រាជធានីភ្នំពេញ ៖ ក្រសួងការពារជាតិបានចេញថ្លែងការណ៍ប្រតិកម្មរបាយការណ៍របស់អង្កការឃ្លាំមើលសិទ្ធិមនុស្សកម្ពុជា ហៅកាត់ថា HRW មានបំណងញុះញង់មិនសមហេតុផល និងគ្មានមូលដ្ឋាន ។ ការប្រតិកម្មរបស់ក្រសួងការពារជាតិ បន្ទាប់ពីអង្គការឃ្លាំមើលសិទ្ធិមនុស្សបានចេញផ្សាយរបាយការណ៍មួយដោយចោទប្រកាន់មន្ត្រីជាន់ខ្ពស់ចំនួន១២រូបនៃកងកម្លាំងប្រដាប់អាវុធកម្ពុជា ជាមនុស្សបាតដៃកខ្វក់ក្នុងការរំលោភសិទ្ធិមនុស្សនៅកម្ពុជា ។
យ៉ាងណាក្តីក្រសួងការពារជាតិបានសេចក្តីថ្លៃងការណ៍នៅថ្ងៃទី២៨ មិថុនា ឆ្នាំ២០១៨ ដោយបានសម្តែងការសោកស្តាយយ៉ាងខ្លាំងចំពោះរបាយការណ៍របស់អង្គការឃ្លាំមើលសិទ្ធិមនុស្សដែលេចេញផ្សាយនៅថ្ងៃទី២៨ មិថុនា ជាការបំភ្លៃការពិតមានបំណងញុះញង់ចោទប្រកាន់ដោយគ្មានមូលដ្ឋាន និងមិនសមហេតុផលមកលើមន្ត្រីជាន់ខ្ពស់១២រូបនៃកងប្រដាប់អាវុធនៃព្រះរាជាណាចក្រកម្ពុជា ។
ថ្លែងការណ៍បានគូសបញ្ជាក់ថា«ការប្រឌិតរបាយការណ៍បែបឆ្កួតលីលារបស់ក្រុមនេះ គឺជាការរំលោភបំពានម្តងហើយម្តងទៀត មកលើអធិបតេយ្យភាព ឯករាជ្យភាព និងនីតិរដ្ឋរបស់ព្រះរាជាណាចក្រកម្ពុជា ដើម្បីបម្រើនយោបាយទុច្ចរិតរបស់ជនបរទេសមួយចំនួន និងក្រុមអ្នកនយោបាយក្បត់ជាតិដែលបានប៉ុនប៉ងបង្កើតបដិវត្តន៍ពណ៌ បំផ្លិចបំផ្លាញដល់សន្តិភាព និងសេចក្តីសុខរបស់ជនប្រជាពលរដ្ឋខ្មែរ ហើយបើទោះបីជាផែនការបដិវត្តន៍ពណ៌នេះបានបរាជ័យរហូតដល់មានការចាប់ខ្លួនមេខ្លោងរួចហើយក៏ដោយក៏ក្រុមនេះខ្លះនៅមិនទាន់បោះបង់ចោលគំនិតបំផ្លិចបំផ្លាញជាតិកម្ពុជា នៅឡើយ» ។
ក្រសួងការពារជាតិប្រកាសច្រានចោលទាំងស្រុកមិនទទួលយកដាច់ខាតចំពោះការ ចោទប្រកាន់នៃរបាយការណ៍ដែលបង្កប់ឧបាយកលពិសពុលរបស់ក្រុមដែលហៅថាអ ង្គ ការឃ្លាំមើលសិទ្ធិមនុស្សនេះ ។ ជាមួយគ្នានោះដែរក្រសួងការពារជាតិបានអំពាវនាវដល់អង្គការឃ្លាំមើលសិទ្ធិមនុស្ស ឲ្យបញ្ឈប់ជាបន្ទាន់នូវការប្រឌិតរបាយការណ៍ដែលចោទប្រកាន់គ្មានមូលដ្ឋានមកលើថ្នាក់ដឹកនាំកងកម្លាំងប្រដាប់អាវុធកម្ពុជាយ៉ាងអយុត្តិធម៌ ៕
ចែករំលែកព័តមាននេះ