តាមអាចារ្យជួយកាត់គ្រោះស៊យ សម្រាប់អ្នកដែលមានឆ្នាំឆុងបានបញ្ជាក់ថា អ្វីដែលប្រជាជនចិនពិសេសកូនខ្មែរកាត់ចិនជាច្រើនមិនភ្លេចទេនោះគឺរឿងឆ្នាំឆុង ដោយអ្នកទាំងនោះតែងគិតថា វាជាហេតុផល ដែលបណ្ដាលឲ្យជោគជតារាសីធ្លាក់ចុះ រកស៊ី មិនកាក់កប និងមានជំងឺដង្កាត់ជាដើម ។ ចុះសម្រាប់នៅថ្ងៃទី ៣០ ដំណាច់ខែមិថុនានេះ តើមានឆ្នាំណាខ្លះដែលឆុងនឹងថ្ងៃនោះ ហើយគួរធ្វើវិធីកាត់គ្រោះ ស៊យទាំងនោះយ៉ាងដូចម្តេច ?
បើតាមក្បួនចិន ឆ្នាំ២០១៨នេះ មានឆ្នាំឆុងចំនួន៥គឺ ឆ្នាំម្សាញ់ ឆ្នាំកុរ ឆ្នាំខាល ឆ្នាំរោង និងចុងក្រោយគឺឆ្នាំច ។ ក្នុងចំណោមឆ្នាំទាំងនោះ ឆ្នាំដែលឆុងខ្លាំងជាងគេ ដល់ទៅមួយរយភាគរយគឺឆ្នាំចនេះតែម្ដង បន្ទាប់មកមានឆ្នាំកុរ ម្សាញ់ ឆុងធ្ងន់បង្គួរ និង ឆ្នាំរោង ខាលឆុង៥០ភាគរយធុនកណ្តាល ។ លេខស៊ែរកាត់គ្រោះគឺ លេខ១៦៨ លេខ៣៤២ និងលេខ៧៥៧ យកលេខមួយណាស៊ែរកាត់គ្រោះចង្រៃក៏បាន ព្រោះសុទ្ធតែជាលេខហុងស៊ុយស័ក្តិសិទ្ធិ ។
បើតាមទំនៀមទម្លាប់ប្រពៃណីចិនសែ អ្នកដែលឆុងថ្ងៃទាំងនោះចង់រំដោះគ្រោះទាំងអស់ ត្រូវមានតង្វាយយ៉ាងពិសេស២មុខ (យកពីណាក៏បាន)គឺ ពងទា ឬពងមាន់បីគ្រាប់ និងសាច់ជ្រូកបីជាន់មួយដុំ បូកនឹងក្រដាសសែន ផ្លែឈើ ទៀនធូបផង ។
វិធីកាត់គ្រោះ អ្នកឆ្នាំឆុងទាំងអស់ត្រូវធ្វើដោយខ្លួនឯង ដោយយកពងមាន់ឬពងទា ចំនួន៣គ្រាប់ និងសាច់ជ្រូកឆៅបីជាន់ ទៅសែននៅទីណាដែលមានរូបសំណាកសត្វតោ តែបើរូបសំណាកតោនោះនៅក្នុងវត្តអារាមស័ក្តិសិទ្ធិបំផុត ហើយអុជទៀននិងធូប៥សរសៃ និយាយបែរបន់តាមអ្វីដែលជារឿងល្អៗ នាំសុខចម្រើន ។ បន្ទាប់មក យកសាច់ជ្រូកបីជាន់ញាត់ចូលទៅក្នុងមាត់រូបសត្វតោនោះ រួចយកស៊ុយទាំងនោះទៅគោះនឹងចង្កូមតោឲ្យបែកបន្តិច ទើបយកពងនោះ ទៅគប់កម្ទេចចោលដើម្បីឲ្យគ្រោះស៊យឧបទ្រពចង្រៃចេញឆ្ងាយ និងវិនាសសាបសូន្យដូចពងទាដែលបែកខ្ទេចនោះ ។
ទង្វើទាំងអស់នេះជានិមិត្តរូបជួយរំដោះគ្រោះចង្រៃទាំងឡាយ ដែលអាចកើតឡើងជា យថាហេតុអន្តរធានអស់ទៅ។ ដូច្នេះជនប្រុសស្រីដែលមានឆ្នាំឆុងទាំង៥ឆ្នាំ ប្រញាប់ទៅកាត់គ្រោះស៊យចេញ ឱ្យបានមុនដំណាច់ខែមិថុនានេះ ដើម្បីសុខចម្រើន រកទទួលទានមានបាន រស់នៅប្រជាក់ត្រជុំសុខសួស្តីជារៀងរហូត ។
ក្នុងករណីអ្នកដែលមិនបានទៅកាត់គ្រោះនោះទេ គ្រោះចង្រៃទាំឡាយនឹងតាមយាយី រំខានដល់លោកអ្នក អាចធ្វើឲ្យយើងជួបរឿងមិនល្អដូចជា មានជំងឺដង្កាត់ ជួបគ្រោះថ្នាក់ពេលធ្វើដំណើរ ឬថារឿងល្អប្ដូរទៅជារឿងអាក្រក់ក្រឡាប់ចាក់អស់ ឬក៏មានការទាស់ទែងពាក្យសម្ដីគ្នារហូតឈានទៅប្រើអំពើហិង្សាជាដើម ។
ចែករំលែកព័តមាននេះ