ខេត្តកំពង់ឆ្នាំង ៖ រដ្ឋមន្ត្រីក្រសួងអប់រំយុវជន និងកីឡា ឯកឧត្តមបណ្ឌិតសភាចារ្យ ហង្ស ជួនណារ៉ុង បានមានប្រសាសន៍ថា ដោយសារកំណែទម្រង់របស់រាជរដ្ឋាភិបាលចំពោះប្រាក់បៀវត្ស គ្រូបង្រៀន…
ខេត្តកំពង់ឆ្នាំង ៖ រដ្ឋមន្ត្រីក្រសួងអប់រំយុវជន និងកីឡា ឯកឧត្តមបណ្ឌិតសភាចារ្យ ហង្ស ជួនណារ៉ុង បានមានប្រសាសន៍ថា ដោយសារកំណែទម្រង់របស់រាជរដ្ឋាភិបាលចំពោះប្រាក់បៀវត្ស គ្រូបង្រៀន ចំនួនប្រមាណ៣លើក ក្នុងរយៈពេល៥ឆ្នាំកន្លងទៅនេះបានឡើងពីប្រមាណ៤០ម៉ឺនរៀលរហូតបច្ចុបន្ន ឡើងដល់១លាន១០ម៉ឺនរៀល សម្រាប់ប្រាក់ខែគ្រូបង្រៀនជាប់ក្របខណ្ឌដំបូង។ ថ្លែងបែបនេះនៅក្នុង ឱកាសអញ្ជើញជាអធិបតីភាព ក្នុងពិធីប្រកាសចូលកាន់តំណែង ប្រធានមន្ទីរអប់រំយុវជន និង កីឡាខេត្តកំពង់ឆ្នាំង នារសៀលថ្ងៃទី២៧ ខែមិថុនា ឆ្នាំ២០១៨នេះ។
ឯកឧត្តមបានបន្តថា នេះជាការយកចិត្តទុកដាក់របស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បានគិតគូរដល់លោកគ្រូ អ្នកគ្រូ បង្រៀននៅទូទាំងប្រទេសកម្ពុជា។ ជាមួយគ្នានេះ ឯកឧត្តមសូមកោតសរសើរដល់លោកគ្រូអ្នកគ្រូ លោកនាយកសាលា និងប្រធានមន្ទីរអប់រំយុវជន និងកីឡាខេត្តកំពង់ឆ្នាំង ដែលបានយកចិត្តទុកដាក់បំពេញភារកិច្ចរយៈកាលកន្លងមក ដោយទទួលជោគជ័យល្អប្រសើរ។ ក្នុងនោះមានលោកគ្រូ អ្នកគ្រូ ទទួលបានមេដាយកិត្តិយសថ្នាក់ជាតិ ពីការបង្រៀនល្អ គ្រូល្អ សិស្សល្អ និងលោកនាយកសាលាល្អផងដែរ។ ឆ្លៀតក្នុងឱកាសនេះដែរ សូមចូលរួមអបអរសាទរជាមួយសិស្ស ខេត្តកំពង់ឆ្នាំង ដែលបានទទួលមេដាយលើមុខវិជ្ជា រូបវិទ្យា ពីការប្រឡងថ្នាក់សាកលលោក មកជូនជាតិមាតុភូមិ ក៏ដូចជាខេត្ត និងក្រុមគ្រួសារ។
ថ្មីៗនេះរាជរដ្ឋាភិបាល បានរៀបចំដាក់បញ្ចូលលោកគ្រូអ្នកគ្រូបង្រៀនខ្មែរឥស្លាម នៅទូទាំងប្រទេសដែលមានចំនួនប្រមាណ២៥០០នាក់ ឲ្យចូលក្នុងក្របខណ្ឌជាតិ ទទួលបានប្រាក់ខែពីរាជរដ្ឋាភិបាល ដោយសារតែលោកគ្រូអ្នកគ្រូខ្មែរឪស្លាមទាំងនោះ កន្លងមកជាគ្រូបង្រៀននៅតាមសាលា ទទួលបានតែប្រាក់ឧបត្ថម្ភ ពីសហគមន៍តែប៉ុណ្ណោះ។ ហើយខាងមុខនេះ សាលារៀនដែលមានចម្ងាយត្រឹមប្រមាណ១០គីឡូម៉ែត្រពីទីរួមខេត្ត និងទទួលបានការរៀបចំឲ្យមានសោភ័ណភាព បរិស្ថានល្អ ស្របតាមស្តង់ដារ ប្រទេសជិតខាង។ ឯកឧត្តមក៏បានផ្តាំផ្ញើដល់នាយកសាលាថ្មី សូមយកចិត្តទុកដាក់ជួយដល់នាយកសាលា គ្រប់សាលារៀន ទាំងអស់ដោយអប់រំណែនាំបន្ថែមទៀតលើវិស័យអប់រំ ដើម្បីឱ្យលោកគ្រូអ្នកគ្រូ លោកនាយកសាលាទទួលបានចំណេះដឹងថ្មីៗបន្ថែមទៀត។
នៅក្នុងឱកាសនោះផងដែរ ឯកឧត្តម អៀង វុធ អភិបាលរងខេត្តកំពង់ឆ្នាំង បានមានប្រសាសន៍ថា ដោយសារប្រទេសទៀតទទួលបានសុខសន្តិភាព និងការអភិវឌ្ឍន៍គ្រប់ទីកន្លែង ធ្វើឲ្យមានដៃគូរវិនិយោគទុនជាច្រើនមកបណ្ដាក់ទុន រកស៊ីនៅកម្ពុជា។ ក្នុងនោះខេត្តកំពង់ឆ្នាំងក៏បានទទួលអ្នកវិនិយោគទុនជាច្រើន បានមកបង្កើតជារោងចក្រ នៅតាមបណ្តាស្រុកមួយចំនួន ដោយទទួលកម្មករ ដែលជាកូនចៅប្រជាពលរដ្ឋ បានចូលធ្វើការរាប់ម៉ឺននាក់។ គិតជាមធ្យម មានប្រាក់សរុបទូទាំងខេត្ត ចំនួនប្រមាណជា៧លានដុល្លារ ក្នុង១ខែៗ ដែលបានចរាចរណ៍ធ្លាក់ដល់ដៃប្រជាពលរដ្ឋក្នុងខេត្ត នឹងអាចកាត់បន្ថយអត្រាភាពក្រីក្រ របស់ប្រជាពលរដ្ឋ នៅតាមទីជនបទបានមួយកម្រិត។
ឯកឧត្តមក៏បានផ្តាំផ្ញើដល់ប្រធានមន្ទីរ អប់រំយុវជន និងកីឡាថ្មី ត្រូវធ្វើការងារឲ្យបានត្រឹមត្រូវតាមបទដ្ឋានរបស់ក្រសួង និងសហការជាមួយអាជ្ញាធរខេត្ត ជាមួយមន្ទីរជុំវិញខេត្ត ដើម្បីឲ្យវិស័យអប់រំនៅក្នុងខេត្ត កាន់តែល្អប្រសើរមួយកម្រិតទៀត។ សូម យកចិត្តទុកដាក់គោរពវិន័យ មានក្រមសីលធម៌ល្អ សាកសមជាថ្នាក់ដឹកនាំមន្ទីរ និងមុនសម្រេចចិត្តធ្វើអ្វីមួយត្រូវពិភាក្សា និងស្រាវជ្រាវ ឲ្យបានច្បាស់លាស់ ដើម្បីចៀសវាងកុំហុសឆ្គងកើតឡើង។ សូមបញ្ជាក់ដែរថា ពីធីប្រកាសនោះ គឺត្រូវបានតែងតាំងលោក សឹម ប្រឹម ជាប្រធានមន្ទីរអប់រំយុវជន និងកីឡាថ្មីជំនួស លោក ញ៉ែម សាវ៉ាត ដែលបានចូលនិវត្តន៍៕
ចែករំលែកព័តមាននេះ