ខេត្តរតនគិរី ៖ ទំនៀមទម្លាប់ប្រពៃណីជនជាតិដើមភាគតិចទំពួនមិនទទួលទានទំពាំងទេ។ ការមិនទទួលទាននេះតាមការណែនាំរបស់មេកន្ទ្រាញតាំងពីរាប់រយឆ្នាំមកហើយ។ មកដល់ពេលបច្ចុប្បន្ននេះនៅតែគោរពតាមមេកន្ទ្រាញមិនទទួលទានទំពាំងទេ។ កាលពីពេល ថ្មីៗកន្លងមកអ្នកសារព័ត៌មានបានសម្ភាសន៍ជាមួយលោកទិន លួង អាយុ៥៨ឆ្នាំ ជនជាតិទំពួន…
ខេត្តរតនគិរី ៖ ទំនៀមទម្លាប់ប្រពៃណីជនជាតិដើមភាគតិចទំពួនមិនទទួលទានទំពាំងទេ។ ការមិនទទួលទាននេះតាមការណែនាំរបស់មេកន្ទ្រាញតាំងពីរាប់រយឆ្នាំមកហើយ។ មកដល់ពេលបច្ចុប្បន្ននេះនៅតែគោរពតាមមេកន្ទ្រាញមិនទទួលទានទំពាំងទេ។
កាលពីពេល ថ្មីៗកន្លងមកអ្នកសារព័ត៌មានបានសម្ភាសន៍ជាមួយលោកទិន លួង អាយុ៥៨ឆ្នាំ ជនជាតិទំពួន ជាចៅសង្កាត់បឹងយក្សឡោម រស់នៅភូមិឡូម សង្កាត់យក្សឡោម ក្រុងបានលុង ។ លោកទិន លួង ឱ្យដឹងថាទំនៀមទម្លាប់មិនទទួលទានទំពាំងនេះគាត់បានដឹងពី ចាស់ៗក្នុងភូមិ ពីជីតា និងឪពុកម្តាយរបស់គាត់ ។ ឳពុក ម្តាយលោកបានហាមដាច់ខាតមិនឱ្យទទួលទានទំពាំងទេ ដោយគោរពតាមលោកតាខោល ជនជាតិទំពួន បានស្លាប់រាប់រយឆ្នាំមកហើយ តែបច្ចុប្បន្នកេរ្តិ៍ឈ្មោះរបស់គាត់នៅតែល្បីល្បាញដដែល ។
ពាក់ព័ន្ធនឹងរឿងហាមមិនឱ្យហូបទំពាំងនោះមានការតំណាល តៗគ្នាថាកាលពីរាប់រយឆ្នាំមុនជនជាតិភាគតិចទំពួនរស់នៅក្នុងព្រៃ ជ្រៅៗ ជា ក្រុមៗរបៀបជាកុលសម្ព័ន្ធ ហើយសម័យនោះតែងតែមានសត្រូវយាយីច្រើន ដូចជាសត្វខ្លា ដំរី តោ រួមទាំងពួកចោរតែងតែអុកឡុកក្នុងភូមិជារៀងរាល់យប់ ។ ពួកចោរទាំងអស់នោះបានលបចាប់កូនក្រមុំរបស់អ្នកភូមិ និងប្លន់ទ្រព្យសម្បិត្តអ្នកភូមិស្ទើរជារៀងរាល់យប់ ។ ដោយសារបែបនេះលោកតាខោល ជាមេកន្ទ្រាញ ព្រួយបារម្ភខ្លាំងក៏កោះហៅអ្នកភូមិជួបជុំគ្នាដើម្បីរកវិធីកុំឱ្យចោរចូលធ្វើបាបអ្នកភូមិបាន ។
មេកន្ទ្រាញ និងអ្នកភូមិបានធ្វើពិធីបួងសួងសុំកុំឲ្យពួកចោរ និងសត្វសាហាវចូលយាយីបាន គឺយប់ឡើងមុននឹងដេកស៊ឱ្យពួកចោរ និងសត្វសាហាវមើលឃើញតែដើមឫស្សីដុះជុំវិញផ្ទះ ។ ក្រោយពីបន់ស្រន់ហើយ ព្រឹកឡើងឃើញដានជើងចោរជាច្រើនដើរក្រឡឹងជុំវិញផ្ទះរបស់អ្នកភូមិ ។ ហេតុនេះហើយធ្វើឱ្យជនជាតិភាគតិចទំពួនមិនទទួលទានទំពាំងទេ ។
លោកទិន លួង ថ្លែងថា «បច្ចុប្បន្ននេះបងប្អូនភាគតិចទំពួនមិនទទួលទានទំពាំង៩០%នៅសល់១០%ទៀតដែលគាត់ហូបជា ក្មេងៗស្រករក្រោយដែលមិនបានដឹងទំនៀមទម្លាប់របស់មេកន្ទ្រាញបានបង្កប់ប្រពៃណីនេះរាប់រយឆ្នាំកន្លងមកហើយ ហេតុដូច្នេះហើយសូមសារព័ត៌មានជួយផ្សព្វផ្សាយដើម្បីឱ្យក្មេងស្រករក្រោយបានដឹងផង» ៕
ចែករំលែកព័តមាននេះ