ខេត្តរតនគិរី ៖ ក្មេងប្រុសម្នាក់ពិតជាអភ័ព្វណាស់ ដោយសារមានសតិមិនប្រក្រតី ទើបស្ថិតក្នុងចំណងចងជើងមិនឱ្យដើរផ្តេសផ្តាស១០ឆ្នាំមកហើយ គឺចាប់ពីអាយុ៦ឆ្នាំ និងពេលនេះអាយុ១៦ឆ្នាំហើយ ។ ភាពមិនប្រក្រតីរបស់កូនប្រុសនេះ ត្រូវបានស្ត្រីជាម្តាយមានជំនឿថា មកពីគាត់មើលរាហូចាប់ចន្ទ្រមួយឆ្នាំ២ដង ទើបកូនគាត់កើតមកមានសតិមិនប្រក្រតី ។
ទាក់ទិននឹងរឿងរ៉ាវនេះ ត្រូវបានអាណាព្យាបាលក្មេងប្រុសខាងលើរៀបរាប់ថា គាត់ជាម្ដាយឈ្មោះ វ៉ាន់ នីថែប អាយុ៤២ឆ្នាំ ជាខ្មែរកាត់ឡាវ ឯប្តីគាត់ឈ្មោះ ជា ប៉ុនឡាំង អាយុ៤៥ឆ្នាំ ជាមន្ត្រីនៅមន្ទីរព័ត៌មានខេត្ត និងមានទីលំនៅក្នុងភូមិថ្មដា សង្កាត់បឹងកន្សែង ក្រុងបានលុង ។
ប្តីប្រពន្ធគាត់មានកូន៣នាក់ប្រុសទាំងអស់ ហើយកូនដែលមានសតិមិនប្រក្រតីនេះជាកូនច្បងឈ្មោះ ជា ដូល្លា កើតក្នុងឆ្នាំ២០០២ ។អ្នកស្រី វ៉ាន់ នីថែប និយាយថា ពេលមានផ្ទៃពោះ៣ខែ ស្រាប់តែមានរាហូចាប់ចន្ទ្រ(ចន្ទ្រគ្រាស) គាត់បានឈរមើលហើយដល់ពេលពពោះបាន៨ខែ ក៏មានរាហូចាប់ចន្ទ្រម្តងទៀត(បានន័យថាឆ្នាំ២០០២ មានរាហូចាប់ចន្ទ្រពីរដង)ហើយគាត់ជាម្តាយបានឈរមើលទាំង២លើក ។
អ្នកស្រី វ៉ាន់ នីថែប រៀបរាប់ទៀតថា ពេលនោះមានចាស់ៗក្នុងភូមិជាច្រើននាក់បានហាមនិងប្រាប់គាត់មិនឱ្យឈរមើលក្នុងពេលមានផ្ទៃពោះទេ ហើយពពោះបានរយៈ៩ខែ១០ថ្ងៃ ក៏បានសម្រាលកូននៅក្នុងមន្ទីពេទ្យបង្អែកខេត្ត។ពេលកើតមក ទារកមានសុខភាពល្អធម្មតារហូតដល់អាយុ៣ទៅ៤ឆ្នាំ ចេះហៅប៉ាម៉ាក់ ហើយចាប់ផ្តើមប្លែកចាប់ពីអាយុ៥ឆ្នាំ ។
តាមការកត់សម្គាល់គឺ ទី១-លែងចេះនិយាយ ទី២-ឧស្សាហ៍ប្រកាច់ ទី៣-អត់ចេះស្លៀកពាក់ខោអាវ និងទី៤-ឧស្សាហ៍រត់ចូលព្រៃបាត់១ថ្ងៃ២ថ្ងៃទើបរកឃើញ ។ ដោយសារឃើញទង្វើកូនបែបនេះ ទើបពួកគាត់ទាំង២នាក់ប្តីប្រពន្ធសម្រេចចិត្តយកខ្សែក្រណាត់ចងកជើងឱ្យនៅក្រោមផ្ទះ ចាប់តាំងពីអាយុ៦ឆ្នាំ ដែលរហូតដល់សព្វថ្ងៃកូនប្រុសគាត់មានអាយុ១៦ឆ្នាំហើយ ប៉ុន្តែគេនៅតែមិនព្រមស្លៀកពាក់ខោអាវ ។ នៅពេលបង្ខំឱ្យស្លៀកពាក់ខោអាវ គេតែងតែហែកខោអាវចោល ។ ពេលហូបបាយ គេអត់ចេះហូបខ្លួនឯងទេ គឺពួកគាត់ជាឪពុកម្តាយជាអ្នកបញ្ចុកដូចកូនក្មេងអាយុ១ឆ្នាំ ។
អ្នកស្រីជាម្តាយបន្តថា ដោយសារកូនមានអាការបែបនេះ ក៏បាននាំទៅមើលនៅគ្រូខ្មែរអស់ជាង១០គ្រូហើយនៅតែមិនជា ។ ឯខាងពេទ្យសម័យក៏ធ្លាប់ទៅពិនិត្យដែរ ប៉ុន្តែនៅតែមិនជា ។អ្នកស្រីនៅតែយល់ថា មូលហេតុដែលកូនគាត់កើតមកមានសតិមិនប្រក្រតីបែបនេះ គឺមកពីពេលគាត់មានផ្ទៃពោះបានឈរមើលរាហូចាប់ចន្ទ្រ ហើយគាត់សំណូមពរតាមរយៈកាសែតកោះសន្តិភាពថា បើបងប្អូនស្ត្រីណានៅពេលមានផ្ទៃពោះសូមកុំឈរមើលរាហូចាប់ចន្ទ្រអីប្រយ័ត្នដូចកូនគាត់ ។ ចំពោះចំណុចនេះ មិនអាចរកការបញ្ជាក់បានទេថា តើវាមានឥទ្ធិពលអ្វីបានថាស្ត្រីមានផ្ទៃពោះ ហាមមើលរាហូចាប់ចន្ទ្រ ដែលនេះគ្រាន់តែជាជំនឿមួយប៉ុណ្ណោះ មិនអាចធ្វើឱ្យកូនក្នុងក្នុងផ្ទៃក្លាយជាមានសតិមិនប្រក្រតីបែបនេះទេ ។
ជាចុងបញ្ចប់នេះ គាត់សំណូមពរដល់សប្បុរសជននិងគ្រួពេទ្យល្បីៗ សូមជួយព្យាបាលកូនប្រុសគាត់ឲ្យបានជាសះស្បើយផង ។ បច្ចុប្បន្នជីវភាពរបស់គ្រួសារគាត់ពិបាកខ្លាំងណាស់ រកព្រឹកខ្វះល្ងាចរកល្ងាចខ្វះព្រឹក ។ គាត់បានត្អូញត្អែរថា កើតមកមនុស្សដូចគ្នា ហេតុអ្វីក៏មានវាសនាខុសគ្នាម្លេ៉ះ?
ចែករំលែកព័តមាននេះ