រាជធានីភ្នំពេញ ៖ តន្ត្រីករនៅខេត្តកំពង់ចាម និងកំពង់ស្ពឺបានសម្តែងការមិនពេញចិត្តចំពោះថៅកែវង់ភ្លេងដែលតម្រូវឲ្យពួកគេប្រគំក្រោយពេលហែជំនូនក្នុងពិធីមង្គលការបន្ថែមទៀត ខុសពីធម្មតាប្រគំតែពេលទទួលភ្ញៀវជប់លៀងប៉ុណ្ណោះ ។ វាធ្វើឲ្យប៉ះពាល់ដល់ពួកគេចំពោះការបន្ថែមការប្រគំបែបនោះ ។ បើយោងតាមសារដែលបង្ហោះកាលពីពេលថ្មីៗកន្លងមកដោយតំណាងសិល្បករ សិល្បការិនី…
រាជធានីភ្នំពេញ ៖ តន្ត្រីករនៅខេត្តកំពង់ចាម និងកំពង់ស្ពឺបានសម្តែងការមិនពេញចិត្តចំពោះថៅកែវង់ភ្លេងដែលតម្រូវឲ្យពួកគេប្រគំក្រោយពេលហែជំនូនក្នុងពិធីមង្គលការបន្ថែមទៀត ខុសពីធម្មតាប្រគំតែពេលទទួលភ្ញៀវជប់លៀងប៉ុណ្ណោះ ។ វាធ្វើឲ្យប៉ះពាល់ដល់ពួកគេចំពោះការបន្ថែមការប្រគំបែបនោះ ។
បើយោងតាមសារដែលបង្ហោះកាលពីពេលថ្មីៗកន្លងមកដោយតំណាងសិល្បករ សិល្បការិនី តន្ត្រីករ ឈ្មោះនិល ច័ន្ទរតនា និងបានចែកចាយដោយអ្នកនាងខាត់ សុឃីម នោះឲ្យថា «យើងខ្ញុំជាសិល្បករ សិល្បការិនី ជាតន្ត្រីករ ផ្នែកតន្ត្រីសម័យ ដែលរស់នៅក្នុងខេត្តកំពង់ចាមនិងមកពីបណ្តាខេត្តនានា ដែលគេបានជួលទៅបម្រើការសិល្បៈ នៅក្នុងខេត្តកំពង់ចាម កំពុងតែមានការព្រួយបារម្ភយ៉ាងខ្លាំងអំពីសុវត្ថិភាពនៃអាយុជីវិតរបស់ពួកខ្ញុំ ។
មូលហេតុគឺ៖ គ្រប់ថៅកែក្រុមតន្ត្រីសម័យទាំងអស់នៅក្នុងខេត្តកំពង់ចាម តែងតែប្រឡងប្រណាំងគ្នាដោយចង់បានការចំណេញច្រើន និងចង់បានភាពល្បីឈ្មោះ និងរោងលេងច្រើន ដោយចាប់ផ្តើមឲ្យអ្នកភ្លេង អ្នកចម្រៀងសម័យ ត្រូវចាប់ប្រគំនៅវេលាម៉ោង៧ព្រឹក ដើម្បីទទួលក្នុងកម្មវិធីហែកំណត់កូនកំលោះចូលរោងការ ដែលខុសពីទំនៀមទម្លាប់ខ្មែរបុរាណដែលគេតម្រូវឲ្យតែផ្នែកតន្ត្រីបុរាណជាអ្នកប្រគំដង្ហែកូនកំលោះប៉ុណ្ណោះ ។
មូលហេតុដូចបានជម្រាបខាងលើនេះហើយ ដែលធ្វើឲ្យយើងខ្ញុំត្រូវចេញដំណើរមិនថាថ្ងៃ ឬយប់ម៉ោងប៉ុន្មានក៏ដោយ គឺត្រូវទៅរៀបចំឆាកឲ្យទាន់វេលាហែកំណត់ជាកំហិត ដូច្នេះវាបានធ្វើឲ្យរងការប៉ះពាល់ជាច្រើន ដូចជា អត់ងងុយ សម្រាកមិនគ្រប់គ្រាន់ ព្រោះត្រូវធ្វើដំណើរតាមផ្លូវមិនថាជិតឆ្ងាយ គ្រោះថ្នាក់ចរាចរបណ្តាលមកពីតៃកុងប្រញាប់ តៃកុងអត់ងងុយ ខ្យល់គរស្លាប់ ហើយអ្នកខ្លះឈានដល់ការប្រើប្រាស់គ្រឿងញៀនដែលវាអាចជួយមិនឲ្យដេកលក់បាន និងមានមូលហេតុ ផ្សេងៗទៀតដែលយើងខ្ញុំរៀបរាប់មិនអស់ ។
យើងខ្ញុំសុំសំណូមពរពីលោកគណៈអភិបាលខេត្តកំពង់ចាម មេត្តាជួយបញ្ចប់នូវកំហុសឆ្គងរបស់ថៅកែភ្លេងទាំងអស់នេះផង គឺសុំឲ្យលោកគណៈអភិបាលចេញលិខិតបង្គាប់ជូនលោកចៅហ្វាយស្រុក លោកមេឃុំ លោកនាយប៉ុស្តិ៍ ឲ្យចុះជូនដំណឹងមិនឲ្យមានការប្រគំតន្ត្រីសម័យទទួលហែកំណត់ពេលព្រឹកជាដាច់ខាត ហើយជាពិសេសសុំជូនដំណឹងដល់លោកថៅកែភ្លេងសម័យឲ្យបានដឹង គ្រប់ៗផង ។ សង្ឃឹមថាលោកគណៈអភិបាលបានជ្រាប និងយល់ព្រមតាសំណូមពរយើងខ្ញុំដោយអនុគ្រោះ »។
តារាកំប្លែងនាយក្រូច បានឲ្យដឹងថា ថៅកែវង់ភ្លេងមួយរូបក្នុងខេត្តកំពង់ស្ពឺ មានក្រុមតន្ត្រី ២៨០ វង់ជាង ទូទាំងប្រទេស គ្រោងធ្វើលិខិតមួយទៅអាជ្ញាធរពាក់ព័ន្ធ ដើម្បីលុបបំបាត់ការលេងភ្លេងសម័យពេលព្រឹកក្នុងកម្មវិធីហែកំណត់ ព្រោះខុសពីប្រពៃណីខ្មែរ និងជាហេតុធ្វើឲ្យមានគ្រោះថ្នាក់ចរាចរណ៍ដោយសារតែការខំទៅឲ្យទាន់កម្មវិធីទាំងយប់ទាំងមិនបានដេកពួន ។
នាយក្រូចបញ្ជាក់ថា លិខិតនោះនៅមិនទាន់ឯកភាពគ្នាទាំងស្រុងនៅឡើយទេ ដោយក្រុមរបស់លោកគ្រោងប្រជុំគ្នានៅដើមខែកក្កដា ដើម្បីសម្រេចដាក់ទៅជូនស្ថាប័នពាក់ព័ន្ធ ឬធ្វើសន្និសីទកាសែតតែម្ដង ៕
ចែករំលែកព័តមាននេះ