រាជធានីភ្នំពេញ ៖ ជំងឺគ្រោះថ្នាក់សរសៃឈាមក្នុងខួរក្បាល ឬហៅថា Stroke គឺជាប្រភេទជំងឺធ្ងន់ធ្ងរដែលអាចឆក់យកជីវិតមនុស្សភ្លាមៗ ហើយក៏ធ្វើឲ្យមនុស្សជាច្រើនធ្លាក់ខ្លួនពិការអស់មួយជីវិត ជាក់ស្តែងការព្យាបាលជំងឺនេះក៏មានតម្លៃមិនធម្មតានោះទេ។
លោក វិន ឆាយ ដែលជាអ្នកជំងឺ Stroke មួយរូបបានប៉ាន់ប្រមាណថា សម្រាប់ការព្យាបាលរបស់លោកគឺអស់ច្រើន គឺច្រើនជាមួយម៉ឺនដុល្លារសហរដ្ឋអាមេរិកឯណោះ នេះសម្រាប់ជីវភាពគ្រួសារធម្យមដូចជារូបលោក ខណៈដែលមិត្តភ័ក្ត្រមួយចំនួនរបស់លោកដែលកើតជំងឺធ្ងន់ធ្ងរមួយនេះបានចំណាយច្រើនរាប់ម៉ឺនដុល្លារសហរដ្ឋអាមេរិក។
លោក វិន ឆាយ ដែលពិការដៃខាង និងជើងខាងស្តាំដោយសារតែជំងឺ stroke បានបន្តថា៖ «កើតមានជំងឺនេះគឺការព្យាបាលពិតជាថ្លៃណាស់ នេះពូព្យាបាលឈប់ៗផង បើសិនជាមានលុយចំណាយបន្តទៀតបែបអស់រាប់ម៉ឺនដុល្លារសហរដ្ឋអាមេរិកហើយ ។ កន្លងមកការព្យាបាលរបស់ពូ គឺមិនជាប់លាប់ទេ ពេលណាមានលុយក៏បន្តការព្យាបាលដោយថ្នាំពេទ្យ ពេលណាអត់លុយក៏អត់ចាក់ថ្នាំទៅ។ ជម្ងឺនេះគឺពិតជាជំងឺធ្ងន់ធ្ងរណាស់ ហើយបើកើតហើយគឺប៉ះពាល់ដល់ជីវភាពគ្រួសារខ្លាំងណាស់ ជាពិសេសពេលឈឺចាប់ម្តងៗចង់តែកាត់ដៃខាងស្តាំនេះចោលទេ» ។
យោងតាមលោក ភាព សុផា ប្រធានគ្រប់គ្រងអភិវឌ្ឍន៍ផ្នែកទីផ្សារកម្ពុជានៃមន្ទីរពេទ្យចូឡារ៉ាត់ ៣ ដែលជាមន្ទីរពេទ្យឯកជនមួយមានទីតាំងនៅជាយក្រុងបាងកក ឬចម្ងាយប្រមាណត្រឹម ២០ គីឡូម៉ែត្រពីព្រលានយន្តហោះអន្តរជាតិសុវណ្ណភូមិ បានឲ្យដឹងថា កាលពីខែឧសភាថ្មីៗនេះ គឺមានអ្នកជំងឺបុរសខ្មែរ ៣ រូបបានចូលមកសម្រាកព្យាបាលនៅមន្ទីរពេទ្យ ចូឡារ៉ាត់ ៣ ដោយសារតែកើតមានជំងឺ Stroke ហើយពួកគេបានសម្រាកព្យាបាលនៅមន្ទីរពេទ្យអស់រយៈពេលជាង១ សប្តាហ៍ ។
លោក ភាព សុផា ដែលដើរតួនាទីជាអ្នកបកប្រែភាសាខ្មែរ-ថៃ ជូនអ្នកជំងឺខ្មែរផងដែរនោះបានឲ្យដឹងថា សម្រាប់ការព្យាបាលជំងឺគ្រោះថ្នាក់សរសៃឈាមខួរក្បាល គឺមានតម្លៃផ្សេងៗគ្នាពីអ្នកជម្ងឺម្នាក់ទៅអ្នកជម្ងឺម្នាក់ទៀតទៅតាមស្ថានភាពជំងឺរបស់គេ ។
យ៉ាងណាមិញលោក ភាព សុផា បញ្ជាក់ថា៖ «យើងដឹងហើយថា ជំងឺ Stroke ជាជំងឺធ្ងន់ធ្ងរដែលអាចឆក់យកជីវិតមនុស្ស និងធ្វើឲ្យមានពិការភាពមួយជីវិត ហេតុដូច្នេះហើយការប្រើប្រាស់បច្ចេកវិទ្យាទំនើបសម្រាប់ការព្យាបាលក៏ថ្លៃទៅតាមនោះដែរ។ សម្រាប់ថ្លៃការព្យាបាលជំងឺ Stroke នៅមន្ទីរពេទ្យយើង គឺមានតម្លៃយ៉ាងហោចណាស់ក៏ ៨ ០០០ ទៅជាង ១ ម៉ឺនដុល្លារដែរយ៉ាងតិច។ តែបើប្រៀបធៀបតម្លៃនៅមន្ទីរពេទ្យរបស់យើង ជាមួយនឹងមន្ទីរពេទ្យផ្សេងៗទៀតដែលនៅកណ្តាលក្រុងបាងកក គឺយើងធូរថ្លៃជាងគេប្រមាណជា ៥០ ទៅ ៦០% ដោយសារតែមន្ទីរពេទ្យយើងនៅជាយក្រុងទើបរាងធូរថ្លៃ តែសម្រាប់គុណភាពនៃវេជ្ជបណ្ឌិតនិងឧបករណ៍ប្រើប្រាស់ គឺមានលក្ខណៈទំនើបនិងឈានមុខដូចគ្នា» ។
លោកវេជ្ជបណ្ឌិត Chirapat Ukachoke ប្រធានផ្នែកប្រព័ន្ធប្រសាទនៃមន្ទីរពេទ្យ Phyathai 3 Hospital នៅទីក្រុងបាងកក មានប្រសាសន៍ឲ្យដឹងថា ជំងឺ Stroke ចែកចេញជាពីរប្រភេទសំខាន់ៗគឺ ទី១ ជំងឺ Stroke មានពីរប្រភេទ គឺជំងឺដាច់សរសៃឈាមខួរក្បាល (Hemorrhagic stroke) និងការស្ទះសរសៃឈាមក្នុងខួរក្បាល (Ischemic stroke) ។ ដូច្នេះការព្យាបាល ជំងឺដាច់សរសៃឈាមខួរក្បាល (Hemorrhagic stroke) គឺផ្តោតទៅលើការគ្រប់គ្រងការហូរឈាម និងបន្ថយសម្ពាធលើខួរក្បាល។ ចំណែកឯការព្យាបាលជំងឺការស្ទះសរសៃឈាមក្នុងខួរក្បាល (Ischemic stroke) គឺអាចចាប់ផ្តើមដោយការចាក់ថ្នាំប្រឆាំងនឹងការកកឈាមដើម្បីបំបែកកំណកឈាម និងបន្ទាប់មកប្រើឱសថ antiplatelet ដើម្បីរារាំងកុំឲ្យវាកើតឡើងម្តងទៀត។ លោកវេជ្ជបណ្ឌិតបានបញ្ជាក់ថា ភាគច្រើននៃអ្នកកើតជំងឺ Stroke គឺកើតជំងឺប្រភេទ ជំងឺការស្ទះសរសៃឈាមក្នុងខួរក្បាល (Ischemic stroke)។
នៅពេលសាកសួរថា តើការព្យាបាលមានតម្លៃប៉ុន្មានសម្រាប់ជំងឺ Stroke តាមរយៈការអះអាងនៃការព្យាបាលដោយបច្ចេកវិទ្យាឈានមុខ លោកវេជ្ជបណ្ឌិត Chirapat Ukachoke បានបញ្ជាក់យ៉ាងដូច្នេះថា៖ «ប្រាកដណាស់ វាពិតជាថ្លៃសម្រាប់ការព្យាបាល Stroke»។ លោកវេជ្ជបណ្ឌិតបានបញ្ជាក់ថាសម្រាប់ការព្យាបាលជាលក្ខណៈ TPA treatment ដែលត្រូវប្រើថ្នាំឱសថច្រើនគឺមានតម្លៃជាមធ្យម 150,000 bath (ប្រហែល $4674.75 និងថ្លៃ MRI scanning មានតម្លៃ 20,000 bath ($623.30) ខណៈការព្យាបាលតាមរយៈ chemicalthum vitamin គឹមានតម្លៃប្រមាណជា 500,000 bath ($15,582.50)។ តែបើត្រូវវះកាត់ខួរក្បាលគឺមានតម្លៃប្រហែល 200,000 bath ($6233.00) ។
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ