រាជធានីភ្នំពេញ ៖ ប្រធានសមាគមទីភ្នាក់ងារទេសចរណ៍កម្ពុជា(CATA)បានជំរុញឲ្យអាជ្ញាធរខេត្ត និងមន្ត្រីជំនាញពាក់ព័ន្ធពង្រឹងស្តង់ដាអនាម័យ និងសេវាបដិសណ្ឋារកិច្ចឲ្យបានល្អប្រសើរ ដើម្បីទាក់ទាញភ្ញៀវទេសចរជាតិ និងអន្តរជាតិ ។
លោកស្រី ឆាយ ស៊ីវលីន ប្រធាន CATAបានមានប្រសាសន៍តាមទូរស័ព្ទកាលពីសប្តាហ៍មុនថា សណ្ឋាគារនៅរាជធានីភ្នំពេញ និងខេត្តមួយចំនួនដូចជា ខេត្តសៀមរាប និងព្រះសីហនុ ជាដើម មានសេវាបដិសណ្ឋារកិច្ចល្អប្រសើរហើយ ពិសេសសណ្ឋាគារកម្រិតផ្កាយ៤និងផ្កាយ៥ ប៉ុន្តែនៅតាមបណ្តាខេត្តមួយចំនួនដូចជា ខេត្តរតនគិរី មណ្ឌលគិរី និងស្ទឹងត្រែង ជាដើម មិនទាន់បានពង្រឹងបទដ្ឋានអនាម័យ និងគុណភាពបដិសណ្ឋារកិច្ចល្អប្រសើរនៅឡើយទេ ។ លោកស្រីបន្តថា ៖« ដោយសារមានបញ្ហាបែបនេះ ទើបយើងមិនអាចរៀបចំកញ្ចប់ទស្សនកិច្ចទៅកាន់ខេត្តទាំងនោះបានទេ ព្រោះវានឹងធ្វើឲ្យភ្ញៀវទេសចរមានអារម្មណ៍មិនល្អ និងខូចដល់កញ្ចប់ទស្សនកិច្ចរបស់យើង » ។ លោកស្រីបន្តថា ៖« អាជ្ញាធរខេត្ត និងមន្ត្រីជំនាញពាក់ព័ន្ធ គួរពិចារណាឲ្យបានច្រើនពីចំណុចនេះ ទាំងអនាម័យ បញ្ហាសំរាម និងបញ្ហាជាច្រើនទៀត ដែលមិនទាន់មានការយកចិត្តទុកដាក់នៅឡើយ » ។
លោកស្រីបន្ថែមថា ការពង្រឹងស្តង់ដាអនាម័យ បដិសណ្ឋារកិច្ចល្អប្រសើរ នឹងធ្វើឲ្យខេត្តទាំងនោះទទួលបានភ្ញៀវទេសចរកាន់តែច្រើន ហើយវានឹងផ្តល់ចំណូលដោយផ្ទាល់ដល់ប្រជាពលរដ្ឋ និងអ្នកវិនិយោគក្នុងវិស័យនេះប្រកបដោយនិរន្តរភាព ។
សហប្រធានក្រុមការងារឯកជនផ្នែកវិស័យទេសចរណ៍ លោក លូ ម៉េង បានមានប្រសាសន៍ស្រដៀងគ្នាថា បញ្ហាសំរាម ជារឿងធំមួយដែលយើងត្រូវដោះស្រាយទាំងអស់គ្នា ហើយប្រជាពលរដ្ឋ ពិសេសអ្នកវិនិយោគក្នុងវិស័យនេះ គួរយកចិត្តទុកដាក់ឲ្យបានខ្លាំងក្លាបំផុត ។ លោកបន្តថា ភ្ញៀវទេសចរអន្តរជាតិមកពីអាស៊ី និងពីបណ្តាប្រទេសនានាក្នុងទ្វីបអឺរុប ពួកគេតែងតែខ្លាចរអា នៅពេលឃើញសំរាមរាយប៉ាយ ពាសវាលពាសកាលនៅតាមដងផ្លូវ និងរមណីយដ្ឋាននានា ។ លោកបន្តថា ៖« បញ្ហាសំរាមគួរជាអាទិភាពមួយ ហើយប្រជាពលរដ្ឋកម្ពុជាសូមចូលរួមថែរក្សាអនាម័យ និងកុំបោះចោលសំរាមពាសវាលពាសកាល ហើយសូមចាត់ទុកនេះជាបញ្ហារបស់យើងទាំងអស់គ្នា » ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងថា បញ្ហាអនាម័យ ជាកង្វល់ធំមួយក្នុងវិស័យនេះ ដែលទាមទារឲ្យមានយុទ្ធនាការសមស្របមួយ និងធ្វើជាបន្ទាន់ ដើម្បីជំរុញការពង្រឹងគុណភាព និងបទដ្ឋានអនាម័យក្នុងវិស័យនេះឲ្យបានកាន់តែល្អប្រសើរ។
រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងថា ទេសចរណ៍ជាវិស័យដែលត្រូវមានការចូលរួមពហុវិស័យ ព្រោះក្រសួងទេសចរណ៍មិនអាចធ្វើបានជោគជ័យនោះទេ ប្រសិនជាគ្មានការសហការចូលរួមពីក្រសួងពាក់ព័ន្ធ ជាពិសេស អាជ្ញាធរថ្នាក់ក្រោមជាតិ។ លោកបន្តថា បញ្ហាសំរាម និងអនាម័យ ជាកង្វល់របស់យើង ដែលទាមទារឲ្យមានការយកចិត្តទុកដាក់ទាំងអស់គ្នា ។ លោកបន្តថា ៖« សូមទាំងអស់គ្នារួមគ្នាគិត រួមធ្វើ និងរួមដោះស្រាយទាំងអស់គ្នា ទើបយើងអាចសម្រេចបាននូវគោលដៅរបស់យើង » ៕
ចែករំលែកព័តមាននេះ