ខេត្តរតនគីរី ៖ បើតាមសេចក្តីរាយការណ៍បានឱ្យដឹងថា គ្រឿងញៀនជិត១គីឡូក្រាមទៀតហើយត្រូវការិយាល័យប្រឆាំងគ្រឿងញៀនខេត្តបង្ក្រាប និងឃាត់ខ្លួនសង្សារមួយគូរជាម្ចាស់ថ្នាំញៀនបានកាលពីនៅម៉ោង៦និង២៦នាទីព្រលប់ ថ្ងៃទី២៦ មិថុនាឆ្នាំ២០១៨ ស្ថិតនៅចំណុចភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី។
នេះជាកិច្ចបង្ក្រាបថ្មីមួយទៀតពីសំណាក់កម្លាំងសមត្ថកិច្ចជំនាញនៃការិយាល័យប្រឆាំងគ្រឿងញៀនខេត្តដែលបានឃាត់ខ្លួនជនសង្ស័យប្រុសស្រី២នាក់ជាសង្សារនឹងគ្នា ១-ឈ្មោះ លឹម ស៊ីថា ភេទប្រុស អាយុ៣១ឆ្នាំ និង២-ឈ្មោះ គឹម ហ័រ ភេទស្រី អាយុ២០ឆ្នាំ ។
ក្រោយពីឃាត់ខ្លួនជនសង្ស័យទាំង២នាក់នេះពួកគេសារភាពថា ខ្លួនពិតជាធ្លាប់ជួញដូរ និងប្រើប្រាស់នូវសារធាតុញៀនប្រាកដមែន ។ ហើយនៅព្រឹកថ្ងៃទី២៧ មិថុនា សមត្ថកិច្ចជំនាញបាននាំពួកគេចុះឆែកឆេរនៅផ្ទះជួលរបស់ជនសង្ស័យស្ថិតនៅភូមិថ្មី សង្កាត់ឡាបានសៀក ក្រុងបានលុង ដែលដឹកនាំ និងសម្របសម្រួលផ្ទាល់ដោយលោក រ៉ា បូរ៉ានឌី ព្រះរាជអាជ្ញារងអមសាលាដំបូងខេត្ត និងក្រឡាបញ្ជី២រូបចូលរួមធ្វើកំណត់ហេតុ រួមទាំងអាជ្ញាមូលដ្ឋានបានធ្វើការឆែកឆេររកឃើញនូវវត្ថុតាងរួមមានដូចជា ៖ ម្សៅក្រាមពណ៌សថ្លា០១ថង់ធំ ០៤ថង់ធំល្មម និង១០ថង់តូច ទម្ងន់៧៣៩.៧៦ក្រាម (ជិត១គីឡូ) ជញ្ជីងថ្លឹងថ្នាំញៀន២គ្រឿង ថង់សម្រាប់ច្រក និងឧបករណ៍សេពគ្រឿងញៀនមួយចំនួន ព្រមទាំងកាំបិតស្នៀត ។
បច្ចុប្បន្នជនសង្ស័យទាំង២នាក់ រួមទាំងវត្ថុតាងកំពុងរក្សាទុកនៅការិយាល័យជំនាញគ្រឿងញៀន ដើម្បីកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ៕
ចែករំលែកព័តមាននេះ