ខេត្តស្វាយរៀង ៖ បុរសម្នាក់បានស្លាប់ភ្លាមៗនៅកន្លែងកើតហេតុ និងមនុស្សប្រុសស្រី៤នាក់ទៀត រងរបួសធ្ងន់ស្រាល ក្នុងនោះមានស្ត្រីម្នាក់ដាច់ដៃម្ខាងផងដែរ ក្រោយពីជួបហេតុការណ៍គ្រោះថ្នាក់ ចរាចរណ៍ ដែលរថយន្តក្រុងក្រុមហ៊ុន “វ៉ាង រ៉ិច” ភ្នំពេញ-វៀតណាម បើកជែងរថយន្តកុងតឺន័រ ហើយជ្រុលទៅបុករថយន្តបែនដឹកថ្មបណ្តាលឲ្យស្លាប់ និងរបួសធ្ងន់ស្រាលតែម្តង។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៨ និង៣០នាទីព្រឹក ថ្ងៃទី២៧ ខែមិថុនា ឆ្នាំ២០១៨ នៅលើផ្លូវជាតិលេខ១ ស្ថិតក្នុងភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង។ បើតាមប្រភពពីកន្លែងហេតុ បានឲ្យដឹងថា ជនរងគ្រោះទាំងអស់ ជាជនជាតិវៀតណាមត្រូវបានដឹក តាមរថយន្តសង្គ្រោះយកមកសង្គ្រោះនៅមន្ទីរពេទ្យបង្អែកខេត្តស្វាយរៀង។ សូមបញ្ជាក់ថា មនុស្សជិះលើរថយន្តក្រុងនោះមានចំនួន២៤នាក់ ហើយអ្នករងគ្រោះទាំងអស់៥នាក់ ស្លាប់ម្នាក់ប្រុស ស្ត្រី២នាក់ដាច់ដៃម្នាក់ បាក់ជើងម្នាក់។
បើតាមប្រជាពលរដ្ឋដែលបានឃើញហេតុការណ៍ផ្ទាល់ភ្នែក បានឲ្យដឹងថា មុនពេលកើតហេតុគេឃើញរថយន្តក្រុង ក្រុមហ៊ុម វ៉ាងរ៉ិច បើកបរពីទិសខាងកើតទៅលិច យ៉ាងលឿន លុះមកដល់កន្លែងកើតហេតុ បានបើកវ៉ាជែងរថយន្តកុងតឺន័រដែលបើកទិសស្របគ្នា ស្របពេលនោះក៏មានរថយន្តបែនដឹកថ្មបើកបញ្ច្រាសទិសគ្នាពីលិចមកកើតក៏បុកគ្នាពេញទំហឹងបណ្តាលឲ្យ អ្នកធ្វើដំណើរលើរថយន្តក្រុងម្នាក់ស្លាប់ភ្លាមៗនៅនឹងកន្លែង និងស្ត្រីម្នាក់ដៃដៃម្ខាងធ្លាក់មកលើថ្នល់ ស្ត្រីម្នាក់បាក់ជើង និងបុរស២នាក់ផ្សេងទៀតរងរបួសធ្ងន់ស្រាលតែម្តង។
បន្ទាប់មកសមត្ថកិច្ចក៏បានហៅ រថយន្តសាមុយដឹកជនរងគ្រោះទាំង៤នាក់មកកាន់មន្ទីរពេទ្យខេត្ត ស្វាយរៀងដើម្បីសង្គ្រោះ។ ចំណែករថយន្តបង្កទាំងពីគ្រឿងសមត្ថកិច្ចបានយកមករក្សាទុកនៅការិយាល័យនគបាលចរាចរណ៍ស្នងការដ្ឋាននគបាលខេត្តដើម្បីដោះស្រាយតាមច្បាប់។ រីឯអ្នកធ្វើដំណើរត្រូវក្រុមហ៊ុនយករថយន្តមកផ្ទេរ ដឹកទៅកាន់រាជធានីភ្នំពេញ ចំណែកសាកសពជនរងគ្រោះត្រូវបានសាច់ញាតិដឹកត្រឡប់ទៅប្រទេសវៀតណាមវិញនាម៉ោង១ និង១០នាទីរសៀល ទៅស្រុកកំណើតដើម្បីធ្វើបុណ្យតាមប្រពៃណី៕
ចែករំលែកព័តមាននេះ