ខេត្តប៉ៃលិន ៖ មួយរយៈនេះ មានការតែងតាំងអភិបាលរងខេត្ត អភិបាលរងក្រុង-ស្រុក ប្រធាន-អនុប្រធានមន្ទីរក្នុងខេត្តជាច្រើនរូប តែអ្វីដែលជាការកត់សម្គាល់នោះ ត្រូវបានអ្នកជំទាស់ចាត់ទុកថា មន្ទីរខ្លះអ្នកសកម្មក្នុងការងារមិនបានតែងតាំងទេ បែរជាតែងតាំងអ្នកអសកម្មក្នុងការងារទៅវិញ ។
នៅពេលថ្មីៗនេះ គឺថ្ងៃទី២៥ ខែមិថុនាកន្លងទៅ គណនេយ្យហ្វេសប៊ុករបស់លោកអនុប្រធានមន្ទីរវប្បធម៌និងវិចិត្រសិល្ប:ខេត្ត បានបង្ហោះនៅក្នុងបណ្តាញសង្គម ដោយអំពាវនាវដល់លោកជំទាវរដ្ឋមន្ត្រីក្រសួងវប្ប ធម៌ និងវិចិត្រសិល្បៈ និងលោករដ្ឋមន្ត្រីក្រសួងមុខងារសាធារណៈ មេត្តាជួយផ្តល់យុត្តិធម៌ដល់រូប លោក(អុី លីឈុន) ព្រោះលោកបានបំពេញការងារជាអនុប្រធានមន្ទីរអស់រយៈពេល១៩ឆ្នាំមកហើយ
មុនពេលលោក លឹម ប៊ុនហេង ជាប្រធានមន្ទីរចាស់ចូលនិវត្តន៍ ។ លោកប្រធានមន្ទីរចាស់ បានស្នើសុំទៅលោកអភិបាលខេត្ត ដើម្បីតែងតាំងរូបលោកជំនួសហើយលោកអភិបាលខេត្តចាស់ក៏ចូលនិវត្តន៍អស់ ហើយលោកអភិបាលខេត្តថ្មីសម្រេចចិត្តតែងតាំងលោក ព្រហ្ម រដ្ឋា ជាប្រធានមន្ទីរថ្មី ។
លោក ព្រហ្ម រដ្ឋា ទើបតែងតាំងជាអនុប្រធានមន្ទីរបាន១ឆ្នាំ៥ខែ មិនទាន់សមស្របនិងត្រឹមត្រូវតាមប្រកាសលេខ៧៨៨ របស់រដ្ឋមន្ត្រីក្រសួងមុខងារសាធារណៈនៅឡើយ ។ ពាក់ព័ន្ធទៅនឹងបញ្ហានេះ លោក ផាន់ ចាន់ធុល អភិបាលខេត្ត ដែលទើបនឹងឡើងកាន់តំណែងថ្មីបានរយៈពេល២ខែមកនេះ បានថ្លែងកាលពីព្រឹកថ្ងៃទី២៦ ខែមិថុនា ក្នុងឱកាសប្រារព្ធពិធីប្រកាសតែងតាំងមុខតំណែងប្រធានថ្មីមន្ទីរទេសចរណ៍ខេត្ត ដោយបន្លុយថា នៅតាមមន្ទីរអង្គភាពភាគច្រើន មិនសូវពូកែនឹងការងាររបស់ខ្លួនទេ ពូកែតែខាងអួតអាងនិងយក មុខយកមាត់ ហើយដណ្តើមតំណែងគ្នាប៉ុណ្ណោះ ។ លោកបន្តថា ចំណុចសំខាន់ផ្សេងទៀតគឺទម្លាប់របស់មន្ត្រីក្នុងខេត្តនេះ មិនសូវពូកែធ្វើការអភិវឌ្ឍការងាររបស់ខ្លួនប៉ុន្មានទេ ខ្លាំងតែខាងបង្ហោះហ្វេសប៊ុក ។
ជាក់ស្តែងថ្មីៗនេះ ឃើញមានខាងអនុប្រធានមន្ទីរវប្បធម៌និងវិចិត្រសិល្បៈខេត្ត បានបង្ហោះហ្វេសប៊ុកឱ្យគេរកយុត្តិធម៌ ដើម្បីបានឡើងកាន់តំណែងធ្វើប្រធាន ដោយការងារមិនគិតខិតខំធ្វើនោះទេ ។ រឿងនេះ ខាងខេត្តបានយកដំណឹងខាងលើទៅជូនទៅលោកជំទាវតំណាងរាស្ត្រ និងបន្តទៅដល់ក្រសួងអស់ហើយ ដើម្បីចាត់ការបន្តទៀត ។ កាលពីវេលាម៉ោង១១និង៣៣នាទីថ្ងៃទី២៥ ខែមិថុនាកន្លងទៅ មានគណនេយ្យហ្វេសប៊ុករបស់អនុប្រធានមន្ទីរវប្បធម៌និងវិចិត្រសិល្ប:ខេត្តប៉ៃលិន បានបង្ហោះនៅក្នុងបណ្តាញសង្គមថា សូមលោកជំទាវរដ្ឋមន្ត្រីក្រសួងវប្បធម៌ និងវិចិត្រសិល្បៈ និងលោករដ្ឋមន្ត្រីក្រសួងមុខងារសាធារណៈ មេត្តាជួយផ្តល់យុត្តិធម៌ដល់រូបខ្ញុំបាទផង អុី លីឈុន បានបំពេញការជាអនុប្រធានមន្ទីរអស់រយៈពេល១៩ឆ្នាំមកហើយ មុនពេលលោក លឹម ប៊ុនហេង ប្រធានមន្ទីរចាស់ចូលនិវត្តន៍ ។
គាត់បានស្នើសុំទៅអភិបាលខេត្តប៉ៃលិន តែងតាំងរូបខ្ញុំជំនួសរូបគាត់ ហើយអភិបាលខេត្តចាស់ៗ លោកបានចូលនិវត្តន៍អស់ផងដែរ ។ ម្លេ៉ាះហើយ ធ្វើឲ្យអភិបាលខេត្តថ្មីគាត់សម្រេចចិត្តតែងតាំងលោក ព្រហ្ម រដ្ឋា ជាប្រធានមន្ទីរថ្មី ហើយលោក ព្រហ្ម រដ្ឋា ទើបតែតែងតាំងជាអនុប្រធានមន្ទីរបាន១ឆ្នាំ៥ខែទេ មិនទាន់សមស្របនិងត្រឹមត្រូវតាមប្រកាសលេខ៧៨៨ របស់រដ្ឋមន្ត្រីក្រសួងមុខងារសាធារណៈនៅឡើយ ។
គាត់មើលឃើញលោក ព្រហ្ម រដ្ឋា ចេញមុខការងារតាមរយៈកម្មវិធីសិល្បៈ មិនដឹងការងារវប្បធម៌ មានរហូតដល់ទៅ៨ការិយាល័យមើលឃើញតែច្រៀងនិងរាំ ហើយរូបខ្ញុំបាទក៏មិនធ្លាប់ជាប់ជាមន្ត្រីឡេមឡឺមចេញពីនេះ ទៅចេញនោះះដែរ បម្រើការដោយស្មោះ៤ឆ្នាំចុងក្រោយនេះ សូម្បីតែអវត្តមានច្បាប់ ឬអត់ច្បាប់ក៏មិនធ្លាប់មានដែរ ខំបំពេញការងារអង្គភាព រួមជាមួយលោកប្រធានមន្ទីរ និងមន្ត្រីក្រោមឱវាទទាំងអស់ដោយស្មារតីសាមគ្គី ទទួលខុសត្រូវ លើការងារមិនដែលធ្វេសប្រហែសឡើយ ។ សូមលោកជំទាវរដ្ឋមន្ត្រី មេត្តាផ្តល់យុត្តិធម៌ដល់រូបខ្ញុំបាទដោយក្តីអនុគ្រោះផង ៕
ចែករំលែកព័តមាននេះ