តាមប្រភពព័ត៌មាន Metro បានឲ្យដឹងថា Marcos Rojo ដែលជាកីឡាកររួមក្រុមជាមួយនឹងជើងខ្លាំង Lionel Messi និងជាអ្នកស៊ុតគ្រាប់បាល់ទីពីររបស់ក្រុមអាហ្សង់ទីននៅក្នុងការប្រកួតជាមួយនឹងនីហ្សេរីយ៉ាបានបង្ហើបប្រាប់ពីពាក្យសម្តីរបស់ Messi ប្រាប់ទៅកាន់ក្រុមពេលពាក់កណ្តាលម៉ោងប្រកួត ។
នៅក្នុងការប្រកួតកាលពីថ្ងៃអង្គារខាងអាហ្សង់ទីនឈ្នះនីហ្សេរីយ៉ាជាមួយនឹងលទ្ធផល 2-1 ដែលគ្រាប់បាល់ទីមួយរកបានដោយ Messi និងគ្រាប់បាល់ទីពីរដោយ Rojo ។ វាជាការប្រកួតមួយដែលសម្រេចថាអាហ្សង់ទីនអាចឡើងតទៅទៀតឬអត់ ។ ដូចនេះហើយ វាពិតជាសំខាន់យ៉ាងខ្លាំងសម្រាប់ក្រុមអាហ្សង់ទីន និងប្រជាជនអាហ្សង់ទីនទាំងមូល ។
នៅពេលពាក់កណ្តាល់ម៉ោងប្រកួតគេឃើញ Messi និយាយជាមួយមិត្តរួមក្រុមទាំងអស់ ។ ស្រាប់តែពេលចូលប្រកួតវិញអាហ្សង់ទីនក៏រកបានមួយគ្រាប់ទៀត ។ ពេលនេះ Rojo បានបង្ហើបប្រាប់នូវអ្វីដែល Messi និយាយ ។
Rojo ប្រាប់ TyC Sports ថា «Messi បានមកនិយាយជាមួយពួកយើង ហើយប្រាប់យើងឲ្យធ្វើចិត្តឲ្យស្ងប់ និងកុំឲ្យស្ត្រេស ។ ពួកយើងពេលនោះមានអារម្មណ៍ភ័យព្រួយយ៉ាងខ្លាំង ។ សម្រាប់ខ្ញុំ ពាក្យសម្តីរបស់ Messi ពិតជាជួយខ្ញុំយ៉ាងខ្លាំង» ។ Rojo បានបន្តថា «Messi គឺជាកាពីទែនរបស់ពួកយើង ហើយគាត់គឺជាអ្នកដឹកនាំល្អបំផុត ។ វាពិតជាអស្ចារ្យណាស់ក្នុងការស៊ុតបាល់មួយគ្រាប់នោះ» ៕
ចែករំលែកព័តមាននេះ