ខេត្តក្រចេះ ៖ សេចក្តីរាយការណ៍បឋមឱ្យដឹងថា បុរសជនជាតិភាគតិចម្នាក់ ដែលមានរបរចាប់សត្វក្នុងព្រៃ ត្រូវបានមែកឈើធំបាក់សង្កត់លើបណ្តាលឱ្យស្លាប់ ខណៈកំពុងកាប់ដើមឈើធំនោះបំណងចាប់យកសត្វកំពីងដូងមួយក្បាល ដែលគាត់បានប្រដេញចាប់រត់ចូលពួនសម្ងំក្នុងគល់ឈើនោះ កាលពីវេលាម៉ោង០១រសៀលថ្ងៃទី២៦ មិថុនា ស្ថិតក្នុងឃុំស្រែជិះ ស្រុកសំបូរ (ក្នុងតំបន់ព្រៃមានទីតាំងជាប់ខេត្តមណ្ឌលគីរី) ។
សេចក្តីរាយការណ៍បន្តថា ជនរងគ្រោះដែលស្លាប់ឈ្មោះ ដេម គា អាយុ៥១ឆ្នាំ ជាជនជាតិភាគតិចក្រោល រស់នៅឃុំស្រែជិះ ស្រុកសំបូរ ដែលគេស្គាល់ថា មានជំនាញខាងទាក់សត្វព្រៃនោះ។ ក្រោយកើតហេតុ ជនរងគ្រោះត្រូវបានគ្រួសារដឹកតាមរទេះគោ ចេញពីព្រៃមកភូមិ ដើម្បីរៀបចំធ្វើបុណ្យតាមប្រពៃណី ។
ប្រភពបន្តថា នៅមុនពេលកើតហេតុ ជនរងគ្រោះដែលគេស្គាល់ថា មានរបរជំនាញចូលព្រៃចាប់សត្វ បាននាំគ្នាជិះរទេះគោសំដៅចូលចាប់សត្វព្រៃជ្រៅៗខាងក្រោយភូមិដូចទម្លាប់ ។ ពេលជនរងគ្រោះបានចូលទៅក្នុងព្រៃ ក៏បានជួបសត្វកំពីងដូងធំមួយ ក៏នាំគ្នាប្រដេញជាមួយសត្វឆ្កែ ដើម្បីស្ទាក់ចាប់ ។ ពេលប្រដេញចាប់សត្វកំពីងដូងដែលរត់ចូលពួនក្នុងគល់ឈើ ជនរងគ្រោះនិងកូនក្មួយក៏បានទៅកាប់គល់ឈើនោះ តែមិនដឹងភ្លាត់ស្នៀតបែបណា ក៏បាក់សង្កត់លើជនរងគ្រោះតែម្តង ។
គួរបញ្ជាក់ថា ឃុំខាងលើ គឺសម្បូរដោយបងប្អូនជនជាតិភាគតិច រស់នៅដូចជា ព្នង ក្រោល និងស្ទៀង ។ ចំណូលគ្រួសាររបស់ពួកគាត់សព្វថ្ងៃ គឺពឹងផ្អែកលើអនុផលព្រៃឈើ មានដូចជា ដងជ័រ អារឈើ និងចូលព្រៃចាប់សត្វជាដើម ។
ចែករំលែកព័តមាននេះ