ខេត្តសៀមរាប ៖ រថយន្តកាមរីមួយគ្រឿងបើកបរយ៉ាងលឿន ហើយមិនប្រកាន់ស្តាំទៀតនោះ បានបុកជាមួយម៉ូតូមួយគ្រឿងដែលជិះឌុបគ្នា១គ្រួសារ មានឪពុកម្តាយនិងកូនៗ បណ្តាលឱ្យស្លាប់យ៉ាងអាណោចអាធ័មទាំង៤នាក់ និងមនុស្ស៥នាក់ផ្សេងទៀត ដែលជាអ្នកបើកបរនិងអ្នកជិះក្នុងរថយន្ត ក៏រងរបួស
ស្រាល ។
គ្រោះថ្នាក់ដ៏រន្ធត់នេះ បានកើតឡើងកាលពីព្រឹកថ្ងៃទី២៧ ខែមិថុនា វេលាម៉ោង៩និង៤០នាទី នៅលើកំណាត់ផ្លូវជាតិលេខ៦ ក្នុងភូមិដំណាក់ស្លាញ ឃុំសសរស្តម្ភ ស្រុកពួក ។មន្ត្រីនគរបាលស្រុកនិយាយថា រថយន្តកាមរីពណ៌ត្រីឆ្លូញ ពាក់ផ្លាកលេខ ភ្នំពេញ ២Q-០៩៣២ បើកបរដោយបុរសម្នាក់មិនស្គាល់អត្ត
សញ្ញាណ ធ្វើដំណើរពីខាងលិចទៅខាងកើត ដោយមានដឹកអ្នកដំណើរ៤នាក់ផង។
លុះទៅដល់ចំណុចខាងលើ ក៏បានបុកជាមួយម៉ូតូសេ១២៥ ពណ៌ខ្មៅ បើកបរដោយបុរសឈ្មោះ សុន សែនអាយុ៣៤ឆ្នាំ ជាកសិករ មានទីលំនៅក្នុងភូមិច្រនៀង ឃុំព្រៃជ្រូក ស្រុកពួក បើកក្នុងទិសដៅបញ្ច្រាសគ្នា ដោយមានដឹកប្រពន្ធនិងកូនតូចៗ២នាក់ ។ប្រភពដដែលបន្តថា គ្រោះថ្នាក់នេះបណ្តាលឱ្យអ្នកជិះម៉ូតូទាំង៤នាក់ស្លាប់ទាំងអស់គឺ ឪពុកម្តាយនិងកូនៗ២នាក់់ ។
ចំណែកអ្នកជិះក្នុងរថយន្ត៥នាក់ គឺអ្នកបើកបរម្នាក់ និងអ្នកដំណើរ៤នាក់ រងរបួសស្រាល ឯរថយន្តនិងម៉ូតូរងការខូចខាតដូចគ្នា ។ ចំពោះមូលហេតុដែលនាំឱ្យមានសោកនាដកម្ម១គ្រួសារនេះ គឺមក ពីរថយន្តបើកបរក្នុងល្បឿនលឿននិងមិនប្រកាន់ស្តាំ ។
ក្រោយពេលកើតហេតុ មន្ត្រីជំនាញបានចុះទៅធ្វើការវាស់វែងនិងកសាងសំណុំរឿង ហើយទាំងម៉ូតូនិងរថយន្តត្រូវបានយកទៅរក្សាទុកនៅអធិការដ្ឋាននគរបាលស្រុកពួក ដើម្បីចាត់ការបន្តតាមនីតិវិធី ៕
ចែករំលែកព័តមាននេះ