក្នុងចន្លោះតម្លៃ២៥០០រៀលទៅ៣០០០រៀលក្នុងមួយគីឡូក្រាម បើប្រៀបធៀបនឹងឆ្នាំ២០១៧កន្លងទៅសណ្តែកបាយបានតម្លៃត្រឹម តែ១៧០០រៀលតែប៉ុណ្ណោះដែលធ្វើឲ្យពួកគាត់ជួបប្រទះការខាតបង់ម្តងហើយកាលពីឆ្នាំមុន ។
ជាមួយគ្នានេះលោក ពឹង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារ មានប្រសាសន៍ថា ក្នុងឆ្នាំ២០១៨នេះឃើញថា អាកាសធាតុនៅក្នុងរដូវវស្សានេះមានអំណោយផលល្អសម្រាប់កសិករដាំដុះដំណាំគ្រប់ប្រភេទជាក់ស្តែងដូចជា ដំណាំសណ្តែកបាយដែលត្រូវការទឹកភ្លៀងជាចាំបាច់សម្រាប់ការលូតលាស់ និងការពារមិនឲ្យមានសត្វល្អិតផ្សេងៗស៊ីបំផ្លាញដំណាំ ។ តែទោះជាយ៉ាងនេះក្តីលោកប្រធានមន្ទីរបានរំឭកថា កាលពីឆ្នាំ២០១៦កន្លងទៅខេត្តព្រះវិហារបានជួបនៅបាតុភាពធម្មជាតិដែលបំផ្លាញដោយសត្វដង្កូវហ្វូងស៊ីបំផ្លាញដំណាំសណ្តែកបាយដំណាំស្រូវរបស់កសិករជាច្រើនហិតាដោយសារតែកត្តាភ្លៀងធ្លាក់ពុំបានគ្រប់គ្រាន់ និងមានអាកាសធាតុក្តៅធ្វើឲ្យសត្វដង្កូវមានឱកាសចូលស៊ីបំផ្លាញដំណាំរបស់កសិករ ពិសេសស្រែចម្ការដែលនៅក្បែរចម្ការចេក និងតំបន់ព្រៃងាយរងគ្រោះជាងគេ ។
លោក ពឹង ទ្រីដា បន្ថែមថា ក្រោយពេលដែលកសិករបានប្រមូលផលសណ្តែកបាយនៅចុងខែមិថុនា និងដើមខែកក្កដានេះរួចរាល់ពួកគាត់នឹងបន្តភ្ជួររាស់ដីសារជាថ្មីឡើងវិញសម្រាប់ធ្វើការដាំដុះដំណាំសណ្តែកសៀងម្តងដោយមិនទុកដីចោលឲ្យនៅទំនេរឡើយ ។ លោកក៏បានអំពាវនាវឲ្យប្រជាកសិករទាំងអស់ដែលមានចម្ងល់ និងជួបបញ្ហាផ្សេងៗទាក់ទិននឹងការដាំដុះដំណាំកសិកម្មមន្ទីរជំនាញ និងចាត់មន្ត្រីជំនាញចុះប្រឹក្សាយោបល់ជូនកសិករគ្រប់ពេលវេលា ។ យោងតាមរបាយការណ៍របស់មន្ទីរកសិកម្មរុក្ខាប្រមាញ់ និងនេសាទខេត្តព្រះវិហារក្នុងឆ្នាំ២០១៨ នេះបានបង្ហាញថា ផ្ទៃដីដាំដុះដំណាំសណ្តែកបាយមានប្រមាណជាង១ម៉ឺនហិតា បើប្រៀបធៀបនឹងឆ្នាំមុនមានផ្ទៃដីប្រហាក់ប្រហែលគ្នា ៕
ចែករំលែកព័តមាននេះ