តាមប្រភពព័ត៌មាន Metro បានឲ្យដឹងថា ក្លិបបិសាចក្រហម Manchester United កំពុងតែពុះកញ្ជ្រោលក្នុងអារម្មណ៍ចង់បានកីឡាករជម្រើសជាតិក្រូអាស៊ី Mateo Kovacic ពីក្លិបអធិរាជស Real Madrid ។
កីឡាករ Kovacic បានចូលលេងឲ្យ Real Madrid ចំនួនច្រើនជាង១០០ដងតាំងពីប្តូរមកពី Inter Milan នៅឆ្នាំ២០១៥ ។ នៅរដូវកាលនេះ គ្រោងនឹងចាកចេញពីក្លិបរបស់ខ្លួនទៅកាន់ក្លិបផ្សេងទៀត ។ មានក្លិបជាច្រើនបានតាមប្រមាញ់យករូបគេ ដែលក្នុងនោះក៏មានក្លិបបិសាចក្រហម Manchester United ផងដែរ បើតាមប្រភពព័ត៌មាន Daily Mail ។
បើទោះបីជាប្រធានក្លិបបិសាចក្រហមទើបតែទិញយកកីឡាករប្រេស៊ីល Fred កាលពីដើមខែនេះក្តី គេក៏មិនទុកចោលការទិញយកកីឡាករ Kovacic ដែរ ព្រោះតែ Marouane Fellaini អាចនឹងចាកចេញក្នុងពេលឆាប់ៗនេះ ។
បើទោះបីជាចិត្តក្តៅចង់បានប៉ុនណាក៏ដោយ ក៏មិនឈ្នះអំណាចទឹកប្រាក់ដែរ ។ Man Utd ហាក់បីដូចជាពិបាកក្នុងឆក់យកកីឡាករដែលខ្លួនលង់ចិត្ត ដោយសារតែអ្នកចាស់ទារប្រាក់បង់ផ្តាច់កុងត្រាថ្លៃពេកដល់ទៅ២៦៥លានផោន ៕
ចែករំលែកព័តមាននេះ