ខេត្តព្រៃវែង ៖ ដោយសារតែការបើកបរបំពានច្បាប់ចរាចរណ៍ក្នុងល្បឿនលឿនផង បណ្តាលឱ្យកើតទៅជាគ្រោះថ្នាក់ចរាចរណ៍ ហើយអ្នជិះម៉ូតូ២នាក់បានរងរបួសធ្ងន់ និងធ្លាយចេញនូវរឿងដែលគេនឹកស្មានមិនដល់មួយទៀត គឺសមត្ថកិច្ចបានរកឃើញកាំភ្លើងជ័រមួយដើមនៅក្នុងកែបម៉ូតូទៅវិញ ។
ហេតុការណ៍នេះ បានកើតឡើងកាលពីវេលាម៉ោង១០ និង២៥នាទីព្រឹកថ្ងៃទី២៨ មិថុនា ស្ថិតនៅចំណុចខាងត្បូង ឈាងខាងកើតរង្វង់មូលផ្កាឈូក ក្នុងភូមិលេខ3 សង្កាត់កំពង់លាវ ក្រុងព្រៃវែង ។ សមត្ថកិច្ចបានឱ្យដឹងថា គ្រោះថ្នាក់ចរាចរណ៍នេះ គឺបង្កឡើងដោយម៉ូតូមួយគ្រឿងម៉ាកស្គូពី ពណ៌.ស ពាក់ស្លាកលេខភ្នំពេញ 1FQ-0770 បើកបរដោយឈ្មោះរត្ន័ ធីឡែន ភេទប្រុស អាយុ២២ឆ្នាំ មានទីលំនៅក្នុងភូមិជើងទឹក សង្កាត់ជើងទឹក ក្រុងព្រៃវែង ។
ដោយប្រើប្រាស់ល្បឿនលឿន ក្នុងទិសដៅពីត្បូងទៅជើង លុះពេលមកដល់ចំណុចកើតហេតុ ជាចំណុចរង្វង់មូលក៏បានបុកពេញទំហឹងជាមួយនិងម៉ូតូមួយគ្រឿងផ្សេងទៀត ម៉ាកហុងដាC125 សេរីឆ្នាំ2004 ពណ៌ខ្មៅ ពាក់ស្លាកលេខ ភ្នំពេញ 1D7657 បើកបរដោយឈ្មោះ មុត ទីន ភេទប្រុស អាយុ49ឆ្នាំ មានទីលំនៅក្នុងភូមិលេខ5 សង្កាត់កំពង់លាវ ក្រុងព្រៃវែង មុខរបរ( រត់ម៉ូតូឌុប )បណ្តាលឲ្យភាគីទាំង២ រងរបួសធ្ងន់ទាំងសងខាង ដោយឈ្មោះ មុត ទីន ត្រូវបានបញ្ជូនទៅព្យាបាលនៅមន្ទីរពេទ្យខេត្ត ចំណែកឈ្មោះ រត្ន័ ធីឡែន សាច់ញាតិនាំយកទៅព្យាបាលនៅគ្លីនិកឯកជនឈ្មោះ ឡេង ពីនី រីឯម៉ូតូទាំង2គ្រឿងសមត្ថកិច្ចយកមករក្សាទុកនៅអធិការដ្ឋាននគរបាលក្រុង។
ប៉ុន្តែអ្វីដែលធ្វើឱ្យមានការភ្ញាក់ផ្អើលទៀតនោះ គឺក្រោយពីកើតហេតុ សមត្ថកិច្ចបានត្រួតពិនិត្យនៅក្នុងកែបម៉ូតូស្គូពី ស្រាប់តែប្រទះឃើញមានកាំភ្លើងជ័រមួយដើម និងស្រោមកាំភ្លើងមួយ ខ្សែតីបត់ជា២ចំនួន២ខ្សែ និងដុំថ្មចំនួន២៤ដុំ ដែលករណីនេះ ត្រូវបានលោកវរៈសេនីយទោ នុត ប៊ុនឌឿន អធិការនគរបាលក្រុងព្រៃវែង ប្រាប់អោយដឹងជាជំហានដំបូងថា កាំភ្លើងជ័រនេះឈ្មោះ រត្ន័ ធីឡែន អាចគ្រាន់តែយកដាក់តាមខ្លួន ដើម្បីសម្ញែងគេឯងប៉ុណ្ណោះ ព្រោះតាមការរាយការណ៍មូលដ្ឋាន ជននេះគឺជាមុខសញ្ញាក្រុមក្មេងទំនើង ប៉ុន្តែគេមិនដែលយកកាំភ្លើងនេះ ទៅប្រព្រឹត្តិបទល្មើសអ្វីមួយនៅឡើយទេ ។
ទោះជាយ៉ាងណាក៏ដោយ លោកអធិការបានបញ្ជាក់ថា ពេលនេះឈ្មោះ រត្ន័ ធីឡែន នេះកំពុងដេកសំរាកព្យាបាលរបួសនៅក្នុងមន្ទីរពេទ្យ ដូច្នេះ នៅពេលបានជាធូរស្រាល សមត្ថកិច្ចនិងធ្វើការសាកសួរ ថាតើគេយកកាំភ្លើងជ័រនេះដាក់តាមខ្លួន មានគោលបំណងអ្វី?
ចែករំលែកព័តមាននេះ